Ayera Aruba a despedi di un figura conoci den comunidad. Sr. Clyde Harms, empresario, deportista, escritor y filantropo, a laga un legado grandi atras y lo ser recorda como un di e personanan cu a dedica cu pasion su bida na educa y eleva pueblo di Aruba.
Apenas cumpliendo 95 aña un luna pasa, “E Mucha di Lagoen” Clyde Harms a biba un bida rico di experencia y tabata testigo na momentonan significante na Aruba y den exterior, incluyendo golpi di estado famoso na Libia cu a pone Muammar Gaddafi na poder na aña 1969. Harm a biaha y biba den partinan exotico rond mundo, consecuencia di su trabao trahando na Exxon.
Harms tambe ta conoci pa ta un deportista cu a practica un variedad amplio di deporte y tabata un figura cu tabatin un rol grandi den engrandece basketball riba e isla; el a introduci Little League na 1956 y ta autor di ‘Historia di Baseball di Aruba: E prome añanan’. Como escritor el a skirbi varios ensayo y articulo, varios di cual a ser compila y publica den su buki “E Bahul di Clyde”.
Harms tambe a dedica su bida na filantropia, unda el a funda Aruba Scholarship Foundation (ASF) pa yuda hobennan Rubiano sigui cu nan estudio den exterior. Di 2015 pa 2019, el a sirbi como tesorero y presidente di Nuevo Mundo Festival and Academy, tabata miembro di directiva di PANA Foundation (Pa Amor di nos Aruba) y tabata envolvi den Cruz Cora di Aruba.
Na aña 2003, el a ser condecora como “Ridder in de Orde van Oranje-Nassau”.
Den bida, Sr. Clyde Harms a demostra pasion, dedicacion y amor berdadero pa tur loke el a haci, priorisando otronan pa yuda nan crece, mehora y sigui contribui na sociedad di Aruba. Sigur un baluarte importante pa deporte y cultura Arubano, Clyde Harms lo ser recorda pa su legado inspirativo. Cu e descansa na paz.
Bon Dia Aruba ta manda palabranan di condolencia na famia y demas sernan keri di Sr. Clyde Harms.
