Representacion Caribense den registro di donacion di stamcel no por warda

Ora diagnostica un pashent cu leukemia, cancer den sanger of sikkelcelziekte, transplante di stamcel por ta nan miho, of den cierto caso unico, opcion di tratamento. E procedura ta reemplasa un pashent su sistema inmunologico malo cu stamcel saludable for di un donante compatible.

Sinembargo pa pashentnan den Caribe, e donante ta menos probable di existi compara cu algun parti di Europa. E ta un diferencia cu no ta basa riba coincidencia sino representacion, y esaki ta cobrando bida.

E realidad aki ta loke na final a impulsa e lansamento di Matchis Caribbean, cual ta un iniciativa cu tin e meta pa significantemente expande e cantidad di donante di stamcel den e region y mehora e probabilidad cu pashentnan di antecedente Caribense por haya un match cu lo salba nan bida.

Hospital di Aruba tambe a brinda sosten na e iniciativa, enfatisando cu cuido di salud no solamente ta duna tratamento na un malesa sino tambe crea miho chens pa e pashentnan y conecta comunidadnan cu un meta comparti.

Prome cu nos por reconoce cu e problema, nos mester compronde e ciencia tras di esaki. Compatibilidad entre un pashent y e donante ta determina pa un set di proteina yama Humaan leukocytenantigeen of HLA. E antigennan aki ta hereda for di ancestronan, y e miho chens di haya un match perfecto di HLA ta ora cu e dos persona ta comparti e mesun background etnico – pa motibo cu ora un poblacion ta casa cu otro dentro di e mesun grupo durante varios generacion, e mutacionnan natural di HLA ta keda dentro di e grupo aki.

Caribe su historia ancestral, cual ta un mescla di herencia Indigena, Africano y Europeo acumula durante siglonan di migracion, ta produci un perfil di HLA cu ta ambos compleho y unico. Investigacion publica den Frontiers in Genetics a confirma cu poblacionnan den Caribe ta posee perfil di HLA cu ta geneticamente distinto, cu separacion genetico cla di otro gruponan, cual ta haci localisacion di un match mas dificil hasta ora cu tin miyones di donante registra na nivel global. Segun e programa National Marrow Donor Program, mas di 41 miyon posible donante ta accesible via su red internacional, sinembargo un gran mayoria ta refleha herencia genetico solamente di Europa occidental.

E falta di balans aki ta traduci na un desbentaha grandi cu ta menasa bida di esnan cu tin otro herencia genetico. Pashentnan tin un chens di 80% di haya un match perfecto den un gran cantidad di registro di donante global. Pa esnan Hispano of Latino, esaki ta cay te na bao di 50%.

Pa e pashentnan di color scur, esaki ta bay te bao di 30%. Pa loke ta trata pashentnan Afro-Caribense specificamente, e chens por ta solamente 17 pa 20%. Cu alrededor di 75% di pashentnan sin posibilidad di haya un donante dentro di nan mesun famia, e registro global ta nan unico opcion. Pa pashentnan cu ta den Caribe, e opcion aki tin un limitacion severo.

Investigacion publica a haya cu donantenan cu ta minoria cu registra ta retira tambe na tasanan significantemente mas halto compara cu donantenan Europeo, pa motibo cu tin dificultad pa bolbe haya contacto cu nan of falta di confiansa medico cu ta keda persisti. Esaki ta nifica cu e falta di representacion cu ta mira den e cantidad di registracion ta hopi mas grave den practica.

Segun Stichting Matchis, registracion como un donante di stamcel ta rekeri un poco mas cu un formulario chikito y muestra cu ta colecta for di den bo boca. Donantenan ta inclui den un base di dato na cual centronan di transplante na nivel mundial tin acceso. Si identifica un match, e proceso di donacion ta completamente guia pa e organisacion, incluyendo un evaluacion medico mas profundo, aunke durante e etapa aki posiblemente ta haya cu bo no ta adecua pa haci e donacion, e donantenan ta keda cu e derecho di por cambia di decision durante cualkier etapa.

Mester menciona si cu usualmente ta duna prioridad na donantenan di entre 18 pa 35 aña, mirando cu stamcel mas hoben consistentemente ta duna e miho resultadonan ora di haci un transplante, aunke e edad maximo ta 55 aña. For di 56 aña en adelante, ta kita e donantenan automaticamente for di e registro pa motibo cu e calidad di e stamcel ta baha notablemente despues di edad aki, mientras cu e riesgonan asocia cu donacion di stamcel ta aumenta.

Loke ta tristo ta cu e iniciativanan aki, aunke nan ta brinda un gran sosten y ta haci un gran trabao den atende cu e falta di representacion, ta solamente un gran comienso, mas no e solucion. Autoridad y ministerionan di salud den henter Caribe Hulandes mester trata diversificacion di e registro di donante como un prioridad formal pa salud publico, cu financiamento dedica na e iniciativanan aki y campañanan andando. Hospitalnan den henter e region mester por sigui e ehempel cu Aruba ta liderando via Horacio Oduber Hospital, pa medio di bira puntonan di registro permanente – no solamente pa un siman, sino como parti di un programa preventivo di salud.

Universidad y scol secundario ta puntonan util pa yega na e grupo di 18 pa 35 aña cu ta esnan mas necesario. Hinca registracion como donante den curriculum di educacion di salud y programanan di bienestar por genera resultadonan sosteni en bes di aumentonan isola.

Mester tin un union mas amplio entre institucionnan religioso, organisacionnan di comunidad y medionan local pa yuda atende e barera mas persistente den registracion di minoria, cu ta falta di confiansa medico. Pa por atende esaki, autoridad y ministerionan mester traha riba scucha y atende e preocupacionnan di pueblo pa cu e sistema di salud, y mehora esaki adecuadamente. Tin varios preocupacion, situacion y problema medico cu ta keda sin atencion di autoridadnan concerni, y esaki ta keda aumenta e falta di confiansa, cual na final di dia ta plama consecuencia na un rango amplio di area medico.

Por trata y te hasta cura mas di 75 malesa cu un transplante di stamcel. Sinembargo e ciencia aki ta funciona solamente si por haya un donante compatible. Pa pashentnan den Caribe, e registro actual ta haci esaki hopi mas dificil di loke e mester ta. Cada registracion nobo ta cambia e probabilidadnan aki y ta pon’e cana den un direccion cu por marca e diferencia entre un bida cu ta caba prome cu tempo y un bida cu ta sigui.

E iniciativa a yega y institucionnan a cuminsa alinea y traha riba esaki. Ta keda na nos como comunidad y gobiernonan den Caribe trata e falta di representacion aki como un responsabilidad comparti, no como un problema medico cu ta leu di nos.