Participacion na un exposicion regional no ta un luho sino un oportunidad pa hiba cultura y arte di Aruba na un nivel mas halto y asina crea mas reconocimento pa artistanan Arubiano. Esey ta e conviccion di artista y Director di Atelier’s 89 Punto di Bellas Arte Aruba, Elvis Lopez, kende tin hopi decada ta traha pa crea un fundamento fuerte pa un economia di arte y cultura, conoci como e asina yama ‘Orange Economy.
Segun Lopez, na momento di participa na un exposicion internacional, esnan encarga pa scoge y organisa e produccionnan ta duna automaticamente un balor na locual a crea y esaki ta un indicacion di e nivel di trabou. Como tal, participacion na exposicionnan ta esencial pa keda traha na mehora e calidad di arte cu ta produci na Aruba.
Asina por ehempel Lopez mes a participa na e FUZE 2025 na Bahamas. E evento ta bou encargo di e artista curador Averia Wright kende a participa na e Caribbean Linked, organisa pa Ateliers’89. E participacion na 2025 tabata un exito y un biaha mas a invita artistanan di Ateliers’ 89 y Lopez personalmente pa participa na e FUZE 2026.
E exposicion na Bahamas a bira hopi importante pa artistanan contemporaneo di region, particularmente despues cu e Bienal di Cuba ya no ta organisa. E Bienal tabata percura pa un plataforma pa discuti practicanan di arte contemporaneo. Ferianan di arte semper tin un interes comercial, mientras cu bienalnan ta e base cultural pa artistanan comparti ideanan. E ferianan di arte mas prominente na mundo ta e Bienal di Venezia cu tin mas di un siglo y e Feria di Arte di Basel, cu a lanta na 1970.
Ateliers’89
Ateliers’ 89 desde su inicio a crea oportunidad pa ciudadanonan interesa den arte logra nan proposito, prome den creacion pero tambe den mehora nan habilidad. Lopez a conta Bon Dia Aruba cu e tayernan, e programa di intercambio y di residencia, ademas di Arte den Bario ta dirigi pa stimula tur hende, hoben y grandi pa descubri y agilisa nan talento.“Ta dificil pa calcula e impacto di tur e programanan aki pa comunidad,” Lopez a bisa. Sinembargo, ta un hecho cu arte ta un di e actividadnan mas importante pa stimula y yuda personanan cu nan salud mental.
E programa Caribbean Linked di Ateliers’ 89 a crea colaboracionnan grandi y importante entre artistanan di Caribe, y por cierto a conduci na e invitacion pa FUZE 2025 y awor pa 2026. “Caribbean Linked a sa di hiba Ateliers ‘89 na un nivel internacional y te ainda e ta proyecto mas exitoso y comenta di Caribe internacionalmente. “ Regularmente ta drenta peticionnan pa participacion for di otro pais pa website di e organisacion local.
Sosten structural
Pa por sigura continuacion sinembargo, mester tin sosten financiero continuo y structura, Lopez ta splica. “Semper ta depende di diferente instancia, manera UNOCA, Cultuurfonds, Cede Aruba y instancianan publico y priva. Ateliers’ 89 a ricibi sosten financiero durante e prome 18 añanan di entre otro Stichting Mondriaan, y finalmente Stichting Doen. Pero actualmente no tin e sosten aki.” Esaki ta dificulta continuacion di programanan importante, ya cu e enfoke mester ta mas dirigi riba recauda fondo cu profundisa e programanan di arte. Idealmente tin un sistema continuo pa sigura cu e actividadnan cu mas ta impacta comunidad tin su garantia financiero.
Ademas di ta maneha Ateliers’89, Elvis Lopez ta sigui cu su propio creatividad, y ta contento di por a cruza caminda cu asina hopi artista durante e decadanan di Ateliers’ 89 pa medio di e programa di residencia. “Esaki ta algo inpagable. Sinembargo mi critica ta hopi halto riba otro y mas tanto mi mes, unda mi a purba semper di keda mi mes y puro na mi trabou di arte contemporaneo y mi vision diferente, manera mi estilo, por ehempel.”
Mescos cu no tin sosten structural pa programanan educativo di arte, tampoco tin sosten financiero pa exposicionnan local y internacional a base continuo. Exposicionnan ta esencial, segun Lopez, pasobra mustra arte, particularmente den eventonan internacional ta e unico manera pa yega na un publico mas grandi, yega na curadornan di arte internacional cu por habri porta pa artistanan local drenta galerianan y museonan internacional. “No tin e sosten manera mester. Aruba nunca a sostene arte manera debe ser. Hopi biaha ta depende di politica. Si ta pas den e pensamento of no. Lamentablemente no ta mira e nivel di arte prome.”
E sosten di Gobierno pa un organisacion manera Ateliers’ 89, pero tur otro artista no mester bin a base di placa so. Segun Lopez, e por bin pa medio di agilisacion di procesonan, sosten pa logra fondonan for di Hulanda por ehempel. “Actualmente Hulanda ta cambia su comisionnan pa duna sosten financiero cada seis luna. Pa tene e instancianan fresco. Aruba mester disolve e instancianan cu nos tin y bin cu nobo. Y cuminsa fresco. Asina so por sigui den futuro.” E ta encera cu e entidadnan local cu ta dicidi riba fondonan pa artistanan ta hendenan cu tin educacion y sa kico ta arte contemporaneo. “Mester bin cu un museo di Arte Contemporaneo na Aruba cu curadornan di nivel, local y internacional.” Y pa hiba e nivel di arte di Aruba mas halto ainda, e ta vital cu Gobierno reconoce cu aki ta trata di un materia cu no ta djis algo pa hobby, sino cu tin un balor grandi. “Educacion di arte mester bira algo na scol y na cas. For di scol primario. E mester bira un materia completo.”
Pero tambe ta crucial pa bin cu maneho unda ta stop importacion di obranan di arte di afo pa hotelnan por ehempel. “Mester tin un maneho cu ta forsa hotelnan cumpra obra local, en bes di importa pa decora e cambernan y otro espacio. Baha e porcentahe di belasting riba arte local pa stimula esaki y obliga tur hotel pone arte local den espacionan publico. No solamente hotelnan, pero tur instancia, incluso Gobierno mester tin obranan di arte tres dimensional local, pafo y na entrada. Tur rotonde mester tin uno,” Lopez ta enfatisa.
Fuze 2026
E enfoke di Lopez ta pa percura cu Ateliers’ 89 continua cu su mision cu e fe cu por expande programanan pa promove artistanan local. “No ta importa cuanto lo dura of si mester warda, nos lo sigui dilanti.” No ta cuestion di perde fe cu un dia Aruba berdad lo mira e balor di un cultura rico di arte local.
Mientrastanto, e artista mes ta sigui cu speranza di por haya otro oportunidad pa expone locual Aruba tin na Fuze 2026, cu manera a mustra, ta e unico ‘showcase’ di arte Caribense pa un publico internacional. No tin e fondonan ainda, pero mescos cu Lopez a logra mantene Ateliers’ 89 bibo a pesar di falta di financiamento structura y maneho publico dirigi, e conviccion ta cu un biaha mas lo sa di expone e creatividad di Aruba na nivel internacional.
