(AFP)—Curpa di cantante y compositor Mericano Oliver Tree a ser debolbi na California, cu un publicacion riba su cuenta di Instagram bisando cu “finalmente e por descansa”.
Tree y cinco otro persona a perde nan bida den un accidente di helicopter riba Rio de Janeiro siman pasa, ora el a dal den otro helicopter.
E publicacion riba red social tambe a bisa cu su famia lo honra su “ultimo deseo” door di establece un fundacion benefico na su nomber.
“Esaki ta algo cu Oliver a organisa prome cu su fayecimento, y a skirbie den su testamento. Nos lo sigura cu su deseo bira realidad pa asina mas alegria, amor y arte por ser comparti na mundo. Esaki tabata su ultimo deseo,” e declaracion tambe a bisa.
E fundacion lo yama Dr. Oliver Tree’s Extremely Epic Grant For Baby Geniuses. E resto di e publicacion a gradici fanaticonan pa nan “amor constante, apoyo y positividad” mustra na famia y amigonan di e musico y personalidad di red social durante “e momento dificil aki”.
“Nos ta stima boso hopi. Oliver lo tabata hopi orguyoso di cada un di su simpatisantenan, amigonan y famia. Paz sea cu Oliver,” e publicacion a agrega.
Tree — naci como Oliver Tree Nickell na Santa Cruz, California, na 1993 — a bira famoso na 2016 despues cu el a bira viral riba red social.
Cu su peinado caracteristico tipo bowl cut, e tabata conoci pa hitnan manera Life Goes On, Miss You y Alien Boy.
Tree, cu a fayece na edad di 32 aña, apenas a cuminsa un gira mundial. Su ultimo presentacion tabata na São Paulo, Brasil, riba 6 di juni. Su siguiente concierto tabata programa pa 1 di juli na Lisboa, Portugal, y e tambe tabata programa pa presenta na Glasgow, Manchester y Londres durante september.
Potret di AFP.
