Gobierno di Aruba a registra un aumento den su entrada durante e prome kwartaal di 2026, mientras cu e debe nacional a sigui baha pa yega su nivel di mas abao den varios aña. Datonan publica pa Centrale Bank van Aruba (CBA) ta mustra cu entrada total a alcansa Afl. 436.8 miyon entre januari y maart 2026, mientras cu debe total pendiente a baha pa Afl. 5.003,9 miyon.

Segun e datonan publica den e “Quarterly Tables Government Sector 2026-I”, entrada total di gobierno durante e prome tres luna di 2026 tabata Afl. 436.8 miyon, compara cu Afl. 413.1 miyon den e prome kwartaal di 2025. E resultado ta representa un crecemento di cerca di 5.7% riba base anual. Mayoria di e entrada a bin for di impuesto, cu a contribui Afl. 407.4 miyon durante e periodo analisa.

Den e categoria di belasting, impuesto riba ingreso y ganashi a genera Afl. 85.3 miyon. Aunke e cifra ta mas abao cu e Afl. 88.8 miyon registra un aña prome, algun otro impuesto a compensa parcialmente e diferencia. Impuesto riba mercancia a produci Afl. 100.3 miyon, mientras cu impuesto riba servicio a registra un resultado notable di Afl. 50 miyon, superando e nivel di Afl. 43.9 miyon observa den e prome kwartaal di 2025.

Un di e fuente principal di recaudacion tabata B.B.O. y B.A.V.P. Durante e prome kwartaal di 2026, e concepto aki a genera Afl. 116.5 miyon, un aumento compara cu e Afl. 107.8 miyon registra den e mesun periodo un aña anterior. Impuesto riba cambio stranhero tambe a mustra un aumento significante, pasando di Afl. 14.7 miyon pa Afl. 25.4 miyon.

E cifranan ta indica cu diferente actividad economico a sigui aporta na e entrada fiscal di gobierno. Den e categoria di impuesto riba servicio, impuesto riba camber di hotel a aporta Afl. 35.6 miyon, reflehando e importancia continuo di sector turistico pa ingreso fiscal di Aruba. Tambe impuesto riba licencia di casino y otro servicio a contribui na e resultado general.

Na mesun momento, gastonan di gobierno a suma Afl. 376.2 miyon durante e prome kwartaal di 2026. Esaki ta un poco mas halto cu e Afl. 368.5 miyon registra den e prome kwartaal di 2025. E componente di gasto mas halto ta keda salario y beneficio relaciona cu personal, cu hunto a representa mas cu Afl. 125 miyon.

Gobierno a gasta Afl. 99.1 miyon na salario directo, mientras contribucionnan patronal a suma Afl. 26.1 miyon. Subsidionan salarial a representa Afl. 31.3 miyon adicional. Gastonan pa mercancia y servicio a yega Afl. 78 miyon, mientras cu transferencia y subsidionan na diferente entidad a alcansa Afl. 87.9 miyon.

Un punto relevante den e rapport ta cu gastonan di interes riba debe publico a suma na un total di Afl. 47.5 miyon durante e prome kwartaal. Aunke esaki ta un suma considerable, e cifra ta mas abao cu e Afl. 54.9 miyon registra den e mesun periodo di 2025. E reduccion por refleha parcialmente e disminucion gradual di e nivel general di debe gubernamental den añanan reciente.

A pesar cu entrada a supera gasto operacional, e rapport ta mustra cu e resultado financiero final pa e prome kwartaal di 2026 tabata un deficit financiero di Afl. 58.8 miyon. E cifra aki ta deriva di e metodologia financiero usa pa registra prestamo, pago di debe y otro movemento financiero den cuenta di gobierno.

