(AFP) – China a aterisa exitosamente un raket reutilisable pa prome biaha diabierna, segun su agencia espacial, marcando un paso importante den su ambicionnan espacial y den reduccion di costo di lansamento.
E gigante Asiatico por awor ta den posicion pa desafia dominio Mericano den raketnan reutilisable, cu te awor tabata lidera pa SpaceX di Elon Musk y Blue Origin di Jeff Bezos.
Un raket Long March-10B a lanta 12:15 di merdia, 0415 GMT, for di su sitio di lansamento na Hainan den parti zuid di e pais, prome cu coloca un satelite den orbita, segun China National Space Administration (CNSA) a informa.
E prome etapa di e raket — e parti abao cu ta duna e empuhe inicial necesario pa lanta e lansador for di tera —a ser recupera despues “via un sistema di captura cu net riba un plataforma na lama,” segun e agencia.
Canal estatal Chines CCTV a transmiti imagen aereo cu ta mustra e lansador bahando prome cu aterisa suavemente riba e plataforma.
“E mision aki ta marca e prome recuperacion controla exitoso di e prome etapa di un raket portador di China, ademas di e prome recuperacion di raket na lama usando net,” CNSA a bisa.
E agencia a elogia esaki como “un avance grandi den tecnologia Chines di raket reutilisable.”
Diferente cu e raket Falcon 9 di SpaceX, Long March-10B no ta usa patanan di aterisahe.
“E sistema di recuperacion basa riba net ta ofrece bentahanan unico,” a cita Chen Muye, un experto tecnico na China Academy of Launch Vehicle Technology, den corant Chines Global Times.
“Compara cu solucionnan actual mas comun pa recuperacion, recuperacion basa riba net ta mas adaptable na e rekisitonan di aterisahe di raketnan.”
Mayoria di raketnan ta ser diseña pa un solo uso, unda nan capanan ta cay den lama, ta kima den atmosfera of tin biaha keda den orbita como residuo espacial. E prome capa ta ser considera e componente mas costoso.
“Recuperacion basa riba net ta yuda simplifica structura abordo di e raket,” Chen a bisa, agregando cu como no mester ekipa e raket cu patanan di aterisahe, por reduci su peso tambe.
Chen a nota cu e peso reduci por permiti aumento di “capacidad di carga y eficiencia operacional.”
Reutilisa parti di e raket ta yuda baha costo di lansamento di satelitenan of nave espacial. Serie Long March-10 di raketnan ta destina particularmente pa futuro misionnan cu tripulacion Chines pa e luna.
