Ayera tardi, dies sindicato di Aruba a conhuntamente a entrega un carta di protesta dirigi na Secretario di Estado pa Relacionnan di Reino, Eric van der Burg, contra e propuesta di Ley di Reino pa Supervision Financiero, HOFA.
E sindicatonan cu a participa ta Federacion di Trahadornan di Aruba (FTA), Sindicato di Empleadonan Publico y Priva di Aruba (SEPPA), Sindicato di Maestro di Aruba (SIMAR), Trahadornan Organiza di Sector Publico di Aruba (TOPA), Sindicato di Bomberonan di Aruba (SINBA), Sindicato di Trahadornan den Telecomunicacion (STT), Sindicato Aduanero di Aruba (SADA), Sindicato di Trahadornan di Aruba (STA), Sindicato Independiente WEB Aruba (SIWA), y Arubaanse Bond van werknemers in Verplegende instellingen (ABV).
Den nan carta, e sindicatonan a reacciona contra comentarionan di e Secretario di Estado, rechasando loke nan a bisa ta su “interpretacion di e hechonan.”
“E comparacion entre Aruba, na un banda, y Corsou y St. Maarten na e otro banda, ta ignora un diferencia historico fundamental y constitucional den Reino Hulandes,” segun e carta. Nan argumento principal ta cu Corsou y Sint Maarten a haya nan status como pais autonomo, den disolucion di Antias na 2010, hunto cu un pakete di reforma constitucional. Henter e transicion “de facto a representa un stap padilanti den nan desaroyo constitucional y nan proceso pa un autonomia mas grandi.” Pero Aruba no a acepta supervision financiero di Reino como condicion pa status autonomo. “Hustamente e hecho cu Aruba desde 1986 a maneha su finanzas publico di manera independiente, sin supervision structural basa riba un ley di Reino, ta forma un di e caracteristicanan mas esencial di Aruba su posicion constitucional separa dentro di Reino,” algo cu ta “parti integral di e Status Aparte.” Alinea Aruba cu Corsou y Sint Maarten lo ta un “retroceso” pa Aruba, segun e sindicatonan.
“E hecho cu Aruba awe ainda ta sigui ta e unico pais autonomo den Reino sin supervision financiero na nivel di Reino, ta confirma cu su posicion constitucional efectivamente a keda diferente. Status Aparte pa definicion ta nifica un clasificacion separa. Elimina of debilita e distincion bou di e argumento di “igualdad” ta mina e realidad historico y constitucional di Aruba den Reino,” nan a argumenta.
Tambe a enfatisa cu Aruba a demostra di ta capaz di mehora su maneho financiero riba su mes “y pone finanzas publico na ordo,” y ta dificil pa reconcilia supervision mas amplio di parti di Reino cu e autonomia di Aruba “riba cual Statuut ta basa.”
“Sindicatonan por lo tanto ta mantene nan opinion cu cambia e posicion constitucional separa di Aruba, cu e meta pa “alinea” Aruba constitucionalmente cu e otro partinan di Reino, no por wordo hustifica na ningun manera,” e carta ta finalisa, agregando cu “respet mutuo den Reino ta exigi precisamente reconocimento di e desaroyo constitucional y di e posicion unico di cada pais.”
