Aruba ta biba un muestra extraordinario di solidaridad cu e pueblo Venezolano despues di e dos teremoto fuerte cu a sacudi e costa nort di Venezuela dia 24 di juni. Durante e ultimo dianan comunidad y diferente organisacion, empresa y centenares di boluntario a uni nan esfuerso pa reuni alimento, medicamento, awa, producto di higiena y otro articulonan di prome necesidad cu lo ser manda pa e areanan mas gravemente afecta.

Mientras e accion humanitario na Aruba ta sigui crece, e situacion na Venezuela tambe ta sigui empeora. Segun e ultimo cifranan oficial, e cantidad di morto a subi pa 1.719 persona, mientras mas cu 5.000 otro a resulta herida. Autoridad y organisacionnan internacional ta calcula cu miles di persona ainda ta desplasa y cu e buskeda pa sobrevivientenan ta sigui, a pesar cu e posibilidad di encontra mas sobreviviente bao di e edificionan collapse ta bira cada dia mas chikito.

Ademas di e destruccion causa door di e dos teremoto inicial di magnitud 7.2 y 7.5, diferente aftershock a sigui registra durante e ultimo dianan. E replica mas fuerte tabata dialuna, cu a ser sinti na Caracas, La Guaira y diferente otro ciudadnan, obligando brigadanan di rescate pa suspende temporalmente algun operacion mientras nan a evalua e seguridad di e area. Segun autoridadnan, centenares di aftershock ya a ser registra desde e desastre, loke ta sigui complica e trabaonan di rescate y recuperacion.

Na Aruba, e parkeerplaats di Paseo Herencia na Palm Beach a bira un di e centronan di colecta principal pa e accion humanitario. Decenas di boluntario ta traha pa clasifica, paketa y prepara e gran cantidad di donacionnan.

Durante un bishita na e centro di colecta, prome minister Mike Eman a mira di cerca e trabaonan cu ta ser haci pa prepara e cargamentonan cu destino pa Venezuela. Segun e informacion comparti durante e bishita, a logra colecta mas cu 100 palet di ayudo humanitario, y te ainda donacionnan ta sigui drenta.

E accion a cuminsa poco despues di e tragedia, ora un comerciante Venezolano residente na Aruba a reuni pa organisa un campaña di emergencia. Den solamente algun ora, nan a logra mobilisa cliente, amigo, proveedor y diferente miembro di comunidad pa contribui cu donacionnan.

Segun e organisadornan, e respuesta cu nan a ricibi a supera tur expectativa. Nan ta subraya cu e accion no ta limita solamente na comunidad Venezolano, sino cu Arubianonan y residente di hopi diferente nacionalidad tambe a participa activamente.

E donacionnan ta consisti principalmente di alimento cu por keda largo tempo, boter di awa, producto di higiena personal, material pa limpiesa, formula pa baby, pamper, cuminda den bleki y otro articulo cu por ser distribui rapidamente na e famianan afecta.

Gobierno di Aruba a indica cu e informacion cu nan ta ricibi directamente for di e personal medico Arubiano cu ta na Venezuela ta mustra cu remedi ta entre e necesidadnan mas urgente.

Segun e evaluacion riba tereno, hopi hospital y centro medico a keda cu suministro limita, loke ta haci cu remedi, material medico y producto pa trata herida ta hopi necesario.

Ademas di e colecta na Paseo Herencia, e comunidad Chines na Aruba tambe a lansa un accion grandi di solidaridad. Aruba New China Club Cooperative Association a reuni den solamente tres dia un total di 42 palet di mercancia.

Segun representante di e comunidad Chines, e colecta a logra reuni un gran cantidad di apoyo despues cu comerciante, famia y miembronan di e comunidad a contesta inmediatamente na e yamado pa solidaridad. Ademas di mercancia, diferente persona a contribui cu placa of cu trabao boluntario pa prepara e cargamentonan.

Gobierno di Aruba ta coordina cu diferente partner pa facilita e transporte di e donacionnan, incluyendo opcionnan pa transporte maritimo cu ta permiti e gran cantidad di mercancia yega Venezuela den e manera mas eficiente posible.

Mientras tanto, Aruba tambe ta participa directamente den e respuesta medico. Un prome delegacion humanitario di Aruba, cu ta consisti di 11 boluntario, ya ta trahando na Venezuela hunto cu diferente organisacion internacional di asistencia.

Segun e ultimo informacion comparti e ekipo Arubiano a instala un botica di emergencia unda ya a brinda atencion na mas cu 100 pashent durante e prome dia di operacion. Ademas, e boluntarionan a brinda apoyo den e area di triage di un hospital temporal, unda aproximadamente 360 persona a pasa pa ricibi evaluacion y tratamento medico.

E coordinacion di e mision ta sigui den contacto permanente cu Aruba pa informa tocante e progreso di e operacion. A pesar cu diferente aftershock a sigui afecta e region, e ekipo Arubiano a confirma cu tur miembro ta bon y cu e trabao ta sigui desaroya conforme e plan.

Gobierno di Aruba a confirma tambe cu preparacionnan ta avansa pa manda un siguiente grupo di profesionalnan medico, incluyendo medico, ciruhano y otro specialistanan, pa reforsa e capacidad di asistencia den e area di desaster.

Segun organisacionnan internacional, e necesidadnan humanitario na Venezuela ta enorme. Miles di cas a collapse of a keda seriamente daña, mientras hopi famia ta kedando den refugionan temporal of den espacionan habri. Ademas di alimento y awa, tin un necesidad creciente di remedi, material medico, refugio temporal y apoyo psicologico pa e personanan cu a perde famia durante e desaster.

Na Aruba, e diferente centro di colecta ta sigui habri pa ricibi donacionnan. Boluntarionan ta sigui clasifica e mercancia cu ta yega diariamente.

E accion humanitario a demostra un sentimento di solidaridad enorme den comunidad Arubiano. Durante e ultimo dianan, residente di diferente nacionalidad, empresa, organisacion social, grupo comunitario y boluntario individual a uni esfuerso pa brinda apoyo na un pais bisiña cu ta enfrentando un di e desasternan natural mas grandi di su historia reciente.

Gobierno di Aruba a indica cu lo sigui monitor e desaroyo di e crisis y mantene coordinacion cu autoridadnan Venezolano, Cruz Cora y otro partner internacional pa determina con e isla por sigui contribui cu asistencia humanitario den e siguiente fase di recuperacion.