Unidad di Inteligencia Financiero di Aruba (FIU-Aruba) ta bisa cu e perfil general di riesgo pa labamento di placa y crimen financiero a keda en gran parti stabiel durante 2025, pero varios sector ta keda rekeri monitoreo di cerca, pa motibo di nan vulnerabilidad pa abuso.

Den su Rapport Anual 2025, publica recientemente, e agencia ta identifica casino, mercado di real estate y actividadnan emergente di activo virtual como tres di e areanan mas importante cu ta rekeri atencion continuo.

E rapport ta enfatisa cu e consideracion di “riesgo halto” no ta nifica cu tin actividad criminal ta tuma lugar den e sector. Mas bien, e industrianan aki ta posee caracteristicanan cu por haci nan mas atractivo pa labamento di placa of otro crimen financiero, rekeriendo supervision mas fuerte, reportahe y cooperacion entre negoshi y autoridadnan.

Casino ta keda e area di riesgo mas significante

Segun FIU, industria di casino ta keda representa un di e sectornan di riesgo mas importante pa labamento di placa na Aruba pa motibo di su gran volumen di transaccion cash, cantidad grandi di transaccion, y base di consumidor internacional.

E rapport ta nota cu casino a genera e mayor parti – pa un margen grandi – di Rapport di Transaccion Inusual (UTR) entrega na FIU durante 2025. Casino a reporta 33.829 transaccion, loke ta conta pa mas cu mita di tur rapport ricibi durante e aña. Mientras cu esaki ta refleha e obligacionnan significante di reportahe di e sector, tambe ta ilustra pakico casino ta keda un punto principal di enfoke pa esfuersonan di inteligencia financiero.

FIU ta splica cu e caracteristicanan inherente di e sector ta rekeri vigilancia continuo y monitoreo reforsa di transaccion pa sigura cu ta identifica y reporta actividad inusual of potencialmente sospechoso na tempo.

Un asunto subraya den e rapport ta e ausencia continuo di un Autoridad di Wega di Placa na Aruba.

A pesar cu Aruba a adopta su Ley Nacional tocante Wega di Placa na 2021, e Autoridad di Wega di Placa (Gaming Authority) responsable pa licencia, supervision y auditoria comprensivo ainda no ta estableci. FIU ta describi esaki como un gap structural den e marco anti-labamento di placa di e pais.

A pesar di falta di un regulador dedica, casino ta keda suheto na obligacion di reportahe bao di legislacion anti-labamento di placa di Aruba, y FIU ta bisa cu e sector ta keda duna inteligencia valioso tocante actividad financiero y riesgo emergente.

E agencia tambe ta enfatisa cu reportahe di casino ta impulsa en gran parti pa indicadornan obhetivo di reportahe. Esakinan ta transaccionnan cu automaticamente ta genera reportahe pasobra nan ta cumpli cu limitenan legal pre-defini, no pasobra un casino necesariamente ta sospecha conducta criminal.

Mercado creciente di real estate ta crea reto nobo

E rapport tambe ta identifica e sector di real estate, cu ta expandiendo rapidamente na Aruba, como un area importante rekeriendo monitoreo continuo.

Segun FIU, Aruba a experimenta un recuperacion economico fuerte desde pandemia di Covid-19, compaña pa un aumento den actividad di inversion y crecemento sosteni den mercado di propiedad. Mientras e expansion aki ta crea oportunidad economico, tambe e por aumenta presion pa riesgo di labamento di placa.

E rapport ta splica cu criminalnan por purba di usa transaccion di real estate durante diferente etapa di labamento di placa, incluyendo pone fondo ilicito den sistema financiero, move placa mediante diferente transaccion, y finalmente integra placa criminal den activonan aparentemente legitimo.

Otro preocupacion ta involucra e uso di areglonan compleho di propietario.

FIU ta nota cu transaccionnan di real estate por involucra entidadnan legal, structuranan financiero complica y scondemento di e titularidad real mediante beneficiarionan final, haciendo mas dificil pa determina ken na final ta doño of ta controla propiedad.

Pa motibo di e caracteristicanan aki, internacionalmente ta reconoce ampliamente e sector di real estate como rekeriendo atencion particular dentro di marco anti-labamento di placa.

Interesantemente, mientras e mercado di propiedad na Aruba a sigui crece, reportahenan for di e sector no a aumenta na e mesun velocidad.
FIU ta enfatisa cu esaki no ta nifica necesariamente cu e sector no ta reportando suficientemente riba actividad sospechoso. Sinembargo, ta bisa cu e tendencia aki ta pone enfasis riba e importancia di evalua continuamente conscientisacion tocante riesgo, practica di monitoreo di transaccion, y comportamento di reportahe entre profesionalnan di real estate.

