Lider di fraccion di MEP den Parlamento, Evelyn Wever-Croes, a expresa preocupacion tocante loke el a describi manera falta di transparencia di gobierno di Aruba den e proceso relaciona cu posible cambionan den e proyecto di Ley di Reino Houdbare Overheidsfinanciën Aruba (HOFA).

Durante un conferencia di prensa, e parlamentario a declara cu Parlamento no a ricibi informacion oficial tocante e negociacionnan cu, segun informacion publica, ta tumando lugar entre Aruba y Hulanda riba adaptacionnan di e proyecto di ley.

Segun Wever-Croes, e situacion ta preocupante pasobra HOFA no ta un proyecto di ley ordinario, sino un Ley di Reino cu, segun su punto di bista, por tin consecuencia importante pa e autonomia constitucional di Aruba. El a indica cu e falta di informacion ta pone Parlamento den un posicion dificil pa ehecuta su funcion constitucional di controla gobierno.

E declaracionnan di e lider di fraccion di MEP ta sigui despues cu diferente informacion a sali tocante e mandato cu Secretario di Estado pa Asuntonan di Reino, Eric van der Burg, a haya di gobierno Hulandes pa sigui consulta cu gobierno di Aruba riba e adaptacionnan di HOFA. Segun Wever-Croes, te ainda no ta cla exactamente cua ta e cambionan cu ta ser considera ni cua ta e posicion oficial di gobierno di Aruba den e negociacionnan.

El a bisa cu, basa riba e informacion publica, Van der Burg a indica cu gobierno Hulandes ta dispuesto pa incorpora parti di e recomendacionnan presenta door di Afdeling Advisering di Raad van State den e texto adapta di e ley. Tambe a menciona cu a sali informacion cu algun disposicion por ser elimina y otro por ser reformula, pero, segun Wever-Croes, Parlamento no a ricibi ningun documento oficial cu ta informa exactamente cua ta e contenido di e cambionan.

Segun e parlamentario, si realmente ta existi negociacionnan entre Aruba y Hulanda riba un ley cu tin un impacto directo riba gobernacion y autonomia di e pais, e proceso no mester tuma lugar sin cu Parlamento ta debidamente informa. El a argumenta cu tanto Raad van State di Reino como Raad di Advies di Aruba anteriormente a señala cu e proyecto di HOFA tin implicacionnan constitucional importante y cu precisamente pa motibo di esey transparencia ta esencial durante tur e proceso.

Wever-Croes tambe a recorda cu gobierno Hulandes anteriormente a indica cu prome cu sigui cu e proceso legislativo lo mester tin suficiente sosten y consenso na Aruba pa e propuesta. Segun su opinion, e lo resulta dificil pa logra e asina yama “draagvlak” den sociedad si Parlamento y comunidad no ta ser informa riba loke ta ser discuti.

“Con bo ta kere cu bo ta yega na e consenso of e draagvlak ey si bo no ta ni papia cu hende di dje?,” el a cuestiona.

El a expresa cu Parlamento no por cumpli cu su responsabilidad constitucional di controla gobierno si e institucion no ta ricibi informacion relevante riba negociacionnan cu ta tumando lugar.

Como resultado di e preocupacionnan ey, fraccion di MEP a manda un serie di pregunta na prome minister Mike Eman. Segun Wever-Croes, den e preguntanan ey fraccion ta pidi claridad riba e cambionan cu actualmente ta ser discuti, e posicion cu gobierno di Aruba ta defendiendo durante e negociacionnan y e estado actual di e proceso.

Ademas, MEP kier sa cua reunionnan entre representante di Aruba y Hulanda a tuma lugar caba, ken a participa den nan y pakico Parlamento no a ser informa prome tocante e combersacionnan ey. Segun Wever-Croes, falta di comunicacion ta crea incertidumbre riba un asunto cu ta toca interesnan fundamental di Aruba.

Fraccion di MEP tambe a pidi pa gobierno entrega tur documentacion relevante tocante e proceso. Entre e informacion solicita tin e eventual concepto di ley cu ta ser prepara, corespondencia entre gobierno di Aruba y gobierno Hulandes y otro documento cu por yuda Parlamento evalua e negociacionnan y ehecuta su tarea di control.

