(AFP) – Hollywood a desea un “Happy Birthday” na Marilyn Monroe dialuna mientras Tinseltown tabata celebrando 100 aña desde nacemento di un di su yiunan mas famoso.
Mas di 6 decada despues di su morto tragico, e ciudad tabata yen di referencia na e icono blonde riba loke lo a ta su di 100 cumpleaños.
“Ora bo pensa Hollywood, bo ta pensa riba Marilyn,” guia turistico Lacey Noel a conta AFP na Hollywood Boulevard su Walk of Fame.
“Tin un cierto misterio bunita y aura cautivador cu e tin cu nunca lo desaparece.”
Na e teatro Chines historico unda Monroe su mannan ta marca banda di “Gentlemen Prefer Blondes” (1953) su co-actor Jane Russell, fanaticonan a reuni pa canta “Happy Birthday” – imitando su serenada famoso pa presidente John F. Kennedy.
100 rosa y un bolo a ser poni na e sitio, un simbolo di Hollywood su era di oro y un punto turistico popular.
Tributonan a cuminsa riba diadomingo, cu Academy Museum habriendo un exhibicion yama “Marilyn Monroe: Hollywood Icon,” un exhibicion celebrando su carera den pelicula y su bida cu a caba trempan.
Academy Musem lo organisa screening special di su peliculanan durante e luna, incluyendo “The Asphalt Jungle” (1950), “Niagara” (1953), “The Seven Year Itch” (1955), “Some Like It Hot” (1959), y “The Misfits” (1961).
E exhibicion, cual lo dura te cu februari di 2027, ta inclui centenares di piesa original, algun rarabes disponible pa pueblo – manera Monroe su famoso shimis ros cu el a usa durante su presentacion iconico di “Diamonds Are a Girl’s Best Friend” den “Gentlemen Prefer Blondes.”
Mas adelante den e siman, dia 4 di juni, Julien’s Auction lo pone casi 200 piesa di memorabilia di Monroe na subasta como parti di su benta special “100 Years of Marilyn.”
E articulonan ta inclui potretnan cu nunca a publica, un guion cu nota di produccion, e pelicula cu nunca a caba “Something’s Got to Give,” y cosnan personal manera receta skirbi na man y su lipstick Elizabeth Arden.
Naci na Los Angeles dia 1 di juni na 1926, Monroe a tin un hubentud instabil pasa entre orfanatonan y casnan di cuido. E ta casa pa prome biaha cu 16 aña.
El a pasa su prome experiencia cu 1944, mientras cu e tabata trahando na un fabrica, ora cu un fotografo a yega pa captura potret di hende muher trahando na lineanan di produccion durante e di dos Guera Mundial.
Lansando den mundo di modelahe pronto despues, el a divorcia di su casa y a tuma un decision cu ta defini historia: tiñando su cabey bruin e blonde iconico.
El a logra haya su prome contract cu Fox y pa ora el a cumpli su 30 aña di edad el a establece su mes como un strea global.
Tras di escena, Monroe a funda su propio compania di produccion, a participa na e studio prestigioso Actors Studio na New York y te hasta a desafia e studionan.
Den añanan 1950, mientras cu e tabata bao contract cu 20th Century Fox, el a rechasa actua den e adaptacion di e musical “The Girl in Pink Thights,” bisando cu e guion ta mediocre y su salario – 3 biaha menos cu esun di su co-actor Frank Sinatra – tabata inhusto.
Su colaboracion cu Fox a duna mundo algun di e imagennan mas famoso den historia, incluyendo Monroe purbando di controla un shimis blanco mientras e tabata na New York City, den escena di “The Seven Year Itch.”
Banda di su actuacion cinematico, Monroe su fama tabata impulsa pa un bida priva cu tabata provee un gran cantidad di material pa scandal, alimentando un obsesion publico y convertiendo e den e representacion di un celebridad di siglo 20.
Despues di su prome matrimonio cu 16 aña tabatin un union problematico cu leyenda di baseball Joe DiMaggio, sigui pa un matrimonio di 5 aña cu escritor famoso Mericano Arthur Miller.
Tambe tabatin sugerencia cu el a involucra cu John F. Kennedy y su ruman homber Robert F. Kennedy, ademas di figuranan den Hollywood manera Marlon Brando y Frank Sinatra.
Monroe a fayece di un sobredosis di droga na su cas situa na Los Angeles den augustus di 1962 ora cu e tabatin apenas 36 aña.
