E ultimo capitulo di e Uitvoeringsagenda y Uitvoeringsrapportage Landspakket Aruba 2026 ta mustra progreso den varios proyecto cu ta forma parti di e “Overige Maatregelen” (otro medidanan), un grupo di iniciativa cu no ta cay bao di e temanan principal manera finanzas, enseñansa of cuido di salud, pero cu ta keda importante pa fortalece gobernacion, proteccion di consumidor, supervision di industria y modernisacion institucional di Aruba.

Segun e rapport, algun proyecto a logra progreso notable durante e ultimo periodo di reportahe, mientras otro iniciativanan ta enfrenta retraso of ta depende di decisionnan politico y legislativo pa sigui avansa.

Un di e proyecto mas amplio den e capitulo ta e creacion di un Sistema Nacional di Estadistica, conoci manera e National Statistical System (NSS). E meta di e sistema ta pa crea un plataforma digital y organisacional cu lo garantisa disponibilidad di estadisticanan oficial, confiabel, actual y accesibel pa trahadornan di politica, investigadornan y publico general.

E rapport ta indica cu infrastructura tecnico y e prome fase di e infrastructura di Business Intelligence ya a ser entrega, despues di algun retraso inicial. Esaki ta haci posible cu diferente actividad subsecuente, manera revision y desaroyo di componente adicional,por continua. Autoridadnan ta mantene e obhetivo di completa e proyecto den prome e kwartaal di 2027, mientras cu no tin retraso nobo.

Den e siguiente pasonan tin e presentacion di legislacion NSS na Parlamento di Aruba, algo cu ta planifica pa e di dos kwartaal di 2026. Tambe, e rapport ta indica, a traha riba revision di infrastructura tecnico y sistema di analisis di dato. Segun planificacion actual, infrastructura principal mester ta completamente prepara den e ultimo kwartaal di 2026. Despues di aprobacion di e ley principal, reglamentonan adicional lo mester ser introduci pa pone tur componente na vigor.

Otro iniciativa cu ta ricibi atencion ta e introduccion di reglamentacion relaciona cu credito di consumidor. E medida tin como meta fortalece posicion financiero y economico di consumidor door di establece regla cla tocante prestamo di placa y credito pa mercancia, entre otro.

E rapport ta señala cu gobierno ya a analisa diferente conseho y evaluacion relaciona cu e tema. A base di esey, un decision a ser tuma pa pone e Landsverordening Regeling Consumentenkrediet na vigor entrante 1 di januari 2027. Sinembargo, reglamentacion relaciona cu un sistema di registracion di credito lo bin mas despues. Si tur procedimento sigui segun plan, e reglamento principal lo drenta na vigor den e prome kwartaal di 2027.

Un di e proyecto cu ta ricibi hopi atencion internacional y local ta e establecimento di un Kansspelautoriteit (Autoridad di Wega di Placa). E organismo nobo ta destina pa fortalece supervision riba industria di casino, bet y otro forma di wega di placa, cu e meta di preveni influencia criminal y combati oferta ilegal.

Segun e rapport, e fase preparatorio ta bayendo segun plan. E kwartiermaker, cu ta encarga cu e fase di fundacion, a cuminsa trabao na september 2025. Desde e momento ey, diferente actividad importante a ser completa. Entre e resultadonan logra tin un investigacion riba adiccion na wega di placa, y un roadmap actualisa pa e autoridad nobo cu ya a haya aprobacion. Preparacionnan pa recluta miembronan pa e directiva tambe a cuminsa.

E proximo pasonan ta inclui nombramento formal di e directiva durante e di dos kwartaal di 2026 y presentacion di e legislacion corespondiente na Parlamento di Aruba den e di tres kwartaal di 2026 tambe. Un estudio riba adiccion na wega di placa, cu lo sirbi como un midimento inicial pa determina efectividad di futuro medida di proteccion di hungador, ta programa pa ser completa den e ultimo kwartaal di 2026.

Segun e agenda actual, e Kansspelautoriteit mester bira operacional den prome kwartaal di 2027.

Sinembargo, no tur iniciativa ta avansando cu e mesun ritmo. E trayecto pa crea un Rijkswet pa proteccion di dato personal pa tur pais den Reino Hulandes ta confrontando diferente obstaculo.

E rapport ta indica cu e paisnan a revisa e progreso di e grupo di trabao encarga cu e tema, pero cu diferencia di opinion tocante contenido, forma di implementacion y aspecto legal a limita e avance durante e ultimo periodo.

Como resultado, na e momento aki no tin un fecha definitivo pa completacion di e proyecto. Autoridadnan ta indica cu decision politico adicional lo mester ser tuma pa determina con e tema lo sigui den contexto di cooperacion entre e cuater pais di Reino.

Den area di defensa, e rapport ta mustra progreso den e modernisacion di posicion legal di militarnan profesional Caribense, conoci como ARUMIL. E iniciativa ta busca profesionalisa e organisacion y fortalece oportunidadnan di progreso profesional, incluyendo posibilidadnan di transicion pa otro institucion di seguridad nacional.

Ministerio di Defensa ya a prepara conceptonan pa un ley y un decreto cu ta forma e base legal pa reforma. Actualmente e documentonan ta den proceso di evaluacion na Directie Wetgeving y Juridische Zaken.

Segun e timeline, ta spera cu lo tin aprobacion administrativo durante prome kwartaal di 2026, mientras presentacion formal na Parlamento ta proyecta pa e di dos kwartaal di e aña. E rapport ta clasifica e proyecto manera uno cu ta canando segun e kalender estableci.

Otro iniciativa den e mesun sector, enfoca riba modernisacion di reglamentacion di servicio militar obligatorio, ta den un estado diferente. Segun e rapport, gobierno a conclui cu e naturalesa compleho di e medida ta exigi un re-evaluacion completo di metodologia, organisacion y timeline. Como consecuencia di esaki, e actividadnan principal ainda no a cuminsa y no tin un fecha definitivo pa completacion.

Den sector financiero, e introduccion di un Plan di Garantia di Deposito (DGS) ta sigui manera un proyecto di largo plaso. E sistema ta comparabel cu mecanismo internacional cu ta proteha esnan cu ta haci deposito den caso cu un institucion financiero enfrenta problema.

E rapport ta indica cu e decreto principal ta casi prepara, pero cu ainda tin necesidad di modifica otro reglamentacion prome cu por sigui cu aprobacion formal. E trayecto legislativo, cu ta inlcui conseho di Raad van Advies y aprobacion parlamentario, ta haci cu e calendario exacto ta dificil pa determina.

Despues di aprobacion final, ainda lo mester sigui un fase amplio di implementacion. Entre otro, ta necesario crea un fundacion pa administra e sistema, desaroya campaña di concientisacion y pone diferente mecanismo operacional cana. E expectativa actual ta cu e sistema lo por drenta na vigor rond di 2028.

Den conhunto, e capitulo “Overige Maatregelen” ta mustra cu Aruba ta sigui traha riba un serie di reforma institucional cu ta toca diferente aspecto di gobernacion, supervision, estadistica, defensa y proteccion financiero. Mientras algun proyecto, manera e Sistema Nacional di Estadistica y e Kansspelautoriteit, ta registra progreso consistente, otro iniciativa ta sigui dependiendo di proceso legislativo compleho y consenso politico.

E rapport ta conclui cu e mayoria di e trayectonan ta mantene nan direccion principal, pero cu e resultado final lo depende di continuidad den implementacion, disponibilidad di capacidad institucional y cooperacion entre e diferente actornan envolvi den e reformanan.