Gobierno a presenta marco di politica nobo pa otorgamento di tereno y vivienda

Gobierno di Aruba a presenta e Beleidsdocument Gronduitgifte, Volkshuisvesting en Overige Diensten DIP 2026, den cua e ta establece e direccion oficial pa con DIP lo maneha otorgamento di tereno, vivienda y otro servicio relaciona. E documento ta busca modernisa e sistema actual, simplifica procedementonan, aumenta transparencia y adapta e politica di vivienda na e demanda creciente pa cas y e disponibilidad limita di tereno publico.

Segun e documento, e punto di salida ta cu tereno publico ta un recurso scars cu mester ser distribui di un manera transparente, eficiente y husto. Gobierno ta indica cu e politica nobo no ta limita su mes na reparti tereno, sino cu e ta enfoca tambe riba fortalecemento di seguridad huridico, miho servicio na ciudadano y un uso mas responsable di e espacio disponible.

Un di e cambionan principal ta cu tur decision tocante otorgamento di tereno y desaroyo espacial mester ta conforme cu e Ruimtelijk Ontwikkelingsplan (ROP) y e Ruimtelijk Ontwikkelingsplan met Voorschriften (ROPV). Esaki nifica cu peticionnan pa construccion, verkaveling of cambio di destinacion lo sigui ser evalua segun e planificacion oficial di Aruba y e normanan urbanistico vigente.

Den e area di vivienda, e politica ta pone mas enfasis riba uso eficiente di tereno. Debi na e falta di espacio disponible, gobierno kier stimula construccion di edificio di apartamento, casnan den fila y otro tipo di desaroyo compacto, en bes di depende principalmente riba casnan individual. E obhetivo ta aumenta e cantidad di unidadnan residencial sin amplia innecesariamente e area urbanisa.

E documento ta confirma cu vivienda pa personanan di entrada abao y entrada medio ta keda prioridad. Pa e motibo ey, Fundacion Cas pa Comunidad Arubano (FCCA) ta keda un socio strategico pa construccion di casnan social, mientras cu banco local, fondo di pensioen, inversionista y desaroyadornan tambe ta ser invita pa contribui na proyectonan residencial.

Gobierno kier probecha tambe e barionan existente. E politica ta habri posibilidad pa crea unidadnan adicional, manera studio, apartamento of cas pa cuido di famia, riba algun propiedad existente, semper cu nan cumpli cu e exigencianan urbanistico. E maneho ta considera tambe parti algun parcela existente si esaki no ta afecta calidad di bida ni infrastructura di e bisindario.

Den e seccion di otorgamento di tereno, e documento ta enfatisa cu peticionnan lo sigui ser trata exclusivamente pa DIP. Minister lo keda responsable pa formula politica general, pero no lo interveni den evaluacion di filenan individual. Tur peticion lo ser analisa segun e mesun criterio legal y tecnico.

E politica ta incorpora tambe e consecuencia di e hurisprudencia Didam. Ora e reglanan ta aplicabel, intencionnan pa entrega tereno publico lo mester ser publica oficialmente pa garantisa transparencia y igualdad di oportunidad pa interesadonan.

Otro cambio importante ta e maneho di e “grote kavels,” parcela cu ta mas grandi cu 500 meter cuadra. Segun e politica, hopi di e terenonan aki no por ser parti mas chikito. Pa evita cu nan ta keda sin uzo, gobierno ta propone pa evaluacion financiero ser basa riba un construccion ekivalente na 20% di e superficie di e parcela. Pa percela di 500 meter cuadra of menos, e rekisito minimo ta un cas di 60 meter cuadra.

E documento ta distingui tambe entre otorgamento di tereno individual y proyectonan grandi di vivienda. Si un area ta reserva pa un proyecto residencial, e tereno no lo ser asigna segun e lista tradicional di solicitantenan individual, sino segun e necesidad di vivienda di Aruba y e procedementonan di seleccion cu ta aplicabel.

Finalmente, e politica ta confirma cu e principio FIFO (First In, First Out) ta keda e base pa trata peticionnan di tereno residencial. Sinembargo, e documento ta aclaria cu e fecha di inscripcion no ta garantisa un parcela specifico. Ora un solicitante ser yama, DIP lo considera disponibilidad di tereno, tamaño, ubicacion, capacidad financiero y otro criterio relevante prome cu haci e asignacion definitivo. E obhetivo ta mantene e orden cronologico, mientras cu e reparticion di tereno ta adapta na e realidad di cada caso.

E documento ta elabora tambe riba e procedemento cu un solicitante mester sigui pa ricibi un percela di dominio publico den erfpacht pa construccion di un cas. E proceso ta ser dividi den diferente etapa, cu ta cuminsa cu entrega di e peticion, sigui cu pre-reservacion, reservacion, firma di contrato di erfpacht, establecimento notarial y finalmente construccion di e cas. Segun DIP, e meta ta pa crea un proceso mas uniforme, eficiente y gradualmente mas digital.

