Ayera tardi, parlamentarionan di MEP, Evelyn Wever-Croes, Rocco Tjon y Edgard Vrolijk a presenta na LAR pa un audiencia den e caso tocante e biahe den jet priva di minister Gerlien Croes (Futuro). Den un transmision en bibo for di LAR despues di e audiencia, Wever-Croes a bisa cu e “no a expect cu e lo bay asina bon.”

Ta trata aki di e disputa hopi largo entre oposicion y e minister tocante un biahe cu minister Croes a haci den un jet priva pa bay Corsou na november. Oposicion kier sa si e minister a paga pa e biahe, cuanto y na ken, y mira recibo. Te awo, e minister no a duna contesta, loke a pone MEP bay LAR pa busca contesta.

“El a bay bon den e sentido cu nos a defende nos mes, nos a trece nos ponencianan dilanti. Pero nos ta mes desapunta pasobra e minister no a bin cu niun prueba, niun documento, niun informacion,” Wever-Croes a bisa miembronan di prensa reuni pafo. Segun e parlamentario, “e unico cos cu e abogado di e minister a haci ta defende e minister riba ‘technicalities’, riba formalidad.”

Segun Wever-Croes, e minister ta insisti cu no a entrega e peticion di e manera corecto, pasobra no mester a manda e carta via di presidente di Parlamento sino digital pa e minister. Wever-Croes a bisa cu nan no ta di acuerdo pasobra comunicacion entre e minister y Parlamento ta bay via presidente di Parlamento. “Es mas, e minister mes a contesta su cartanan na nos via presidente di Parlamento,” el a bisa.

Wever-Croes a splica ademas cu segun e abogado, e minister a contesta caba, y a referi na e relato di e minister su biahe pa Corsou. “Pero eyden no ta papia nada di e private jet, y nos preguntanan ta tocante e private jet,” el a bisa. Tambe e minister a referi na pregunta cu el a contesta den Parlamento, cual segun Wever-Croes, no ta relaciona na e preguntanan cu oposicion a haci specificamente. Specificamente, nan a haci 7 pregunta: “Cuanto bo a paga, na ken bo a paga, ki dia bo a paga; nos ta pidi e recibonan ey; nos ta pidi e prueba cu bo a trat’e na Ministerraad; nos a pidi con bo a tene cuenta cu integridad – e codigo di conducta di integridad di minister,” Wever-Croes a bisa, “y e siete preguntanan ey te awe no a wordo contesta.”

Wever-Croes ademas a critica e minister pa motibo cu parlamentarionan mester a acerca LAR – cual no ta e procedura normal cu Parlamento mester sigui pa ricibi contesta di gobierno. “Berguensa e minister mester tin cu nos mester bin te aki pa nos busca informacion.”

LAR ta bay tuma 8 siman pa formula un conseho den e caso aki y manda esaki na e minister en cuestion, y despues esey e siguiente stapnan lo bira conoci.