Ombudsman di Aruba, Jurima Bryson, a manda un carta di preocupacion na minister di Relacionnan den Reino, Enseñansa, Hubentud, Innovacion y Deporte, Gerlien Croes, den cual e ta yama atencion pa e manera con resultadonan di examen den enseñansa secundario ta ser anuncia. Segun Ombudsman, e practica actual na algun scol por trece consecuencia pa privacidad, dignidad y bienestar psicosocial di alumnonan, specialmente esnan cu ainda ta menor di edad.
E carta, fecha 17 di juni 2026, ta basa riba diferente señal cu Oficina di Ombudsman a ricibi for di comunidad. E señalnan ta relaciona cu e manera cu scolnan ta anuncia resultado di examen final. Segun Ombudsman, cada aña mayoria scol secundario rond Aruba ta organisa diferente forma y hopi biaha creativo pa revela resultado di examen. Durante e celebracionnan aki, no solamente alumnonan cu a slaag ta bira centro di atencion, pero famia, amistad, medionan di comunicacion y publico general tambe ta participa.
Mientras cu e celebracionnan aki ta cumpli un rol cultural y social importante y ta contribui na reconoce y celebra un logro academico importante, Ombudsman ta indica cu cada biaha mas pregunta ta surgi tocante e efecto cu e practicanan aki por tin riba alumno cu no a slaag of cu ainda ta den incertidumbre tocante nan resultado. Segun e carta, diferente persona afecta a expresa cu nan a experimenta consecuencia negativo pa motibo di e forma den cual resultado a ser anuncia.
Den e carta di preocupacion Ombudsman a enfatisa cu un gran parti di e candidatonan di examen ta menor di edad. P’esey, el a subraya, mester pone atencion special na disposicionnan di Convencion Internacional tocante e Derechonan di Mucha. E carta ta referi na diferente articulo di e convencion cu ta trata e interes superior di mucha, proteccion di bida priva y respet pa dignidad humano.
Ombudsman ta argumenta cu e forma publico di anuncia resultado, den cual alumno cu no a slaag por ser identifica, ta dificilmente compatible cu e normanan internacional di derechonan di mucha. Segun e carta, tradicion cultural y celebracion no por bay na costo di derechonan y interes di mucha. Proteccion di privacidad, dignidad y bienestar mester ta na prome lugar.
Como ilustracion di e problematica, Ombudsman ta describi un caso concreto cu el a presencia personalmente. E anuncio di resultado a tuma lugar na un stadion di baseball, unda tur candidato di examen mester a tuma asiento den e dugout. Alumno cu a slaag a ser yama un pa un pa saca un bala for di un baki y tira esaki. Di e manera ey tabata claramente visibel ken a logra slaag.
Segun cu e ceremonia a progresa y cantidad di balanan disponible a bira menos, tabata cada bes mas evidente cual alumno ainda no tabata ser yama. Ora cu finalmente no tabatin mas bala disponible, tabata cla pa henter publico cua candidato a keda atras y, consecuentemente, no a slaag.
Segun Ombudsman, e situacion aki tabatin un impacto emocional considerable. Alumno cu no a logra slaag a ser confronta publicamente cu nan resultado den presencia di famia, amistad y otro personanan presente. E carta ta señala cu e experiencia aki por tin hopi carga emocionalmente, no solamente pa e alumno mes, pero tambe pa su circulo directo y pa otro persona presente. E situacion ta ser describi manera algo impactante y cu por resulta traumatico.
Ademas, atencion ta ser poni riba e posicion di alumno cu ainda ta den incertidumbre durante eventonan di e tipo aki. Segun Ombudsman, forma publico y visibel di anuncia resultado por aumenta sentimento di nervio, miedo y vulnerabilidad. E manera cu resultado ta ser comunica por haci cu alumno no ta haya e noticia den un ambiente personal y protegi, a pesar cu e resultado tin gran importancia den nan bida.
Aunke Ombudsman ta reconoce cu scolnan generalmente ta organisa e celebracionnan aki cu bon intencion, e ta opina cu interes di alumno cu no a slaag no semper ta ricibi suficiente consideracion. Como resultado, algun alumno por bira identificabel como candidato cu no a slaag, algun biaha den presencia di un grupo grandi di mayor, famia, compañero di scol y otro persona. Segun Ombudsman, esaki ta dificilmente compatible cu e cuido y trato respetuoso cu institucionnan educativo mester brinda na alumno menor di edad.