Pa atende e asunto aki, FIU a ehecuta outreach enfoca durante 2025, trahando directamente cu profesionalnan di real estate pa reforsa e comprension di riesgo di labamento di placa, metodo criminal emergente, y obligacionnan di reportahe.

E rapport anual ta bisa cu e agencia tin intencion pa sigui colabora cu e sector pa mehora conscientisacion, calidad di reportahe, y e efectividad general di e marco preventivo di Aruba.

Abogado, accountant y consehero fiscal tambe bao scrutinio

E rapport ta expande e preocupacion aki mas leu di agente di real estate, pa inclui otro negoshi y profesion no-financiero designa.

Abogado, accountant y consehero di impuesto ta menciona specificamente como profesionnan cu tin un rol importante den establece entidadnan legal, structura areglo financiero, y facilita transaccion. Pa motibo di e responsabilidadnan aki, hopi biaha nan ta bon posiciona pa identifica intento pa sconde beneficiario final of crea structuranan financiero compleho cu por facilita labamento di placa of corupcion.

A pesar cu FIU a reconoce esfuersonan andando di e profesionalnan aki pa cumpli cu rekisitonan di reportahe, ta indica cu outreach continuo y educacion ta keda importante pa reforsa reportahe den e sectornan aki.

Beneficiario final ta keda un asunto importante

Conecta di cerca cu sector di real estate ta e asunto di transparencia di beneficiario final.

E rapport ta declara cu identifica e personanan natural cu finalmente ta doño di of ta controla compania y areglonan legal ta keda un elemento critico den combati crimen financiero.

Aruba a introduci legislacion cu ta rekeri companianan pa entrega informacion di beneficiario final na Camara di Comercio, representando loke FIU ta describi como un stap importante pa mehora transparencia corporativo.

Sinembargo, e agencia ta nota cu trabao continuo ta necesario pa verifica informacion entrega, monitorea cumplimento y sigura aplicacion efectivo.

FIU ta enfatisa cu informacion corecto y actualisa di beneficiario final ta reforsa e habilidad di autoridadnan competente pa investiga crimen financiero mientras ta sostene e integridad di sistema financiero di Aruba.

Activo virtual como un preocupacion emergente

A pesar cu activonan virtual manera criptomoneda ainda no ta ser considera como un riesgo domestico dominante, FIU ta bisa cu nan ta representa un area den evolucion rekeriendo monitoreo continuo.

E rapport ta splica cu desaroyo tecnologico, incluyendo servicio financiero digital y activo virtual, ta creando oportunidadnan nobo pa fraude habilita ciberneticamente, labamento di placa a traves di frontera, y scondemento di fluho financiero.

E desaroyonan aki ta dunando forma nobo na e panorama global di crimen financiero, hasta si ainda nan no a bira e preocupacion principal na Aruba.

E agencia ta señala cu activonan virtual a cuminsa aparece den investigacion operativo realisa durante 2025. Inteligencia financiero a sostene al menos un investigacion involucrando criptomoneda, reforsando e necesidad pa atencion analitico continuo den e area aki.

Un di e case studies anonimo den e rapport tambe ta describi un investigacion andando involucrando negoshinan cu volumen halto di cash, movemento financiero door di frontera, multiple entidad comercial, y indicadornan sugeriendo posible vinculo cu actividad di activo virtual.

Segun FIU, e caso ta ilustra con ta combina metodonan tradicional di labamento di placa cada bes mas cu tecnologianan nobo y metodonan alternativo pa move balor door di frontera.

Pa e motibo aki, e agencia tin plan pa sigui reforsa su experticio den e sector aki mientras ta incorpora activo virtual den evaluacion nacional di riesgo den futuro.

Riesgo stabiel, pero metodo evolucionando

En general, FIU ta conclui cu e vulnerabilidadnan principal di Aruba a keda en gran parti sin cambio. Sectornan cu volumen halto di cash, manera casino; e mercado di real estate expandiendo; transparencia di beneficiario final; y cierto profesional ‘gatekeeper’ ta keda representa e areanan mas significante cu ta rekeri atencion.

Na mes momento, e metodonan usa pa criminalnan ta keda evoluciona.

Aumento di conexion financiero internacional, innovacion tecnologico, structura corporativo compleho y activonan virtual ta creando retonan nobo cu ta rekeri adaptacion continuo di institucionnan financiero, entidadnan di reportahe y autoridadnan di ley.

Pa e motibo aki, FIU ta bisa cu mantene un marco anti-labamento di placa efectivo ta bay rekeri inversion continuo den capacidad analitico, tecnologia, cooperacion entre agencianan di gobierno y supervision basa riba riesgo.

Mientras Aruba ta prepara pa su proximo evaluacion mutuo internacional e decada aki, e agencia ta conclui cu vigilancia sosteni den e sectornan vulnerable aki ta bay keda esencial pa protege e integridad di e sistema financiero di Aruba.