Wever-Croes a enfatisa cu, segun su opinion, transparencia no ta un fabor cu gobierno ta haci Parlamento ni pueblo di Aruba. “E gobierno aki mester realisa cu transparencia no ta un fabor cu nan ta haci Parlamento. Transparencia no ta un fabor na pueblo di Aruba. Transparencia ta un obligacion y specialmente pa loke ta trata e Ley di Reino HOFA,” el a enfatisa.

Den e mes contexto, e parlamentario a sostene cu na e momento aki gobierno no por argumenta cu tin un consenso amplio riba HOFA. Segun e, mientras informacion ta ser limita, ta bira mas dificil pa logra sosten tanto den Parlamento como den comunidad.

Wever-Croes a declara cu autonomia di Aruba no por bira un asunto di negociacion sin participacion di Parlamento. El a expresa cu e organo legislativo no por ser exclui di un proceso cu, den su opinion, por defini aspectonan importante di e futuro constitucional y financiero di e pais.

Durante e conferencia di prensa e lider di fraccion di MEP tambe a haci referencia na e trayectorio politico di prome minister Mike Eman. Segun Wever-Croes, e ta considera sorprendente cu un politico cu, segun e, ta bini di un famia cu a hunga un papel importante den e lucha pa Status Aparte, awor ta permiti cu un proceso di e magnitud aki sigui sin suficiente informacion na Parlamento.

El a bisa cu e generacion mas hoben di politico no a biba directamente e proceso historico cu a culmina cu e obtencion di Status Aparte y, pa e motibo ey por no aprecia completamente e importancia di e autonomia constitucional. Sinembargo, segun Wever-Croes, e expectativa cu e tin di un lider cu experiencia manera Mike Eman ta diferente, precisamente pa motibo di su experiencia politico.

El a subraya cu ningun gobernante tin autoridad pa pone na riesgo of sacrifica e resultado di decadas di lucha politico cu a permiti Aruba alcansa su posicion actual den Reino. El a agrega cu fraccion di MEP lo sigui exigi claridad y lo tene gobierno responsable pa e decisionnan cu ta ser tuma den e proceso.

Wever-Croes a comenta riba e iniciativa di gobierno pa organisa un Dia Nacional di Limpiesa. El a indica cu no tin discusion cu Aruba mester bira mas limpi y cu mantenemento di espacio publico ta importante pa calidad di bida y imagen di e pais.

El a enfatisa cu MEP ta sostene accionnan cu contribui na limpiesa di Aruba y e partido mes regularmente ta participa den diferente actividad comunitario relaciona cu e tema. Sinembargo, el a cuestiona e enfoke cu Gobierno ta dunando na e iniciativa.

E parlamentario a expresa cu, den su opinion, prome minister Mike Eman ta mustra hopi entusiasmo pa e campaña nacional di limpiesa, mientras cu riba otro asunto cu e ta considera di mas importancia pa futuro institucional di Aruba, manera Ley di Reino HOFA, Gobierno ta relativamente keto. El a sugeri cu e diferencia den enfoke ta trece preguntanan den comunidad.

Segun Wever-Croes, pueblo di Aruba a scoge un prome minister pa duna liderazgo riba e temanan strategico cu ta determina futuro di e pais. Pa motibo ey, el a propone cu, asina manera Gobierno a organisa un Dia Nacional di Limpiesa, tambe por organisa un dialogo nacional riba autonomia, identidad y Status Aparte.

“Aruba ta paga Mike Eman no pa e ta solamente minister encarga cu sushi na Aruba. Aruba ta paga Mike Eman pa e ta minister president di e pais aki. Awor cu el a organisa un dia nacional pa haci Aruba limpi, mi ta spera tambe cu su siguiente paso ta cu e ta organisa un dialogo nacional caminda e ta bay papia con nos ta bay defende nos identidad, con nos ta bay defende nos dignidad, con nos ta bay defende nos Status aparte na Aruba,” el a subraya,

Na final di su conferencia di prensa, lider di fraccion di MEP a bisa cu e falta di comunicacion tocante HOFA ta sigui alimenta preocupacion den Parlamento. El a ripiti cu su partido ta spera cu gobierno por contesta rapidamente na e preguntanan cu nan a manda y cu e informacion solicita lo ser comparti cu Parlamento den un termino rasonabel.