Economia di Aruba a sigui mustra diferente señal di crecemento durante luna di mei di 2026, segun e ultimo edicion di Monthly Tables publica pa Centrale Bank van Aruba (CBA). E cifranan ta indica cu e cantidad di placa den economia a sigui aumenta, activo di exterior a registra un aumento considerable y entrada di gobierno for di impuesto a subi compara cu e mesun periodo di aña pasa. Na mesun momento, e rapport ta mustra cu inflacion a acelera durante luna di mei y cu credito na sector priva a presenta un cambio den su composicion, mientras cu e posicion financiero di gobierno den sistema monetario a cambia significativamente.

E publicacion di CBA ta reuni diferente indicador economico cu ta ofrece un bista amplio riba e movemento den sistema financiero di Aruba. Entre e temanan cu ta sali na cla tin e cantidad di placa den circulacion, deposito bancario, prestamonan, reserva internacional, entrada fiscal y indice di prijs di consumidor. E cifranan ta cubri principalmente e situacion te cu mei di 2026 y ta permiti comparacion di e resultado cu e luna anterior y cu e mesun periodo di aña pasa.

Un di e desaroyonan cu ta sobresali ta e aumento den e asina yama “broad money”, esta, e cantidad total di placa cu ta circula den economia incluyendo cash, cuenta coriente, cuenta di spaar y otro tipo di deposito. Na fin di mei 2026 e total a yega Afl. 7,37 biyon, compara cu Afl. 7,28 biyon na april. Esaki ta representa un aumento mensual di mas cu Afl. 87 miyon. Compara cu mei di 2025, e crecemento ta ainda mas notable, pasobra e total tabata Afl. 6,54 biyon, loke ta nifica un aumento di mas cu Afl. 830 miyon den un aña.

Den e composicion di e cantidad di placa, e componente cu ta representa placa disponibel pa gasto inmediato tambe a subi. Cash y deposito cu por ser usa mesora a aumenta di Afl. 4,33 biyon na april pa Afl. 4,39 biyon na mei. E categoria di “quasi-money”, cu ta inclui principalmente cuenta di spaar y deposito cu tin cierto limitacion pa uso inmediato, a aumenta tambe, pasando di Afl. 2,96 biyon pa casi Afl. 2,98 biyon.

E rapport ta mustra cu un parti importante di e crecemento den placa disponible ta relaciona cu un aumento den deposito bancario. Deposito den cuenta coriente a aumenta te casi Afl. 3,98 biyon na mei. Cuenta di spaar tambe a sigui crece, alcansando Afl. 1,40 biyon. Deposito den moneda di exterior a permanece relativamente stabiel, aunke cu un aumento chikito den diferente categoria.

Na mesun momento cu placa den economia a sigui aumenta, e reserva internacional di Aruba a registra un crecemento fuerte. E total di activo netto den exterior den sistema monetario a aumenta di Afl. 4,14 biyon na april pa Afl. 4,62 biyon na mei. E subida aki tabata principalmente consecuencia di un aumento den e activo den exterior manteni tanto pa CBA como pa banconan comercial. Segun CBA, e total di activo bruto den exterior a supera Afl. 5,4 biyon na fin di mei, mientras cu pasivonan den exterior a baha un poco.

Banda di CBA mes, activo den exterior a aumenta te casi Afl. 4,94 biyon. E reserva di oro y otro activo financiero internacional a sigui forma un componente importante di e posicion financiero externo di Aruba. Segun e documentonan di CBA, e movemento aki ta contribui significantemente na fortalecemento di e reserva internacional durante e luna.

Credito den sector priva a presenta un panorama mixto. E total di prestamonan den sector priva a baha compara cu april, pasando di Afl. 4,84 biyon pa Afl. 4,39 biyon. Sinembargo, den e diferente categoria tin movemento distinto. Prestamo hipotecario pa cas a sigui aumenta un poco, mientras cu credito pa consumidor a registra un crecemento modesto. Di otro banda, prestamonan na empresa y otro categoria a mustra reduccion, loke a contribui na e bahada general.

