Na augustus lo determina si tin fondo pa continua asistencia den cuadro di landspakket y TWO

E landspakket y e TWO, esta e Tijdelijk Werkorganisatie ta di balor y mester continua. E continuacion di e TWO ta mara na continuacion di presupuesto cu “mester dicidi riba dje na augustus,” ta locual Secretario di Estado pa Asuntonan di Reino Eric van der Burg a declara durante su ultimo conferencia di prensa.

“Nos ta trahando na Hulanda pa tur e preparacionnan pa sigui cu e TWO y e landspakket, bou condicion cu pa prome di augustus lo tin fondonan disponible.” E fondonan lo mester cubri gastonan pa sosten institucional y tambe asistencia tecnico, por ehempel pa medio di huristanan legislativo.

HOFA

Van der Burg un biaha mas a mishi e tema di HOFA, e proposicion di ley di Reino riba finanzas publico sostenibel di Aruba. Esaki den luz di e consehonan di Raad van State. E consehonan di Raad van State riba e proposicion di HOFA lo keda inclui den e asina yama Nader Rapport, esta e proposicion di ley adapta. Eric van der Burg a splica cu Gobierno di Reino ta tuma e consehonan na serio. “Gobierno ta ricibi diferente forma di conseho di Raad van State. E prome forma ta cu no mester haci ningun cambio na e proposicion di ley, cu ta conoci como un conseho blanco. E otro ta, pa trece cambionan y e ley por sigui su caminda. Un di tres conseho ta cu mester trece cambionan substancial y e ultimo ta cu no por entrega e proposicion di ley.” Den e caso aki, van der Burg a bisa cu e conseho ta e di dos forma y Gobierno lo trece inclui e ahustacionnan sugeri pa Raad van State. “Mi ta haya cu e consehonan di Raad van State ta un mehoracion riba e proposicion di ley, pero mi no sa si e cambionan aki ta suficiente particularmente pa oposicion di Aruba cambia di pensamento.”

Sr. van der Burg a admiti cu e contacto cu particularmente lider di oposicion, mr. Evelyn Wever Croes ta minimo, pero cu durante e ultimo IPKO na Hulanda, “mi a tene un reunion porta cera cu tur e representantenan di Parlamentonan.” Den e reunion ey tabata inclui tambe miembronan di MEP. “Pero e reunion tabata uno porta cera, pues ami no por papia di locual a keda discuti durante e encuentro.” Sinembargo, aunke no tin un reunion specifico programa cu oposicion durante e bishita otro siman, e Secretario di Estado no ta exclui e posibilidad di tene combersacionnan. “Si topa cu hende ta topa cu hende,” el a bisa.

Eric van der Burg en todo caso ta enfatisa cu e protestanan cu tabatin na Aruba contra declaracionnan riba HOFA ta basa riba mal interpretacion di su declaracionnan. Oposicion, den su opinion a cit’e robes. Lo a atribui palabranan na dje cu e mes nunca a usa. “Pero los di estilo, mi sa tambe cu MEP y lider di oposicion no ta proponente di HOFA y lo kier convence Parlamento pa tuma nan posicion y ta haci locual ta necesario pa logra esaki. Nos por constata cu esey ta sosode.”

Gradicimento

Eric van der Burg lo discuti temanan manera Conferencia di Reino, siguridad den cuadro di desaroyonan regional entre otro durante su bishita e siman aki. “Mi lo kier para keto na tur e islanan, riba e desaster cu a sosode na Venezuela. Tin hopi hende riba e tres islanan cu tin lasonan cera cu Venezuela y na Corsou y Aruba a bin yen di iniciativa pa yuda Venezuela. Na Boneiro tambe.” Segun van der Burg, e desaster, e destruccion lo tin su consecuencianan pa e islanan, y ta temanan cu e lo elabora riba dje durante su bishita otro siman. Tambe e lo kier bishita e instancianan cu ta trahando pa manda ayudo, pa asina expresa su gratitud pa e trabou cu nan ta haci.

Corsou y Boneiro

Tambe e lo delibera cu Prome Minister di Corsou, sr. Pisas riba e funcion di Corsou como hub digital pa region.

Pa loke ta Boneiro, Conseho di Minister di Hulanda a aloca fondo pa yuda ciudadanonan cu menos recurso cumpli cu e necesidadnan basico di transporte y tambe utilidad. Con e fondo aki lo keda distribui lo bira conoci despues cu Parlamento Hulandes pasa Presupuesto pa 2027. Riba e tema di un gobierno insular instabil, Secretario van der Burg a bisa cu e ta keda cu e speranza cu ta un asunto cu por soluciona na Boneiro mes y cu e situacion no ta comparable cu locual tabata e caso na St. Eustatius unda un crisis di gobernacion a forsa Gobierno Hulandes tuma cargo completo di e isla na 2017. “Na Hulanda tambe tin gobiernonan local, por ehempel municipio di Rotterdam, cu ta cay hasta despues di un dia. Nos no por trata Boneiro diferente cu e otro municipionan na e parti Europeo di Hulanda.”