(AFP)—Equiponan di Formula One y Federacion Internacional di Automobilismo (FIA) a yega na un acuerdo pa reduci poco poco e componente electrico den e motornan hibrido di autonan na 2027 y 2028, FIA a anuncia diaranson.
Reglanan tecnico nobo a transforma e autonan radicalmente e temporada aki, cu motornan cu ta casi mita electrico, exigiendo un maneho significativo di energia cu no ta bin naturalmente pa e pilotonan.
E autonan nobo aki a haya critica casi universal den e paddock, cu cuatro biaha campeon mundial Max Verstappen describiendo e autonan di 2026 como “Formula E riba steroidenan” y insinuando cu e por laga Formula One atras si e situacion no cambia.
“E acuerdo ta sigui discusionnan cu a tuma lugar desde e prome caredanan di e temporada 2026, despues di preocupacionnan identifica tocante maneho di energia bao di e structura nobo di unidadnan di poder,” un comunicado a bisa.
“E cambionan proponi tin como meta aborda problematica relaciona cu maneho di energia y caracteristicanan di fluho di energia di combustible, y haci clasificacionnan mas rapido sin afecta e caredanan positivo y emocionante cu e reglanan nobo a genera.”
FIA a revela cu e proporcion entre e componentenan di combustion y electrico di e motor, actualmente 53 porciento pa 47 porciento, lo subi pa 58-42 na 2027 y despues pa 60-40 na 2028.
“E pakete ta inclui modificacionnan dirigi na produccion di e motor di combustion interno, fluho di energia di combustible y uso di e sistema di recuperacion di energia, hunto cu mas flexibilidad den maneho di energia,” e federacion a agrega.
Cambionan den maneho di energia — cual a haya hopi critica di banda di e conductornan — ya a ser introduci desde Grand Prix di Miami na comienso di mei pa limita e cantidad di energia recupera durante clasificacionnan.
