(Infobae) – E presidente interino a expresa esaki durante un evento cu trahadornan di Faja Petrolifera del Orinoco. “No tene miedo di un Venezuela liber di sancion,” el a bisa.
Presidente interino di Venezuela, Delcy Rodriguez, a anuncia diaranson cu, “den e simannan binidero”, mas compania den sector di hidrocarburo lo yega na su pais, cual a habri su mes pa inversion priva y stranhero den medio di acercamento cu Merca.
“Den e simannan binidero, mas y mas compania lo yega na Venezuela cada biaha mas lihe, y boso, cu ta trahadornan di Faja Petrolifera del Orinoco, lo mira esaki cu boso wowo,” e presidente a bisa durante un evento den estado petrolero Anzoategui, na oost di e pais, transmiti pa canal estatal VTV.
Faja Petrolifera del Orinoco ta un area cu ta extende den parti oost di pais y cu ta contene e reservanan comproba di crudo mas grandi na mundo.
Rodriguez no a duna detaye tocante e companianan, operacionnan of ki ora nan tin plan di yega na e nacion Sur Americano, pero a sigura cu su pais ta atravesando un proceso di atraccion di inversionnan nacional y stranhero.
E lider Chavista, kende a asumi presidencia despues di captura di Nicolas Maduro januari pasa na Caracas pa Merca, a bisa cu e industria petrolero Venezolano “a ser crea cu sacrificio” y “a supera dificultadnan” den medio di e “blokeo economico”.
Di otro banda, el a anuncia creacion di un conseho academico superior tocante hidrocarburo pa “duna un gran impulso na profesionalisacion y preparacion” di trahadornan petrolero.
Den un evento anterior, Rodriguez a urgi Merca y Europa, entre otro, pa “no tene miedo di un Venezuela liber di sancionnan”, medidanan cu Washington a flexibilisa den e ultimo lunanan di acercamento y reestablecemento di relacionnan cu Caracas.
Despues di captura di Maduro, presidente di Merca Donald Trump a urgi companianan energetico Mericano pa inverti na Venezuela.
Compania petrolero ExxonMobil, e compania di hidrocarburo mas grandi di Merca y un di e companianan energetico mas grandi na mundo, ta den negociacion pa adkiri derechonan di extraccion di petroleo na Venezuela, segun The New York Times.
Citando fuentenan familiarisa cu e situacion, e corant a bisa cu e acuerdo por ser anuncia mas laat e luna aki y lo permiti Exxon produci petroleo den seis campo.
