Fin di siman pasa a surgi un caso di maltrato den un centro di cuido na Tanki Leendert. Aki tabata trata di un adulto mayor M. Zievinger di 79 aña cu a bira victima di maltrato cometi pa un otro cliente di e centro. Den medionan di comunicacion, a sali na cla cu e sospechoso L. Hickingson di 62 aña a ser deteni riba e mesun dia cu e maltrato a sucede.

E caso a surgi diabierna siman pasa, unda un denuncia di maltrato a drenta for di Happy Days Care Foundation cu un cliente a ser golpia severamente. Segun a reporta, e agresor tabata un otro cliente cu tabatin dos aña na kedando na e centro y cu no tabatin ningun problema di comportamento te awor. Gerente di e cas di cuido a expresa cu nan ta lamenta e situacion y cu nan a keda sorprendi pasobra algo asina nunca a sucede, y tampoco cu Hickingson a yega di mustra comportamento agresivo.

A compronde for di otro reportahe cu e incidente a sucede durante oranan di marduga, pero no por a duna mas detaye tocante kico por a causa e asalto cu a resulta den blousa, corta y otro herida serio riba e curpa di e victima. E victima a ser transporta pa hospital, unda segun otro reportahe ta insinua, el a keda den estado critico y ainda ta recuperando di su heridanan.

Diabierna mainta polis a logra detene e agresor despues cu denuncia a drenta. Fiscal tambe a duna orden pa e keda den custodia mientras autoridadnan ta investiga e incidente.

Comunidad ta condena acto violento

Na momento cu e caso a surgi riba red social, comunidad di Aruba a keda sorprendi y hopi a expresa nan critica pa e acto violento. Notablemente, varios den comentario tambe a lansa nan critica riba e doño y gerencia di e cas di cuido.

Segun comentarionan ta bisa, e agresor supuestamente ta conoci di ta un adicto cu un historia violento. P’esey hopi a cuestiona pakico a tuma un cliente cu un historia di adiccion y violencia, siendo cu e por crea un riesgo pa seguridad di e otro clientenan kedando den e centro. Otronan tambe a cuestiona unda personal di e centro a keda durante e asalto, y pakico no a interveni mas trempan pa preveni heridanan serio.

E comentarionan aki ta punta na un posible falta di supervision na momento cu e incidente a sucede, sugeriendo cu si tabatin personal cu ta controla frecuentemente durante dia y anochi, kisas e situacion no lo a escala pa un maltrato severo.

A pesar cu varios a bisa cu e agresor tabata un adicto, Bon Dia Aruba no por a verifica e declaracionnan aki.

Cuido di nos grandinan ta keda un deber comparti

E caso aki a surgi apenas un luna despues di Dia Mundial di Conscientisacion contra Maltrato di Adulto Mayor y ta keda un topico di importancia ora ta trata cuido di adulto mayor riba e isla. Mirando cu poblacion di Aruba ta embeheciendo—esta tin mas adulto pensionado cu adulto trahador—ta importante pa pone mas atencion riba con institutonan gubernamental, centronan di cuido y hasta individuonan den comunidad ta trata nos grandinan.

Den añanan recien, Aruba a haci progreso significativo pa fortalece servicio y cuido pa adultonan mayor. Por ehempel, creacion y fortalecemento di Directie Ouderenzaken a resulta den entre otro un reconocemento oficial tocante e importancia pa duna atencion y cuido na adultonan mayor, ademas di crea politica cu ta dirigi riba nan bienestar. E entidad tambe a lansa diferente iniciativa pa promove embehecemento saludable, inclusion social y acceso na informacion.

Preserva independencia di nos grandinan tambe a bira crucial pa sigura nan bienestar y promove un bida sano. Gobierno di Aruba a inverti den expansion di diferente centro di pasadia y ta keda ofrece sosten y actividadnan pa adultonan mayor keda activo den comunidad y mantene contacto cu nan ambiente y famia. Autoridadnan a indica cu esaki ta importante pa tanto na salud fisico como mental di nos grandinan.

Atendiendo salud mental di adultonan mayor riba e isla tambe ta e servicio di telefon pa adulto mayor. Cu e servicio aki adultonan mayor por tin un persona cu ken e por combersa un rato, asina preveniendo sentimento di soledad cu por afecta salud mental.

A pesar di e esfuersonan grandi pa nos grandinan, expertonan ta enfatisa cu prevencion di maltrato di adulto mayor ta rekeri participacion di henter comunidad. Famia, dunador di cuido, profesional di salud, institucion financiero, bisiña y organisacionnan comunitario tur tin un rol importante den reconoce señalnan di alerta y garantisa cu adultonan mayor ta haya e apoyo cu nan mester. Algun señal cu por indica posible maltrato ta heridanan inexplicabel, cambio repentino den comportamento, stop participacion den actividadnan social, falta di cuido personal of transaccionnan financiero sospechoso.

Na Aruba, hopi di e adultonan mayor di awe a contribui durante decadas na progreso di isla door di trabao, liderazgo familiar, trabao boluntario, y preservacion cultural, pues ta keda e deber di sociedad pa garantisa nan siguridad y dignidad durante e ultimo etapanan di nan bida.

E caso di maltrato na Tanki Leendert ta actualmente bao investigacion di cuerpo policial. Bon Dia Aruba lo keda al tanto cu cualkier informacion oficial nobo.