E carta ta subraya tambe cu scolnan tin responsabilidad, basa riba legislacion nacional, principio di bon gobernacion y obligacionnan internacional, pa proteha activamente privacidad y interes di alumno. Segun Ombudsman, esaki ta particularmente importante durante anuncio di resultado di examen, pasobra e resultado tin un significado personal y emocional grandi pa e hobennan involucra.
P’esey, Ombudsman ta propone un otro enfoke pa e proceso di anuncia resultado. Segun e carta, e punto di salida mester ta cu resultado di examen ta ser comunica prome personalmente y confidencialmente na e alumno concerni. Solamente despues cu e alumno a ricibi y procesa su resultado, por evalua si y con ta apropia pa haci un anuncio mas amplio. Segun Ombudsman, un manera di traha asina ta brinda miho garantia pa proteccion di privacidad y dignidad humano.
Na mesun momento, Ombudsman ta expresa aprecio pa scolnan cu ya ta sigui un practica parecido. Den e carta ta menciona cu tin scolnan cu ta comunica resultado di examen individualmente y den confidencialidad cu alumno y nan mayor of representante legal prome cu cualkier celebracion publico. Esaki ta ser haci, por ehempel, via telefon of durante un combersacion personal.
Segun Ombudsman, e forma di traha aki ta mustra cu e scolnan concerni ta consciente di e posible impacto di un anuncio publico y cu nan ta pone e interes di mucha central. Door di informa alumno den privacidad y trankilidad prome, e ta evita cu nan ta ser expone publicamente durante un momento vulnerable. Segun e carta, esaki ta contribui directamente na proteccion di nan dignidad, privacidad y bienestar psicosocial.
Ombudsman ta considera e practica aki manera un bon ehempel cu merece pa ser sigui y cu por sirbi manera base pa desaroyo di maneho nacional den futuro tocante e asunto.
Ademas di e aspecto relaciona cu derechonan di mucha, Ombudsman ta referi tambe na varios norma di gobernacion adecua cu, segun e, por ser afecta pa e practica actual. Entre nan tin respet pa bida priva, diligencia, proporcionalidad y trato husto. Segun e carta, celebra exito academico no por resulta den alumno cu no a slaag bira identificabel directa- of indirectamente. Por spera cu scolnan ta tene cuenta cu e posicion vulnerabel den cual algun studiante ta haya nan mes na momento di e resultadonan.
Cu e contexto aki presente, Ombudsman ta haci yamado na gobierno pa reevalua e practica actual y pa desaroya directivanan cla tocante anuncio di resultado di examen. Segun e carta, privacidad, dignidad humano y e interes superior di mucha mester forma e base di cualkier politica den futuro.
E carta ta inclui diferente recomendacion pa minister di Enseñansa. Entre otro, Ombudsman ta propone pa crea un marco uniforme di maneho aplicabel na tur scol. E ta recomenda tambe pa resultado di examen semper ser comunica prome individualmente y confidencialmente na alumno y nan mayor of representante legal. Ademas, e ta sugeri pa implementa medidanan cu ta evita cu alumnonan por ser reconoci como persona cu no a slaag y pa garantisa cu participacion den celebracionnan publico ta boluntario.
Otro recomendacion ta cu alumno y mayor mester ser informa claramente y completamente tocante e manera di anuncio y e opcionnan disponible prome cu e anuncio tuma lugar. Finalmente, Ombudsman ta propone desaroya un protocol y mecanismo di supervision hunto cu directivanan di scol y Inspeccion di Enseñansa, mientras cu simultaneamente ta promove conscientisacion tocante privacidad, derechonan di mucha y impacto psicosocial di anuncionan publico.
Den su observacion final, Ombudsman ta enfatisa cu celebra exito di examen no por ser haci na costo di derechonan y dignidad di alumno. Segun e carta, un practica cu por conduci na exclusion, berguensa of daño emocional no ta den interes di mucha. P’esey, derechonan y interes di alumno mester forma e norma principal durante e proceso di comunica resultado di examen den enseñansa.
