(AFP) – Colombianonan a cuminsa vota den un di dos ronda di eleccion presidencial riba diadomingo, scogiendo entre un abogado di derecha respalda pa Cas Blanco y un senador iskierdista pa dicidi destino di un proceso di paz cu ta tambalia e relacionnan tenso cu Washington.
41 miyon votador lo kies entre e faborito Abelardo de la Espriella y su rival iskierdista Ivan Cepeda — e ultimo den un serie di eleccion Latinoamericano sumamente polarisa.
Asuntonan di seguridad a domina un campaña marca pa atakenan cu bom di guerilla y asesinato di un candidato presidencial conservativo prominente.
“Mi mester bisa, tin cierto miedo,” Alex Vizcaino, di 59 aña, a conta AFP mientras e tabata vota den Baranquilla. “Ta e prome eleccion unda bo ta sinti e tiki miedo aki.”
“Tin hopi fanatico. Bo ta mira hopi violencia,” el a bisa. “Mi ta kere cu speransa di tur hende, sin importa color politico, ta cu cosnan lo cambia.”
De la Espriella, un nacional doble Mericano-Colombiano cu ta yama su mes “E Tiger,” a gana e prome buelta di mei primintiendo cu lo haci guera contra gruponan guerilla cu ta trafica droga y cu a nenga firma un acuerdo di paz na 2016.
El a gana “respaldo completo y total” di presidente Donald Trump y ta spera di subi riba un ola di derecha cu a trece candidatonan di derecha na poder na Bolivia, Chile, Costa Rica, Ecuador y Honduras.
For di tras di glas contra bala y cu un saludo militar, el a mobilisa sosten cu e grito “para firme pa patria!”
El a conta AFP cu si e ser eligi, e kier sosten di Merca pa un campaña di 90 dia di atakenan aereo contra gruponan arma cu ta produci coca, e materia prima di cocaina.
E ta defende e derecho di carga arma, construccion di mega-prizonnan, fracking, reduci tamaño di estado, y a bisa cu lo ta “ideal” pa haci economia di Colombia uno di dollar.
Cepeda ta un filosofo cu a bira senador y defensor di derechonan humano di 63 aña, y a ta un figura clave tras di politica di e gobierno actual pa negocia “paz total” cu gruponan arma.
E ta yiu di un senador comunista mata pa paramilitarnan di derecha y e heredero politico di presidente saliente Gustavo Petro — kende ta prohibi constitucionalmente di postula. Criticonan ta bisa cu gobierno iskierdista di Petro a permiti gruponan arma bira mas rico for di trafico, expande nan teritorio y gana poder.
Cepeda a conta AFP recientemente cu e lo “haci balans” di combersacionnan di paz y “haci e cambionan necesario.” Durante hopi tempo el a prefera dialogo riba un acercamento di seguridad cu man di hero.
Sosten di Cepeda ta bin principalmente for di progresistanan y pobernan — kende a beneficia for di un reduccion den pobresa, salarionan mas halto y desempleo mas abao den loke ainda ta un di e paisnan mas desigual den mundo.
E prome buelta di votacion a mustra un collapse total di centro politico di Colombia y di e derecha tradicional, cu a goberna e pais durante gran parti di e ultimo dos siglo.
Durante e votacion ey, De la Espriella a haya 44 porciento di e voto, contra 41 porciento pa Cepeda, sin cu ningun di nan haya e mayoria necesario pa evita e segundo ronda cu a tuma luga ayera.
Na final, cu solamente algun urna faltando pa reporta, Abelardo de la Espriella tabatin 49.65% di votonan – un bentaha grandi riba e Senador, ken tabatin 48.70%.
E victoria aki ta hopi probable di mehora e relacionnan tenso cu Washington y ta extende un ola di candidato derechista cu a cuminsa tuma poder na Latino America.
“Awe Colombia a gana su wega mas importante,” e presidente electo a bisa den un serie di publicacion riba rednan social, agregando cu el a papia cu Presidente Mericano Donald Trump ken a felicit’e. “Nos ta gradici Dios pa e milagro aki cu a tuma luga,” De la Espriella a bisa.
Su oponente, Ivan Cepeda, a bisa sostenedornan cu e lo warda te ora cu tur voto ta conta. “Na momento cu a completa e conteo y e resultado final ta conoci, y e evaluacionnan correspondiente a keda ehecuta, nos lo reconoce e resultado oficial,” el a bisa.
