E proceso pa introduci e Rijkswet Houdbare Overheidsfinanciën Aruba (HOFA) ta sigui avansa cu diferente adaptacion importante despues cu Afdeling Advisering di Raad van State (Conseho di Esatdo di Reino) a publica su opinion oficial riba e proyecto di ley.
Durante su bishita na Aruba, Secretario di Estado di Asuntonan di Reino, Eric van der Burg, a confirma cu gobierno di Reino lo incorpora e recomendacionnan principal di Raad van State den e texto di ley prome cu e proceso legislativo sigui su curso. Cu esey, gobierno ta busca fortalece e base huridico di e propuesta, clarifica varios punto y na mesun momento mantene e balansa entre e acuerdo cu Aruba y Hulanda y e autonomia constitucional di e pais.
Durante reunion di Conseho di Minister di Reino na Den Haag, Secretario di Estado Van der Burg, a haya mandato formal pa consulta cu Gobierno di Aruba tocante e adaptacion di e proyecto di HOFA. E mandato a permitie papia na Oranjestad cu prome minister Mike Eman y minister di Finanzas Geoffrey Wever riba e opinion di Raad van State y riba e cambionan cu mester ser incorpora den e propuesta. Segun Van der Burg, e recomendacionnan no ta cambia e esencia di HOFA, sino ta sirbi principalmente pa mehora e texto original, haci algun disposicion mas cla y kita e puntonan cu por duna espacio pa preocupacion tocante un posible limitacion di autonomia di Aruba.
E opinion di Raad van State no ta un rechaso di HOFA. Contrario, e organo di conseho ta confirma cu e proyecto ta basa riba e Acuerdo Administrativo firma entre Aruba y Hulanda riba 4 di juni 2024, cu tin como meta crea un sistema nobo pa garantisa finanzas publico sostenibel, substituyendo e Landsverordening Aruba Tijdelijk Financieel Toezicht (LAFT) cu un combinacion di un ley di Reino y un ley nacional di Aruba. Sinembargo, Raad van State ta señala cu tin varios aspecto cu por ser formula mas cla, pa e sistema funciona di un miho forma y pa evita cu e limitacionnan riba autonomia di Aruba bay mas leu cu estrictamente necesario.
Un di e puntonan cu a ricibi mas atencion ta e relacion entre HOFA y e Landsverordening Waarborging Houdbare Overheidsfinanciën (LWHO). Den e propuesta original, gobierno di Aruba no lo por presenta ni cambia e LWHO sin aprobacion previo di Rijksministerraad (Conseho di Minister di Reino). E rason pa esaki tabata cu e LWHO ta contene e cifranan concreto cu ta determina e metanan financiero, manera e porcentahe maximo di debe publico, e saldo primario y e reserva financiero cu Aruba mester mantene. Gobierno Hulandes tabata considera cu si Aruba por cambia e cifranan unilateralmente, e obhetivo principal di HOFA por ser debilita.
Raad van State ta bisa cu e principio di controla e cambionan den e LWHO ta comprendibel, pero ta considera cu e rekisito di aprobacion previo no mester aplica riba tur disposicion di e ley nacional. Segun e organo di conseho, pa proteha autonomia legislativo di Aruba, e obligacion di haya aprobacion di Rijksministerraad mester ta limita solamente na e articulonan cu ta trata e cuantificacion di e normanan financiero. Esaki kiermen cu otro cambionan den e ley nacional, cu no tin impacto directo riba e cifranan acorda entre e dos paisnan, no necesariamente mester pasa door di e mesun procedemento. Raad van State ta considera cu un limitacion mas restringi ta logra e mesun obhetivo sin pone mas restriccion cu ta necesario riba e competencia di Aruba.
Otro recomendacion importante ta trata e concepto di e sector colectivo. E propuesta original ta basa e normanan financiero riba e debe y resultado financiero di e sector colectivo, pero e Memorie van Toelichting ta splica cu durante e prome tres aña e calculacion lo concentra principalmente riba gobierno central di Aruba. Solamente despues lo inclui completamente e otro entidadnan publico y algun proyecto di cooperacion entre sector publico y priva, despues cu tin mas informacion disponible y un evaluacion actualisa di IMF.
Raad van State no ta opone contra e sistema, pero ta pidi mas clarificacion. Segun e conseho, e documentonan no ta identifica claramente cua proyecto di publiek-private samenwerking lo drenta den e calculacion ni cuanto impacto financiero nan por tin riba e debe total di Aruba. E organo di conseho ta considera importante cu tanto Parlamento como comunidad haya un miho idea di e magnitud di e obligacionnan financiero cu eventualmente lo forma parti di e calculacion oficial di e debe publico.
