(AFP) – E sonda espacial Chines Tianwen-2, cu ta programa pa trece muestra di un asteroide back pa investigacion, a yega su destino despues di biaha un biyon kilometer durante mas cu un aña, segun e agencia espacial Chines a informa riba dialuna.
E mision, cu a ser lansa na mei 2025, ta e prome mision di China pa colecta muestra for di un asteroide.
Esaki ta sucede mientras Beijing a inverti biyones di dollar den su programa espacial den añanan reciente pa logra loke Presidente Xi Jinping ta yama e “soño espacial” di e pais.
Tianwen-2 a yega exitosamente na un distancia di 20 kilometer for di e asteroide y a cuminsa exploracion cientifico despues di un biahe di rond di 400 dia y 1 biyon kilometer, segun e agencia espacial Chines CNSA a bisa den un comunicado.
E agencia tambe a publica un potret di e asteroide, un masa shinishi y iregular cu ta yama “2016 HO3”, cu ta contrasta fuertemente cu e fondo preto di espacio.
Tianwen-2 lo libera un modulo una bes cu e muestranan a ser colecta, cu lo transporta nan back na Tera.
Misionnan Hapones y Mericano ya a colecta muestra for di diferente asteroide.
Sinembargo, Tianwen-2 ta marca un logro importante pa China den su esfuerso pa alcansa Merca y Europa den e campo di exploracion espacial profundo, es decir, mas aya di Luna, segun expertonan.
Asteroidenan ta cuerponan cu ta orbita rond di Solo. Cientificonan ta kere cu e muestranan por contene pistanan tocante origen y evolucion di sistema solar.
