Famia di Chania Fernandes-Pedra, e chauffeur di 24 aña responsabel pa e hit and run fatal cu a tuma lugar na comienso di aña y cu a cobra bida di dos persona, a expresa nan preocupacion profundo pa e situacion legal di e acusado. Segun e famia, Fernandes-Pedra lo presenta dilanti hues diabierna 3 di juli pa un audiencia importante sin cu e tin un abogado cu ta represent’e, despues cu peticionnan formal pa un abogado di defensa a keda rechasa.

Segun informacion comparti durante un conferencia di prensa, Fernandes-Pedra a pidi pa ser representa door di abogado Maritza Boyce, ken lo mester a traha hunto cu abogado Hulandes, Yehudi Moszkowicz. Segun nan, abogado Boyce tabata dispuesto pa asumi e defensa, pero pasobra e no ta un specialista den derecho penal y tin hopi aña cu e no ta practica casonan penal regularmente, e tabata considera esencial pa traha den colaboracion cu Moszkowicz.

Sr. Eduardo Mathew a splica cu e peticion pa abogado Moszkowicz forma parti di ekipo di defensa di Fernandes-Pedra a ser presenta formalmente na fiscal y corte, pero finalmente no a keda aproba. Segun e decision, corte a considera cu Boyce por asumi e defensa su so y cu e caso no ta di un complehidad cu ta haci necesario e participacion di un abogado for di Hulanda.

Segun e reglanan vigente na Aruba, un abogado for di Hulanda por participa den un proceso hudicial solamente si e ta actua hunto cu un abogado local. Segun e famia, precisamente esey tabata e formula cu nan a propone pa e defensa di Fernandes-Pedra. No obstante, corte a dicidi cu e colaboracion proponi no tabata necesario.

Despues di e decision, Boyce a indica cu si Moszkowicz no por forma parti di e ekipo di defensa, e no por garantisa e nivel di asistencia legal cu e ta considera necesario pa un caso di e magnitud aki. Door di esey, el a retira su mes completamente for di e defensa.

Segun Mathew, e proceso relaciona cu e peticion legal a dura mas cu un luna. Nan ta bisa cu corte a tuma diferente siman pa delibera riba e peticion y cu e decision final a keda comunica poco prome cu e audiencia programa.

Sin representacion legal

Como consecuencia di retiro di Boyce, Fernandes-Pedra no tin representacion legal na e momentonan aki, loke ta un situacion hopi preocupante pa e famia. Segun Mathew a indica, nan no ta spera cu e caso lo ser trata den contenido, pero si ta bay tin un audiencia.

E famia ta considera cu un audiencia di e naturalesa aki no mester sigui sin cu e acusado tin asistencia legal. Nan ta argumenta cu durante un audiencia, hues por formula preguntanan na e acusado y cu e tin derecho di ricibi conseho di su abogado prome cu e contesta. Segun nan, ausencia di un abogado por afecta e manera cu e proceso ta sigui.

Mathew tambe a splica a indica cu e situacion ta crea preocupacion adicional pasobra Fernandes-Pedra ta deteni na KIA, mientras cu e caso posiblemente lo ser posponi si no logra haya representacion legal.

Mathew a subraya cu e famia ta considera cu e proceso pa haya un abogado a bira mas dificil despues cu corte no a permiti e colaboracion cu abogado Moszkowicz. El a splica cu mirando e situacion, e opcion cu nan mester recuri na dje ta busca un abogado local. El a sigui splica cu loke nan a haci ta cu nan a manda un carta na presidente di Orde van Advocaten Aruba, solicitando pa e carta ser comparti cu tur abogado local cu ta considera cu nan tin e experiencia y capacidad pa asumi un defensa di e nivel cu e caso ta exigi.

Mathew a enfatisa cu e famia no ta buscando simplemente un abogado cu lo tuma e caso pa simplemente cobra e placa, sino un defensa cu, den nan opinion, tin e experiencia necesario pa trata un proceso penal di e importancia aki. Te na momento di e conferencia di prensa, e famia a indica cu ainda no tabatin un solucion definitivo.

Estado emocional delicado

Ademas di e preocupacion legal, e famia ta pone enfasis riba e estado emocional di Fernandes-Pedra. Segun nan, un psicologo cu ta brinda asistencia profesional a evalua su situacion y a expresa preocupacion tocante e condicion emocional den cual e sospechoso ta. Segun famia, e profesional a considera cu e trauma cu Fernandes-Pedra ta experiencia ta severo y cu e circunstancianan actual no ta facilita un proceso terapeutico normal.

E famia tambe a indica cu e psicologo a expresa reserva tocante tratamento den e ambiente di detencion, loke, segun nan, a aumenta nan preocupacion pa bienestar mental di e acusado.

Tarsis Lozano, omo di Fernandes-Pedra, a expresa cu e famia ta considera cu tur acusado tin derecho di scoge su propio abogado y cu e decision pa limita e ekipo di defensa ta laga nan cu preguntanan tocante e proceso. Segun e, nan ta respeta e dolor di e otro famia cu a perde dos ser keri den e accidente, pero na mesun momento nan ta considera cu mester garantisa e derecho di un defensa completo pa tur persona cu ta enfrenta un proceso penal.

Segun Lozano, e famia no ta discuti e gravedad di e accidente ni e consecuencia doloroso pa e victimanan y nan sernan keri, pero ta sostene cu precisamente den un caso di e magnitud aki ta importante cu e proceso hudicial sigui cu tur garantia legal disponible.

Mama di Fernandes-Pedra, Ahira Lozano, tambe a expresa su preocupacion tocante e situacion actual di su yiu. El a splica cu e famia ta pasando door di un periodo hopi dificil desde cu e accidente a sucede y e prioridad principal ta cu e proceso hudicial sigui di un forma husto.

Segun e mama, Fernandes-Pedra no tabatin antecedentenan cu husticia y semper a keda afo di problema. E ta bisa cu e situacion actual tin un impacto emocional profundo riba tur miembro di famia.

El a indica cu su yiu ta hopi afecta pa e impacto di e accidente fatal. Segun nan, e trauma emocional no solamente ta relaciona cu su detencion, pero tambe cu e hecho cu dos persona a perde nan bida den e accidente. Nan ta sostene cu Fernandes-Pedra ta carga cu e peso emocional di loke a pasa y cu e situacion mental ta un punto di preocupacion constante.

E accidente fatal dilanti di Renaissance Mall a provoca un impacto grandi den comunidad y a causa dos morto, Josely Paulina Vasquez Gonzalez (65) y Carlos David Vialez Valerio (54), tur dos di Republica Dominicana.

Diabierna 3 di juli tin un audiencia programa. Segun informacion comparti pa e famia, ainda no ta cla con exactamente e audiencia lo desaroya ni cual decisionnan procesal lo ser tuma. Nan ta spera cu prome cu e caso sigui, Fernandes-Pedra por logra haya representacion legal pa cu su defensa por participa plenamente den tur etapa di e proceso hudicial.

Mientras tanto, e famia a expresa cu nan lo sigui busca posibilidadnan legal pa garantisa cu e acusado por ser representa durante e procedemento penal. Nan ta sostene cu e derecho na un defensa efectivo ta un principio fundamental den un estado di derecho y cu nan ta spera cu e asunto di representacion legal por ser resolvi prome cu e caso drenta den su siguiente fase hudicial.