Mayoria contenido tocante sunscreen riba TikTok ta corecto, pero net e mal informacion ta bay viral

(NBCNews) – Video tocante sunscreen ta tur caminda riba e red social TikTok – pero esunnan cu ta bay viral ta esunnan yen di informacion incorecto, segun un estudio publica den weekend den e journal PLOS Digital Health a descubri.

Investigadornan di universidad di Alberta na Canada a analisa video di TikTok cu e cantidad mas halto di views den e cinco hashtag mas popular relaciona cu sunscreen – e cremanan cu ta usa pa blokea e efectonan dañino di solo. A pesar cu e gran mayoria – 87 porciento di e casi mil video – tabata promove uso di sunscreen, e videonan cu e nivelnan mas halto di atencion y reaccion (conoci como “engagement”) tabata esunnan cu tabata contene informacion falso.

E mal informacion aki tabata varia di “kima di solo no ta peligroso” te declaracionnan cu sunscreen ta toxico, segun autor lider di e estudio, Alessandro Macron, un investigador di universidad di Alberta cu ta studia con informacion di salud ta plama den medionan di comunicacion.

“Tabatin mencion specifico cu sunscreen tin potencial pa interumpi hormoon, cu tabata causa cancer, contene carcinogeno, cu e por daña lechi di pecho of contene microplastico,” Macron a bisa.

Dr. Anthony Rossi, un dermatologo na Memorial Sloan Kettering Cancer Center na New York, a bisa: “Mi a pasa un bon cantidad di tempo den mi consulta pa papia tocante kico realmente ta e berdad: con sunscreen realmente ta yuda y con usa sunscreen no ta bay causa cancer di cuero of pone bo bira deficiente den vitamina D.”

Rossi, kende no tabata involucra den e investigacion, a bisa cu sunscreen causando deficiencia di vitamina D ta un narativa cu ta rampante riba rednan social. “Tin cantidad di estudio cu ta mustra cu hasta cu uso regular diario di sunscreen, bo no ta desaroya un deficiencia di vitamina D,” el a bisa.

Segun e estudio nobo, hopi mal informacion tocante sunscreen ta enfoca riba e asina-yama sunscreen kimico, cu ta usa filter kimico pa absorbe rayonan ultravioleta dañino. Sunsecreen mineral, di otro banda, ta usa filter basa riba mineral, sea titanium dioxide of zinc dioxide, pa blokea e dayonan dañino di Solo.

“Actualmente no tin ningun indicacion cientifico cu ningun ingrediente usa ampliamente den sunscreen ‘kimico’ (e.g. oxybenzone) ta dañino pa salud di un persona,” e investigadornan a skirbi den e estudio.

Dr. Molly Hales, dermatologo y investigador na Universidad di Chicago, a bisa cu “ingrediente di tanto sunscreen kimico como mineral ta monitoria y regula pa FDA, loke ta nifica cu nan ta pasa perfilacion riguroso di seguridad, testing di seguridad prome cu ta permiti nan pa ser bendi, maske nan ta producto cu por cumpra sin receta.”

Macron a bisa cu e ta compronde e preocupacion tocante microplastic, cu ta omnipresente den bida diario.

Sinembargo, el a bisa cu no tin indicacion cu sunscreen ta expone hende na nivelnan mas halto cu otro fuentenan.

E estudio siman pasa no ta e prome indicacion cu rednan social por ta afectando e opinion di hende tocante sunscreen y seguridad den solo.

E aña aki, un tercer parti di participante Gen Z a ricibi un cijfer onvoldoende den e encuesta anual di seguridad di solo di Academia Mericano di Dermatologia. E encuesta ta atribui e falta di conocemento aki na rednan social: 36 porciento di Gen Z encuestado a bisa cu nan ta mira influencer como nan fuente principal di informacion tocante cuido di cuero, hasta mientras 64 porciento a bisa cu nan a haya mal informacion tocante sunscreen online.

“Mi lo bisa cu 95 porciento di e mal informacion nos por atribui na rednan social,” segun Dr. Marisa Garshick, un dermatologo na MDCS Dermatology na New York y un AAD fellow. “Sea ta directamente pasobra hende ta mira hende papia tocante problema cu sunscreen, of indirectamente unda ta e influencer faborito di un persona ta mustra cu nan a drumi den solo pa tres ora” y nan cuero a bira bruin.

E ramificacion ta cla: cancer di cuero ta aumentando globalmente.

Garshick a bisa cu e ta mira mas diagnostico di cancer di cuero basal y squamous cel den su pashentnan jong. Esaki ta “djis un señal di e hecho cu algun di e daño di solo ey cu ta afectando nos realmente si ta cuminsa ora nos ta mucha,” el a bisa. “Mi ta kere esey ta loke ta haci e situacion aki di rednan social asina preocupante, pasobra aki ta unda hopi di e adolescentenan aki ta haya nan informacion.”

Hales a bisa cu hopi biaha, e tin pashent nobo cu no ta realisa cu sunscreen ta necesario tur dia.

“Mi lo bisa un cantidad grandi di pashent nobo cu ta bin cerca mi pa nan prome chekeo di cancer di cuero ta sorprendi di tende cu nos ta recomenda pa aplica sunscreen tur dia, incluyendo ora bo no tin plan pa talbes ta pafo na un wega di baseball of un caminata of otro actividad pafo,” el a bisa.

Garshick a bisa cu e ta curasha hende pa haya e sunscreen cu ta traha miho pa nan, sea ta un producto kimico of uno mineral. Opcionnan expandi di sunscreen ta bay drenta mercado Mericano pronto, cu e aprobacion recien di FDA di e filter di UV popular globalmente, bemotrizinol.

“E miho sunscreen ta esun cu bo ta bay usa,” el a bisa.

Macron, autor di e estudio, a urgi usuarionan di rednan social pa tene cautela ora ta trata di ricibi informacion di salud for di e plataformanan aki.

“Ora un persona tin un mensahe cu ta relaciona directamente na un producto cu nan ta bende, bo mester ta extremadamente cauteloso tocante kico e mensahe ey ta,” el a bisa. “Audiencianan mester tin sospecho di e contenido cu ta pone nan sinti emocionnan extremo, specialmente miedo, y contenido relaciona cu salud ta parce di promove sea ideanan marginal of agendanan politico specifico, en bes di un consenso comparti di hallazgo cientifico.”