Buraco entre bestaansminimum y salario ta sigui a pesar di surplus financiero di Aruba

Recientemente, Oficina Central di Estadistica (CBS) a publica estadisticanan unda por mira diferente informacion di manera detaya y amplio. Entre esaki, via actualisacionnan mensual, por mira e cambionan den e costo di bida y cantidad di placa necesario pa un hogar sea di 1 persona of varios, por cubri su gastonan y tin un bida adecua.

CBS ta defini un bestaansminimum como e nivel minimo di entrada cu ta percibi como necesario pa un persona of famia por funciona den sociedad di un manera adecua y socialmente aceptabel.

Importante ta pa nota cu ora usa e definicion “Bestaansminimum”, en realidad ta referi na un “Sociaal Bestaansminimum” y no na e definicion literal di un “Bestaansminimum” cu ta referi na “e suma di placa necesario pa cumpra e bienes y servicionan cu ta considera necesario pa biba un bida liber di privacionnan basico” (Nacionnan Uni).

A crea un indice pa e “Bestaansminimum” door di calcula e costo di tur recurso esencial cu un adulto promedio ta consumi durante un luna. Cada luna e indice aki ta ahusta, a base di e prijsnan di alimento, paña, vivienda, transporte y otro articulonan den canasta.

E bestaansminimum actual ta basa riba e rapport “Bestaansminimum 2010” publica door di CBS na December 2010, y cual ta actualisa mensualmente segun e CPI. E unidad di referencia usa door di CBS (manera indica den e rapport aki) ta di un hogar cu ta consisti di dos adulto y dos mucha (edad 0-14). E peso total pa un hogar asina ta 2.1 (1.0+0.5+0.3+0.3).

Na april caba a mira cu CBS a indica cu gastonan di mantencion di un nivel di bida basico na Aruba a sigui subi na maart, reflehando desaroyonan di prijs mas amplio den producto y servicionan esencial y segun e CPI di mei, te ainda nos ta bibando e realidad aki.

Di acuerdo cu e cifranan di maart 2026, un cas cu ta consisti di dos adulto y dos mucha (di edad 0–14) tabatin mester di Afl. 5.602 pa luna pa cumpli cu e nivel di bida basico. Esaki ta marca un aumento di Afl. 95 compara cu maart 2025, ora cu e mesun hogar tabata exigi Afl. 5.507. E subida a ser impulsa principalmente pa gastonan mas halto den categorianan esencial, particularmente cuminda y bebidanan no alcoholico, cu a representa un subida di Afl. 71 durante aña.

Na april di e aña aki, e bestaansminimum mensual pa un hogar cu ta consisti di dos adulto y dos mucha (di edad 0-14) tabata Afl. 5,588 y fuera di famianan, e datonan tambe a subraya e situacion pa adultonan soltero, un grupo cu ta sigui enfrenta tension financiero.

Na maart, e bestaansminimum pa un hogar di un solo persona tabata Afl. 2.668 pa luna y segun e estadistica publica recientemente, esaki ta keda e realidad. E nivel aki di entrada rekeri a surpasa e entrada minimo di referencia, resultando den un deficit mensual di Afl. 661. E deficit aki ya caba tabata representa un aumento for di e Afl. 636 registra un aña prome, y ta nota como e di dos deficit mas halto observa den luna di maart durante e ultimo seis aña, y te ainda nos ta sigui mira e mesun situacion.

Na april 2026, e bestaansminimum mensual pa un hogar cu ta consisti di un solo adulto tabata Afl. 2,661, cual ta representa un deficit di entrada di Afl 654, un subida di Afl. 15 compara cu e deficit observa un aña pasa (Afl. 639). E deficit aki ta e di dos mas halto registra den un periodo di seis (6) aña pa luna di april.

E persistencia den buraco di entrada ta sugeri cu crecemento di salario no a sigui e ritmo di e aumento di costo di producto y servicionan esencial, particularmente pa esnan cu ta gana menos entrada. E cifranan ta indica cu, a pesar di inflacion general modera, factornan di gasto specifico — specialmente cuminda — ta sigui eherce presion riba presupuestonan di cas.

Entrante 1 di januari di e aña aki salario minimo pa ora na Aruba a bira Afl. 11,58 – loke pa un empleado cu ta traha 40 ora pa siman ta resulta den un salario mensual di Afl. 2.007,05. Si compara esaki cu e bestaansminimum pa hogar di un adulto, tin un buraco di 654 florin.

Pa un famia di dos adulto y dos mucha, e situacion ta mas critico. Hasta si ambos adulto gana salario minimo, nan entrada combina di Afl. 4.014 ta keda 1.574 florin bao di e bestaansminimum registra na april. E cifranan aki ta ilustra cu e aumento recien di salario minimo – introduci pa parlamento na september 2025 y vigente for di januari ultimo – ainda no ta suficiente pa cera e buraco entre loke e clase trahador di Aruba ta gana y loke realmente nan tin mester pa un bida adecua.

Aña pasa, Gabinete AVP-FUTURO a splica den detaye cu den nan programa di gobernacion lo implementa strategia pa yega un maneho economico inclusivo, cu meta di mehora e poder di compra y baha costo di bida entre otro, sinembargo e datonan aki ta ilustra cu e situacion ta sigui precario y ta sigui laga famia y hogarnan den un situacion unda nan no por cubri ni sikiera un bestaansminimum, sin tene na cuenta cu fuera di esaki tin demas necesidadnan social pa por tin un bida digno y completo.

Recientemente nos a mira den rapport di CAft cu Aruba a cera e di dos mitar di 2025 cu un rindimento fiscal solido y un surplus creciente, pero te ainda e surplus aki no ta traduci den un mehoracion di costo di bida pa pueblo.

Claramente ta tuma na cuenta cu tin demas areanan cu importancia unda gobierno tin mester di inverti su placa, sinembargo nos no por papia di un surplus economico pa e pais mientras cu e pueblo y clase trahador ta sigui lucha y encontra problema pa cubri su gastonan esencial.

Accion ta sigui sumamente necesario pa atende e buraconan aki den entrada y loke realmente ta necesario pa subsisti. Bienestar y felicidad di pueblo na final, ta e motor di Aruba y esaki ta loke mester proteha.