Parti 2

E plan di Burubundu ta trece dilanti hopi preguntanan y preocupacionnan. E plan actual lo trece alivio pa nos crisis di acceso na vivienda, of lo haci mas daño cu bon?

Respuesta di comunidad riba parti 1:

Un gran parti di esnan cu a reacciona ta contra elimina e ultimo pida mondi di Pos Chikito. Ta remarca cu tin hopi abandono, anto dicon no ta desaroya esaki prome? Na otro banda algun hende ta comparti e sentimento, cu mester kita poco mondi, pa hende tin cas.

Tin necesidad urgente di acceso na vivienda pa local, esaki ta e solucion?

Ora un architect traha un diseño, e tin un cierto responsabilidad, y ta pone su nomber tras esaki, pa bon y pa malo. E ta duel mi pa recorda pueblo cu e plan aki ta un concept, y no tin autor. E no ta cla pa considera pa aprobacion.

Na final di analisis, ta toca e tema cu optimismo: Ta posibel pa desaroya den un manera cu ta satisface demanda y mantene naturaleza?

Continuacion di Analisis, Tres Riesgonan Critico:

Un menasa pa natuurgebied. Awa sushi lo stagna: “Afvalwaterafvoer en -verwerking wordt uitgewerkt in de technishe ontwerpen. De keuze […] wordt nader bestudeerd.”

Dicon no tin Technishe Ontwerpen? Esaki ta un Stedenbouwkundig Plan? Riool mester ta parti integral di e vision. Ta un bon idea pa planifica un sistema di Riool hunto cu AWSS, pero e plan no ta mustra consideracion pa esaki. Cu Aruba su Track Record, si no planifica esaki awor, e no ta bay tuma lugar.

-Esaki ta trece cune e riesgo, cu awa sushi lo ser tira na Spaans Lagoen.

-Ta bin melding di dump ilegal di awa sushi den hopi bario caba.

-Septic Tanks ta sali hopi mas caro cu Riool den termino corto y largo. Laga AWSS ehecuta su funcion .

Un fasering indefini, e proyecto lo stagna:

“Ontwikkeling […] zal conform een uitvoeringsplan en gefaseerd gebeuren […]. De deelgebieden kunnen elk als een fase worden uitgevoerd maar kunnen ook verder worden onderverdeeld in deelfases”

-Den promer lugar tur e riesgo ta cay riba e desaroyador y doño di cas.

Gobierno ta “yuda” door di otorga tereno, pero e tereno ta uno hopi dificil pa desaroya.

-E falta di un uitvoeringsplan defini, ta duna espacio pa e proyecto tarda decadas.

No ta husto pa argumenta cu e model expansivo cu a faya antes lo trece alivio awor. Caribbean Town a bin cu promesa di trece alivio, a base di e model aki. Te dia di awe Caribbean Town no tin residente. Tuma nota cu e plan tin un “copy-paste Caribbean Town” .

“deelgebieden, onderverdeeld, fasering, gefaseerd, verder onderverdeeld, deelfases”

E Fasering ta simplemente duna espacio pa abuso, y no lo trece un alivio inmediato di 850 cas pa pueblo. E model aki ta invita abusadornan pa specula riba prijs di propiedad.

Lo ta mihor pa parti e gebied den deelgebieden of projectpercelen grandi – cu un volgorde di desaroyo pa FCCA manera solo desaroyador ehecuta. Por stimula inversion di Pensioensfondsen den FCCA cu un proyecto bon planifica cu lo rindi y tin menos riesgo.

Imagina cu abo mester paga bo hypotheek, mientras bo no tin un cas, paso di un proyecto fracasa.

Trafico pariba di brug lo stagna:

Conductornan pariba di brug lo experiencia trafico tranca, tur dia cu bay trabou, nos ta bay perde mas tempo. Hende lo haya mas mal beis paso un por scapa di e trafico.

Nos di pariba di brug sa cu Pos Chikito tin basta trafico caba. Esaki lo causa un fila te Savaneta y Cura Cabai.

-Ken lo ta responsabel, ora cu nos tur ta paga cu tempo y gasolin? Gasolin ta caro.

-ora cu paso di trafico, un ambulance no ta yega Hospital na ora, y hende ta muri?

-Infrastructura inadecuado ta choca un economia. Miles di trahador lo sufri.

Ultimo preguntanan:

-Comunidad a ser bon informa di e proyecto y su impactonan?

-Comunidad a ser envolvi?

For di mi entrevistanan cu bisiñanan, nan no a wordo informa, ni si esaki lo afecta nan propiedad directamente.

-Pakico no a planifica mihor fluho di trafico conhuntamente cu DOW?

-Organizacionnan concerni a wordo envolvi? AWSS, DNM, FCCA?

-Bo por Imagina bo, bo ta pega den trafico, Ta hole stinki y bo no por scapa. Y e lanschap bunita cu bo tabata stima, a bira un otro proyecto fracasa.

Conclusion di Analisis – expresa bo opinion tocante Burubundu!

Den mi consenshi, e plan existente no ta considera e habitante, trafico, naturaleza, landschap, tereno dificil pa desaroya, y riesgonan manera stagnacion di desaroyo, y contaminacion di awa sushi. Un punto cu otronan a trece dilanti ta seguridad.

E Toelichting ta menciona algun bunita idea pero esaki no a wordo duna forma den e mapa.

Mi a yega na e conclusion cu e plan di Burubundu lo causa mas problema cu solucion.

Pais Aruba no ta cla pa ehecuta e plan aki, y si no ta cla, no haci’e. Aruba merece mihor.

Nos ta un pais chikito cu poco tereno, mester maneha loke nos tin, cu enfoke riba calidad.

Por fabor comparti bo opinion tocante e proyecto via e encuesta aki. https://forms.gle/xtWDtvt5FibCtpEb6

Nos ta consciente di e Riesgonan. Awor ban Considera Optimismo y Oportunidadnan:

Ta posibel pa desaroya den un manera cu ta satisface demanda y mantene naturaleza?

Keda pendiente di Parti 3.