Ayera riba rednan social a circula e imagen impactante di un cacho cu mita di su cara ranca y na sanger. Organisacionnan di rescate di cacho a uni forsa pa duna asistencia na e cacho cu a resulta di ta un mama di cuatro puppies.
Segun Luna Foundation Aruba a publica riba rednan social, tabatin reportahenan di un cacho herida na San Nicolas. Team di e fundacion ayera mainta a bay busca e cacho, y a bin haya sorpresa cu e cacho ta mama y tabata cu su cuatro puppies. Hunto cu personal di Crijojo Trappers, a logra hiba e cacho na veterinario pa ricibi asistencia medico necesario.
“E storia cu e bisiñanan a conta ta cu un persona a tir’e,” e fundacion a conta. “Un persona a purba di mat’e pero a faya, y a termina ta ranca mita di su cara.”
Di un banda, por compronde e frustracion cu un poblacion creciente di cachonan riba caya. Sinembargo, mester nota cu e situacion ta debi na mal maneho y no na e cachonan mes. Un apelacion ta bay na ciudadanonan tuma esaki den mente prome cu tuma accion drastico cu lo solamente trece daño na e criaturanan aki. Semper tin un miho solucion, y esaki ta rekeri cooperacion pa yuda e animalnan aki.
E fundacion a agrega cu e cuatro puppies ta sano y salvo na e fundacion, y si logra salba e mama, e tambe lo bira parti di famia di Luna. Su nomber ta Scarlett. Donacionnan pa cuido di Scarlett ta bon bini.
Por haci donacion: Aruba Bank. Stichting Luna Foundation. Account: 6004940190.