E opinion tambe ta menciona e papel di College Aruba financieel toezicht (CAft). Den e propuesta original, CAft lo haci un evaluacion anual pa determina si Aruba ta cumpli cu e criterionan cu ta permiti acceso na e facilidad di prestamo, supervision mas liher of eventualmente e posibilidad pa cera e sistema di supervision. Despues di e evaluacion, Rijksministerraad lo tuma e decision formal.
Raad van State ta observa cu e manera cu e texto ta formula por crea impresion cu Rijksministerraad por tuma un decision diferente a pesar cu CAft a determina cu Aruba ta cumpli cu tur criterio. Pa evita incertidumbre, e conseho ta recomenda pa clarifica den e splicacion cu ora CAft confirma cu Aruba a alcansa e normanan corespondiente, acceso na e facilidad di prestamo, supervision mas liher of e posibilidad pa solicita eliminacion di HOFA ta sigui automaticamente conforme e sistema estableci. Segun Raad van State, e aclaracion aki ta aumenta seguridad huridico y predictibilidad pa tur e partido involucra.
Otro aspecto cu Raad van State kier mira mas cla ta e refinanciamento di debe externo. E acuerdo entre Aruba y Hulanda contempla cu un parti di e prestamonan di Aruba den exterior por ser refinancia bao di condicionnan Hulandes, loke por representa un bentaha considerable den costo di interes. Den e Memorie van Toelichting ta indica cu e facilidad di prestamo ta forma un di e incentivo principal pa Aruba sigui e trayecto pa finanzas publico sostenibel.
Sinembargo, Raad van State ta observa cu e documentonan no ta specifica cua prestamonan den exterior exactamente lo cualifica pa refinanciamento. Segun e organo di conseho, e falta di e informacion aki ta haci cu tanto Aruba como Hulanda no tin un bista suficientemente cla di e consecuencia financiero di e propuesta. P’esey e conseho ta recomenda amplia e splicacion tocante cual categoria di debe por drenta den e mecanismo nobo.
Ademas di e aspectonan financiero, Raad van State tambe a dedica atencion na maneho di documentacion di CAft. Den e propuesta original ta inclui un articulo cu ta obliga CAft pa tene su documentonan accesibel y conserva nan di forma duradero. E conseho ta sostene cu e obhetivo ta positivo, pero ta pidi pa e disposicion ser clarifica, particularmente mirando e transicion entre e sistema di supervision actual y e sistema cu HOFA lo introduci. Esaki, segun Raad van State, ta contribui pa un miho administracion y conservacion di documentonan oficial riba termino largo.
Fuera di e recomendacionnan concreto, Raad van State tambe ta expresa un reconocemento mas amplio riba e manera cu Aruba y Hulanda a prepara e propuesta. E organo ta señala cu e ley ta resultado di un proceso conhunto entre dos partner igual, den cual e dos gobierno a traha hunto pa elabora un sistema cu mester crea disciplina presupuestario, reduci debe publico y eventualmente permiti cu supervision financiero di Reino ta caba. Segun e conseho, precisamente pasobra HOFA ta un consensusrijkswet, ta importante cu e balansa entre cooperacion y autonomia ser manteni durante henter e proceso legislativo.
Den e Memorie van Toelichting ta enfatisa cu HOFA ta basa riba e recomendacionnan di Fondo Monetario Internacional (IMF). IMF a propone un sistema cu ta usa un meta pa mantene e debe publico na 50% di Producto Interno Bruto (GDP), combina cu un meta pa saldo primario di 3.5% di GDP, un mecanismo automatico di coreccion ora debe subi mas cu loke tabata plania y un reserva financiero pa absorbe eventual contratempo economico. Ademas, e propuesta ta inclui posibilidad di supervision mas lihe ora Aruba demostra durante varios aña cu e normanan ta ser cumpli y finalmente un mecanismo pa elimina completamente e ley di Reino despues cu e condicionnan estableci ser cumpli durante tres aña consecutivo.
Cu e declaracion di Eric van der Burg cu gobierno Hulandes lo incorpora e recomendacionnan di Raad van State, e siguiente paso ta adapta e texto di ley y e splicacion oficial conforme e observacionnan presenta. Si finalmente e propuesta ser aproba, HOFA lo reemplasa e sistema actual temporal di supervision financiero cu un marco nobo cu, segun e acuerdo entre e dos pais, tin caracter temporal y ta dirigi na logra un situacion den cual Aruba eventualmente por sigui mantene su propio finanzas publico sostenibel sin supervision financiero di Reino.