Pa por cualifica pa un parcela residencial, un solicitante mester ta mayor di edad, residente di Aruba y tin nacionalidad Hulandes of un permiso di residencia pa tempo indefini. Ademas, ni e solicitante ni su pareha por ta doño, huurdo of erfpachter di un otro parcela residencial, ni por tin un derecho di apartamento. Cu esaki, gobierno kier enfoca e disponibilidad limita di tereno publico riba personanan cu ainda no tin acceso na un propiedad pa biba.

Ora un solicitante yega na su turno den e sistema FIFO, e persona lo ricibi un pre-reservacion y mester presenta, den 60 dia, un declaracion di un banco local of institucion financiero cu ta confirma cu e financiamento necesario pa construi e cas ta disponible. Si e documento no ser entrega den e plaso, e pre-reservacion ta caduca automaticamente.

Despues di esey, si tur e condicionnan ser cumpli, DIP por entrega un reservacion formal pa un parcela. E solicitante mester acepta e oferta den 14 dia y paga e costo di reservacion. Durante e periodo di reservacion, cu por dura te 90 dia, mester entrega diferente documento, incluyendo prueba di inscripcion den censo, evidencia cu un peticion di permiso di construccion a ser entrega na DOW y plannan di construccion cu ta cumpli cu e exigencianan tecnico y urbanistico.

E politica ta introduci tambe e posibilidad di un “kavelpaspoort” pa algun parcela. E documento ey por establece condicionnan specifico tocante e tamaño, ubicacion y diseñonan permiti pa e cas. Pa area manera costa of otro zona special, gobierno por impone exigencianan adicional cu ta enfoca riba calidad di construccion y sostenibilidad.

Otro punto central di e documento ta e lucha contra speculacion cu tereno publico. Segun e politica, durante e prome cinco aña despues cu un cas ta completamente cla, e derecho di erfpacht no por ser transferi sin permiso previo di e minister. Si un transferencia ser autorisa den e periodo aki, e nobo titular nobo mester reuni tambe e condicionnan cu normalmente ta aplica pa un solicitante nobo.

Gobierno ta mira proyectonan grandi di vivienda manera un herment importante pa amplia e oferta di cas. Pa e motibo ey, FCCA ta keda un socio strategico pa desaroyo di vivienda social y accesibel. Desaroyadornan priva tambe por participa den proyectonan semper cu nan cumpli cu e procedimentonan di seleccion y e criterio tecnico y financiero. Ora tin varios candidato pa e mesun proyecto, gobierno por organisa un destaho publico pa selecciona e opcion cu ta ofrece e miho resultado.

E documento ta trece dilanti tambe e aspecto di transferencia di parcela cu ya ta den erfpacht. Pa parcela cu ainda no tin construccion, transferencianan lo ta permiti principalmente entre famia den prome, di dos of di tres grado, cu excepcion si tin circunstancianan excepcional. Den caso di parcela cu construccion ainda no ta cla of cu cas ya ta cla, gobierno por considera peticionnan basa riba situacionnan manera enfermedad grave, perdida imboluntario di entrada, divorcio of fayecimento.

Na nivel administrativo, e politica ta clarifica e reparticion di responsabilidad entre e minister y DIP. Mientras cu e minister ta responsable pa formula politica y tuma decision strategico, DIP lo keda encarga cu tratamento di peticionnan, administracion di file, asesoria tecnico y publicacion di informacion. E documento ta provee tambe evaluacion periodico di e politica pa determina si e obhetivo cu a ser establece ta ser alcansa y si ta necesario adapta algun regla den futuro.

Pa garantisa cumplimento, DIP lo sigui controla si parcela ta ser uza conforme e condicionnan di erfpacht, si construccion ta avansa dentro di e plaso stipula y si no tin uso indebido of transferencia ilegal. Den caso di infraccion, gobierno por aplica diferente medida, cu ta varia for di un advertencia te terminacion di e derecho di erfpacht, dependiendo di gravedad di e situacion.

Cu e Beleidsdocument Gronduitgifte, Volkshuisvesting en Overige Diensten DIP 2026, gobierno ta introduci un marco di politica cu ta reuni e reglanan principal pa otorgamento di tereno, vivienda y planificacion espacial den un solo documento. E politica ta enfoca riba un sistema mas transparente, eficiente y adapta na e necesidadnan actual di e pais, mientras cu tambe ta pone sostenibilidad como un principio importante den desaroyo futuro. Esaki ta inclui uzo responsable di tereno, adaptacion na cambio climatico, proteccion di naturalesa y ampliacion gradual di e servicio digital di DIP, cu ta busca facilita peticionnan, mehora comunicacion cu ciudadano y amplia acceso na informacion oficial.