Problema di cacho na Aruba no ta cuminsa riba caya

Un debate tocante cacho na Aruba usualmente ta cuminsa unabes cu e problema ya ta riba caya. Cunukeronan ta keha cu cacho ta ataca y mata nan bestia di cria. Residentenan ta reporta cu cacho ta core tras di nan of morde nan den nan bario. Boluntarionan di rescate ta confronta cacho cu tin hamber, ta malo, herida, venena, bandona of auto a dal nan. Gobierno y organisacionnan di rescate mester e ora atende e consecuencianan: keho, atake, cuido di emergencia, eutanasia, shelter sobrepobla, y frustracion publico.

Pero un parti di e problema ta haya hopi menos atencion: di unda tur e cachonan aki ta bin?

Na Aruba, e discusion tocante cacho hopi biaha ta enfoca riba cacho riba caya. Hopi di e animalnan ey tin – of tabatin – un doño, y a ser cria, cumpra, bendi, regala of permiti pa reproduci sin ningun forma di control. E crisis no ta cuminsa na momento cu un cacho ta bandona riba caya. E ta cuminsa hopi prome, na cas, cura, setup informal di cria di cacho, benta online, y un mercado den cual por produci y bende puppies sin regulacion.

Esaki ta inclui comercio di cacho di rasa.

Na 2021, Bon Dia Aruba ya a reporta tocante e banda ignora di e problema. E tempo aya, Sandy Willems, kende tabata involucra cu Centro di Control di Cacho, a punta riba un cantidad di hende cu ta cria cacho di rasa na Aruba, y con esaki ta contribui na e cantidad di animal cu eventualmente ta resulta riba caya, den shelter, of mester pone drumi.

E problema ta keda altamente relevante awe.

Riba cualkier plataforma local di compra/benta of rednan social, ta facil pa haya puppies na benta. Hopi ta promovi como cacho di rasa. Algun ta hopi caro, otronan ta ofreci sin informacion cla tocante salud, vacunacion, riesgo genetico, condicion di e mama of responsabilidad di e criador despues di e benta.

Actualmente, Aruba no tin un sistema publico claramente rekeriendo criadornan di cacho pa registra, haya un licencia, cumpli cu standard di bienestar of para responsable pa e puppies cu nan ta produci. Esaki ta nifica cu basicamente cualkier persona por permiti un cacho pa sali na estado ripitidamente, bende e puppies, y somenta pa responsabilidad unabes e animalnan ta fo’i nan man.

E falta di control ta crea un conexion directo entre criamento priva y e problema publico di cacho.

Ora puppies ta nace saludable y atractivo, ta bende nan. Pero ora nan ta malo, herida, no desea, di rasa mixto, demasiado caro pa cuida, of no ta duna gansahi mas, nan ta bira problema di otro hende. Mayoria biaha e problema aki ta cay riba boluntarionan di rescate. Tin biaha e ta cay riba shelter. Tin biaha e ta cay riba caya.

Un post e siman aki riba rednan social di un señora involucra den rescate di cacho ta ilustra e dilema. El a skirbi tocante dos puppies golden retriever cu mester di ayudo urgente. Un tabata parce di tin un bala den su garganta y dificultad pa hala rosea. Otro tabatin herida riba su nek. Ambos tabata rekeri cuido veterinario. A solicita donacion pa cubri tratamento, remedi, cuminda y recuperacion.
Den un update despues, el a skirbi cu e puppies tabata hayando tratamento pa anemia y infeccion. E tambe a nota cu e doño tabata kier a regala e puppies y tabata dispuesto pa sterilisa e mama ora e momento yega.

E post ta mustra compasion pa e banda di rescate, pero tambe ta lanta un pregunta dificil: kico lo a pasa si e puppies tabata saludable? Lo a bende nan? Lo a bolbe laga e mama sali na estado? E doño lo a tuma responsabilidad financiero completo pa e animalnan? Of responsabilidad a bira urgente solamente unabes e puppies a bira un costo en bes di un posible fuente di entrada?

E preguntanan aki ta incomodo, pero necesario.

E problema no ta solo si un doño a haci lo corecto den un caso. E problema mas grandi ta cu Aruba no tin un sistema efectivo pa preveni e situacionnan aki di sucede ripitidamente.

Hopi biaha ta trata cacho di rasa como animal di luho. Nan ta asocia cu status, beyesa, comportamento specifico, of rasa di moda. Pero tras di e mercado tin problema serio di bienestar animal. Un cacho no ta un producto cu ta perde importancia unabes cu ta bend’e. Cada puppy cu nace den e sobrepoblacion di cacho na Aruba ta añadi na e responsabilidad cu comunidad mester carga.

