Wardacosta di Caribe Hulandes a ricibi un yamada diasabra marduga (26 di september) cu informacion di cierto movecion straño den bisindario di refineria. Na e mes un momento, tabatin un unidad di Metal Shark patruyando riba lama.
Personal di Centro Maritimo Operacional di Wardacosta a pidi e Metal Shark pa dirigi nan mes den direccion di refineria. Simultaneamente a pidi personal di un di e avionnan di Wardacosta pa asistencia.
E avion tipo Dash-8 a logra di localisa dos persona y a informa miembronan di Wardacosta riba boto pa asina nan por bay investiga. Na momento cu nan a yega cerca, a logra di detene un di nan y otro a huy. E personanan tabata hortando diferente pipa di koper. A entrega e persona cu a logra detene na personal di KPA cu lo continua cu e caso.
Di parti di Wardacosta nos ke bisa danki na comunidad pa informa nos. Na momento cu tin un emergencia riba lama of algun tipo di movecion straño, djis tuma contacto cu nos via di 913.