Den termino di financiamento, gobierno a registra un salida neto di capital di exterior di Afl. 151.4 miyon. Esaki a resulta principalmente pa motibo di pago di obligacionnan existente. Na mesun momento, capital domestico neto a aumenta cu Afl. 11.8 miyon. Durante e kwartaal, gobierno a logra reduci su dependencia riba financiamento for di sistema monetario cu Afl. 70.3 miyon, indicando un mehoracion den su posicion financiero

Un di e indicadornan cu mas ta hala atencion den e publicacion ta e desaroyo di debe nacional. Na fin di maart 2026, debe total pendiente di gobierno tabata Afl. 5.003.9 miyon. Esaki ta representa un reduccion di mas cu Afl. 120 miyon compara cu e saldo registra na fin di 2025, cu tabata Afl. 5.124,3 miyon. E cifra actual tambe ta significativamente mas abao cu e nivel registra na fin di 2024, ora debe total tabata Afl. 5.265 miyon.

E reduccion den debe ta forma parti di un tendencia cu a cuminsa varios aña pasa. Na fin di 2022, debe total di gobierno tabata Afl. 5.715,6 miyon. Desde e momento ey, e saldo total a baha cu mas cu Afl. 700 miyon. E evolucion aki ta refleha combinacion di pago di debe existente, refinanciamento y maneho fiscal durante e periodo.

Di e debe total pendiente den e prome kwartaal di 2026, Afl. 2.059,9 miyon tabata debe domestico, mientras cu Afl. 2.944 miyon tabata debe cu acreedornan den exterior. Compara cu fin di 2025, tanto e componente domestico como e componente den exterior a registra un disminucion.

Dentro di e debe domestico, “government bonds (fiansa di entrada fiho haci pa inversionistanan na gobierno, cu ta usa e fondonan pa financia proyectonan publico y maneha su debe nacional) di gobierno a keda e instrumento principal, cu un saldo pendiente di Afl. 1.584,1 miyon. Debe no negociable, cu ta inclui diferente obligacion na corto y largo plaso, tabata Afl. 475.8 miyon.

Pa loke ta trata debe externo, Hulanda a keda e acreedor individual mas grandi. Na fin di maart 2026, e obligacionnan cu Hulanda a suma Afl. 1.247 miyon. Debe cu Merca tabata Afl. 720 miyon, mientras otro acreedornan internacional a representa Afl. 974.7 miyon.

E rapport ta ofrece tambe un bista riba e relacion financiero entre gobierno y sistema monetario local. Deposito total di gobierno na Banco Central y banconan comercial a yega Afl. 391.7 miyon na fin di maart 2026. Esaki ta inclui tanto fondo liber como fondo cu destino specifico. E posicion likido bruto di gobierno tabata Afl. 517.7 miyon durante e periodo analisa.

Otro indicador menciona den e publicacion ta e necesidadnan di financiamento pendiente, conoci como “expenditure arrears”. E suma aki tabata Afl. 38.4 miyon durante e prome kwartaal di 2026. Aunke e cifra ta mas halto cu e Afl. 18.6 miyon registra na fin di 2025, e ta keda considerablemente mas abao cu e nivel observa varios aña pasa.

E publicacion di CBA ta reuni informacion suministra door di Departamento di Finanzas, Oficina di Impuesto, APFA y otro instancia relevante. E cifranan pa 2026 ta ser considera preliminar y por cambia si informacion adicional bira disponible despues. Segun CBA, e datonan ta presenta un panorama general di operacionnan financiero di gobierno, incluyendo entrada, gasto, financiamento, posicion monetario y debe publico.

E resultado di e prome kwartaal di 2026 ta mustra un gobierno cu a sigui genera entrada robusto, specialmente for di impuesto y actividad relaciona cu servicio y turismo. Na mesun momento, e reduccion continuo di debe total ta indica cu e carga financiero nacional a sigui baha durante e ultimo añanan. E combinacion di crecemento modera den entrada, control relativo di gasto y disminucion di debe ta forma e caracteristica principal di e panorama fiscal presenta den e rapport di Centrale Bank van Aruba.