Tambe tin e aspecto genetico. Cacho di rasa hopi biaha ta cria pa caracteristicanan fisico specifico, pero e caracteristicanan aki ta carga riesgo pa salud. Estudionan internacional a mustra cu cacho di rasa mixto – na Aruba, cacho ‘cunucu’ – por tin menos riesgo di cierto problema hereda cu cacho di pura rasa. Den un poblacion chikito manera Aruba, e riesgo por bira mas serio si e mesun cacho of lineahe ta ser usa ripitidamente sin screening genetico adecua of supervision veterinario.

Esaki no ta nifica cu tur cacho di pura rasa no ta saludable, of cu esun cu ta cria nan ta iresponsable. Tin doño y criador cu genuinamente ta stima nan bestia, ta duna cuido veterinario, screen cumpradornan, y no ta cria di mas. Pero sin regulacion, no tin manera pa distingui claramente entre criamento responsable y iresponsable.

Esey ta e problema central.

Aruba a introduci regla pa doñonan di cacho, incluyendo obligacion pa tene nan bao control y preveni nan di subi caya. Pero aplicacion ta keda dificil. Polis y autoridadnan ya tin escasez di personal, mientras shelter y gruponan di rescate ta abruma pa e cantidad di animal cu mester di ayudo.
E resultado ta cu e sistema ta reacciona despues cu ya a haci e daño.

Cunukero ta perde bestia. Residente ta ser ataca. Boluntario ta haya puppies herida. Shelter ta tuma otro cacho bandona. Veterinario ta trata sufrimento prevenible. Comunidad ta argumenta ken tin e culpa.

Y mientras tanto, produccion di mas cacho ta continua.

Si Aruba kier atende e problema di cacho seriamente, mester mira mas leu cu caya y busca e fuente. Esey ta nifica regula criamento.

Un sistema di licencia pa criadornan di cacho (“dog breeders”) lo ta un prome stap importante. Cualkier persona cu cria cacho pa benta mester ta registra y rekeri pa cumpli cu standard minimo, cu lo inclui vivienda adecua, cuido veterinario, limite riba con hopi biaha un cacho por pari, vacunacion y microchip obligatorio pa puppies, y registro cla di unda cada puppy ta bay.

Tambe lo mester rekeri criadornan pa sigui educacion basico riba bienestar animal, embaraso, complicacion di duna luz, cuido di puppy, riesgo genetico y benta responsable. No mester trata benta di puppies como un negoshi informal na banda sin consecuencia publico.

Aruba tambe mester considera vincula permiso pa cria cu e poblacion amplio di cacho riba e isla. Si shelternan ta yen, tin hopi abandono, y e poblacion di cacho riba caya ta sigui crece, no tin logica den permiti criamento descontrola sigui comosifuera e mercado ta existi den isolacion.

Educacion publico ta igualmente importante. Hopi hende ainda ta subestima e costo y responsabilidad di tin un cacho. Un puppy por ta bunita, pero e ta bira un animal adulto cu mester cuminda, espacio, training, veterinario, sterilisacion, atencion y cuido pa bida largo. Ora doñonan no ta bon prepara, cachonan ta neglisha, bandona, agresivo, malo di salud of descontrola.

Tambe mester compronde cu cumpra un cacho di pura rasa no ta automaticamente miho cu adopta un cacho local di cunucu. Cacho di rasa no ta necesariamente mas saludable, sabi, facil pa train of miho adapta pa bida den famia. Den hopi caso, cacho crioyo di Aruba ta fuerte, inteligente, y bon adapta na e ambiente di e isla.

Hopi biaha ta presenta e crisis di cacho como un conflicto entre hende y animal. Cunukero kier proteccion. Residente kier seguridad. Rescatistanan kier compasion. Pero e interesnan aki no mester opone otro. Tur banda lo beneficia si menos cacho no desea sigui naci, y tin menos cacho bandona, y mas doño responsable.

E situacion actual ta inhusto pa tur.

No ta bay resolve e problema di cacho door di kita cacho for di caya. No ta bay resolv’e door di solamente castiga crueldad despues cu e sucede. No ta bay resolv’e door di depende riba boluntario y donacion.

Aruba mester controla con e cachonan ta drenta e poblacion tambe.

Eseyt a nifica haci e preguntanan dificil tocante cria, bende, importa y tin cacho. E ta nifica reconoce cu e mercado di pura rasa no ta separa di e crisis di cacho riba caya. E ta parti di e mesun cadena di responsabilidad.

Te cu Aruba atende e comienso, e final ta bay keda igual: mas cacho riba caya, mas sufrimento, mas atake, mas rabia publico, y mas boluntario purbando di drecha un problema cu mester a preveni hopi tempo atras.