(AFP) – Presidente electo di Colombia, e derechista Abelardo de la Espriella, diahuebs a duna e gruponan guerrillero di e pais un luna pa entrega, asumiendo un posicion duro tocante un asunto cu a yuda impuls’e na victoria.
De la Espriella a gana eleccion presidencial diadomingo cu menos di un punto porcentual mientras Colombia ta sufri si nivelnan mas halto di violencia den un decada.
“Na tur esnan actuando pafo di ley, boso tin un luna pa regla boso sumision,” e abogado miyonario a bisa den su prome discurso desde cu resultadonan oficial a confirma su victoria electoral. “Den mi administracion, no ta bay tin oferta generoso ni concesionnan inaceptable manera esunnan cu boso a ricibi di e regimen cu awo ta yegando su fin,” el a agrega, haciendo referencia na e administracion saliente cu tabata faborece dialogo cu gruponan arma.
Durante campaña, e presidente electo a bisa AFP cu e tabata kier ehecuta campañanan di bombardeo contra guerrillanan y construi “mega-prison” manera esunnan di presidente Salvadoreño, Nayib Bukele.
Victoria di De la Espriella, 47, ta marca e fin di e prome gobierno iskierdista den historia di Colombia, lidera pa presidente Gustavo Petro.
E presidente electo antes a haci un yamado pa “desmantela” iskierda, pero despues a baha tono di su palabranan.
E candidato iskierdista derota, Ivan Cepeda a adverti cu iskierda ta bay resorta na “desobediencia civil pacifico” si ta necesario, mientras a distancia su mes di violencia post-eleccion despues di e resultadonan di diadomingo.
De la Espriella tambe tin plan pa forma un aliansa militar cu Merca y Israel pa logra su metanan. Den un post riba X diaranson, el a bisa cu Colombia y Israel lo comparti un relacion “manera nunca antes” despues di papia cu minister di Exterior Israeli, Gideon Saar.
Den e discurso diahuebs, el a yama su victoria den eleccion un “triunfo epico.”
“El a bin di pueblo, contra e partidonan, contra planificacion politico, y contra establecimento,” el a bisa, agregando cu “mi no ta bay decepciona boso.”
Den un rapport publica diahuebs, Nacionnan Uni a bisa cu cultivo di droga na Colombia, e productor di cocaina mas grandi na mundo, a aumenta cu 3,5 porciento na 2024 compara cu e aña prome. Petro a purba sin exito pa negocia paz cu gruponan criminal, pero expertonan ta bisa cu e guerrillanan a usa e negociacionnan pa crece den forsa.
