Evelyn Wever-Croes a duna instruccion na ambtenaarnan Arubiano pa prepara HOFA

Pakico paga banconan Mericano interes halto y haci e accionistanan mas rico, mientras cu por yega na financiamento mucho mas barata cu ta laga placa atras pa inverti. Esaki ta e pregunta cu Secretario di Estado pa Asuntonan di Reino Eric van der Burg tin pa oponentenan di HOFA, e ley di Reino ‘Houdbaar Overheidsfinancien Aruba.’

Den concepto di e Secretario di Estado, nada a cambia pasobra Hulanda ta sigui negocia cu Gobierno di Aruba, sin importa cua partido politico ta forma e gabinete.

Mas ainda, Hulanda no por impone e ley. Tur cuater gobierno representa den Conseho di Minister di Reino a bay de acuerdo cu e proposicion di ley cu awor ta na Raad van State. Pa e proposicion di ley di Reino keda accepta pa Tweede Kamer, Parlamento di Aruba mester acepta esaki pa medio di un landsverordening prome. Sin e landsverordening, e ley local di Aruba, no ta bin un HOFA.

Sinembargo, e punto di igualdad cu van der Burg a trece dilanti a lanta hopi discusion na Aruba, ya cu particularmente partidonan di oposicion ta considera cu esaki ta un sla den cara ya cu e Status Aparte di e isla a transforma den un forma diferente. Eric van der Burg a bisa cu HOFA lo percura cu Aruba ta haya e mesun interes abou cu Corsou y St. Maarten tin cu Hulanda, esta e dos porciento y cu esaki ta e punto cu e ta argumenta.

E punto di igualdad sin e trayectoria igual ta un di e discusionnan na Aruba. Pasobra con cu bay bin Corsou y St. Maarten a ricibi dispensacion pa parti di e debe cu tabatin cu Hulanda caba na momento di a ricibi nan Status Aparte, algo cu no tabata e caso na Aruba. Di otro banda, e debe cu Aruba a acumula hasta prome cu pero sigur despues di Status Aparte tabata mas tanto cu institucionnan riba mercado financiero internacional.

E proposicion bou HOFA ta cu e financiamento awor lo pasa pa medio di Hulanda. Eric van der Burg den e caso aki a reconoce cu Hulanda ta e ruman mas rico y mas grandi den Reino Hulandes y cu Aruba lo por haci e prestamonan na e ruman grandi aki, en bes cu na institucionnan financiero priva cu ta predominante banconan Mericano cu ta responde na accionistanan. “Lo no ta miho pa Aruba haci haya financiamento na un interes mucho mas abou for di un pais ruman cu un prestamo mas caro cu unicamente lo yuda e accionistanan di e banco?”

Riba e pregunta pakico unicamente un mayoria di 11 den Parlamento di Aruba lo ta suficiente pa aproba e landsverordening pa sostene e HOFA y no ¾ di Parlamento, e contesta di van der Burg tabata simple. E financiamento no ta un impacto constitucional pa Aruba. Ademas, aunke cu no tin indicacion pa tal, Tweede y Eerste Kamer tambe tin e derecho pa rechasa HOFA. Pues, ta te ora cu tur organo aproba e ley, ta ora cu e areglo por drenta na vigor.

Eric van der Burg a bisa cu hopi di e inquietudnan cu tin na Aruba no mester ta dirigi na su persona, sino na Gobierno di Aruba cu ta esun cu tin cu splica y ta responsabel pa e maneho financiero di Aruba. El a enfatisa si na varios forma cu e ta compronde cu Sra. Wever Croes ta den un funcion di oposicion awor, pero cu e palabracionnan pa yega na e HOFA a keda formula pa gran parti tempo cu e awor lider di oposicion tabata Minister President di Aruba. “Mi ta totalmente desacuerdo cu Hulanda kier mina autonomia di Aruba pa medio di HOFA. E proceso aki a keda inicia pa ex-Prome Minister Evelyn Wever Croes kende ta esun cu a duna instruccion na ambtenaarnan di Aruba, mescos con nos a duna instruccion na ambtenaarnan na Hulanda pa yega na e proposicion di ley. Mi no ta bisa mucho di su posicion actual. No ta mi asunto. Ami no ta papia di kico ta sosode den Parlamento di Aruba, ni tampoco kico ta sosodiendo cu sindicatonan. Si ta un hende cu mester duna comentario riba e dos aspectonan aki ta Prome Minister di Aruba y no e Secretario di Estado di Hulanda. Pasobra di otro forma, lo mi ta actuando robes.”

Eric van der Burg a bisa cu e relacion cu Hulanda tin cu e paisnan den Reino ta mas profundo cu e relacion cu tin cu por ehempel Francia y Belgica. “Locual nos kier ta haci posibel pa brinda Aruba e posibilidad pa haci prestamo mas barata.”

Van der Burg a puntra cu si cualkier hende kier of mester presta placa pa cumpra un cas of auto, y tin oferta di dos banco “y un ta fia na 7 porciento y e otro na 3.5 porciento, ta cua ta scoge anto? Lo scoge pa e prestamo mas abou. Y locual ta miho ainda, si tin un ruman, omo of tanta cu ta rico y kier presta na 2 porciento, anto lo bay na e persona ey tambe. Como ruman mas grandi, ami lo bisa, no bay na e banconan cu ta cobra mas, pero fia di nos cu por presta mas barata.” E efecto di e ultimo aki, pa medio di e HOFA ta cu Aruba lo tin hopi mas placa cu por inverti den construccion di cas, infrastructura, cuido y enseñansa.

“Esey ta locual Gobierno y Parlamento di Aruba lo mester por kier, esta cu mas placa ta keda disponible pa inverti na Aruba en bes cu paga financiadornan Mericano.”