Segun e tabel cu ta analisa e causanan di cambio den cantidad di placa, durante mei e aumento den reserva den exterior tabata un di e factornan principal cu a contribui na e expansion di likides den economia. Tambe a registra un cambio importante den posicion di gobierno den sistema monetario, cu a influi riba e resultado final di e indicadornan monetario.

E posicion financiero di gobierno den sistema monetario a cambia notablemente durante luna di mei. Deposito di gobierno na CBA a aumenta for di Afl. 173 miyon na april pa Afl. 536 miyon na mei. Na mesun momento, deposito den banconan comercial tambe a aumenta. Como resultado, e posicion netto di gobierno cu e sistema monetario a cambia di un obligacion positivo na april pa un saldo negativo di Afl. 381,6 miyon na mei. E cambio aki ta uno di e movementonan mas grandi registra den e serie mensual di e rapport.

Den e area fiscal, e cifranan ta indica cu entrada di gobierno durante luna di mei a keda robusto. Te cu mei 2026, entrada total a yega Afl. 301,9 miyon, compara cu Afl. 251 miyon den mei di 2025. Di e total aki, Afl. 299,5 miyon tabata entrada for di impuesto.

Impuesto riba entrada y ganashi a representa e fuente grandi di ingreso durante e periodo. Solamente impuesto riba ganashi di empresa a aporta Afl. 180.5 miyon, significantemente mas halto cu e Afl. 125,6 miyon registra den luna di mei di aña pasa. Impuesto riba salario a keda relativamente stabiel, mientras cu impuesto riba entrada personal a keda na un nivel mas modesto.

Impuesto riba consumo tambe a sigui aporta un cantidad importante. BBO/BAVP a genera Afl. 37,8 miyon durante luna di mei, mientras cu derecho di importacion a aporta Afl. 19,6 miyon. Impuesto riba servicio, incluyendo belasting riba hotel, licencia di casino y otro actividadnan, a sigui representa un fuente relevante di ingreso fiscal.

E rapport ta mustra tambe cu entrada no fiscal a baha compara cu aña pasa. Te cu mei 2026, e categoria aki tabata Afl. 2, 4 miyon, significantemente menos cu e cifra registra den luna di mei 2025. CBA ta señala cu e cifranan pa april y mei no ta inclui algun entrada no fiscal procedente di Departamento di Finansa.

Otro punto importante den e publicacion ta e comportamento di inflacion. E indice di prijs di consumidor (CPI) a subi for di 110,8 na april pa 111,9 na mei. Esaki ta representa un aumento mensual di 1,0%, mientras cu compara cu mei di 2025 inflacion anual a yega 2,1%. E promedio di e ultimo 12 luna a registra un inflacion di 0,4%, indicando cu, a pesar di e aumento reciente, e promedio anual ta keda relativamente modera.

CBA ta recorda cu e indice di prijs ta basa riba e Household Expenditure Survey realisa pa Central Bureau of Statistics (CBS), cu ta determina e peso di diferente producto y servicio den e canasta di consumidor.

Na nivel di banconan comercial, e rapport ta mustra cu e sistema bancario a sigui amplia su base di deposito y su activo total. Activo total di banconan comercial a yega mas cu Afl. 9,19 biyon na fin di mei, mientras cu deposito di cliente a sigui crece. Tambe e ratio di likides a keda na un nivel relativamente fuerte segun e cifranan publica.

Aunke e edicion di Monthly Tables ta contene informacion preliminar tocante turismo, e publicacion ta indica cu diferente dato pa mei ainda no tabata disponible na momento di publicacion. Sinembargo, e cifranan te april ta mustra cu cantidad di bishitante stayover na Aruba a sigui crece compara cu e mesun periodonan di aña anterior, cu aumento den mayoria di mercadonan principal.

Den su totalidad, e Monthly Tables di mei 2026 ta pinta un cuadro di un economia cu ta sigui registra crecemento den diferente area, incluyendo reserva internacional, cantidad di placa den circulacion y entrada fiscal. Na mesun momento, e documentonan ta mustra cu inflacion a acelera un poco y cu diferente componente di credito y posicion financiero di gobierno a experimenta cambio importante durante e luna analisa.