(AFP)—Un grupo di studiantenan Hulandes a presenta diamars loke nan ta kere ta e prome ambulance na mundo cu ta core riba energia solar. Nan ta spera cu e vehiculo por hiba cuido medico hopi necesario na e lugarnan mas isola di mundo.
E ambulance, cu tin un diseño moderno den color blanco y geel, tin panelnan solar riba dak cu ta suministra energia pa su motor y tambe pa aparatonan medico, for di mashin di X-ray te desfibrilador.
E ambulance di dos asiento, cu ta yama Stella Juva, por alcansa un velocidad di maximo 120 kilometer pa ora y a ser diseña pa core riba camindanan sin beton y dificil pa alcansa.
Cu un alcance di 715 kilometer riba un dia cu hopi solo, e vehiculo tin un bateria carga cu energia solar pa garantisa cu tanto e ambulance como e ekiponan medico por sigui funciona anochi of ora ta nubia.
“Stella Juva ta completamente ekipa pa brinda cuido medico den areanan dificil pa alcansa,” lider di e proyecto, Mathijs van Gerven, un studiante di 21 aña di ingenieria biomedical na Universidad Tecnologico di Eindhoven, a bisa.
A diseña E vehiculo pa hiba cuido medico cerca di e pashent, en bes di transporta e pashent bay hospital. E tin kitnan pa test di tuberculosis, espacio refrigera pa vacuna y un aparato di ecografia pa muhernan na estado.
E grupo ta planea biaha pa Kenia otro luna pa pone e ambulance na prueba.
Femke Maurits, gerente di Aliansanan na Amref Health Africa, un organisacion humanitario cu ta brinda servicio di salud den varios pais Africano, a bisa cu e innovacion ta responde na un necesidad urgente den practica.
“E problema cu hopi pais Africano tin ta cu e distancia entre pueblonan hopi isola y centronan di salud ta hopi grandi,” Maurits, di 34 aña, a declara na AFP.
“Tin poco transporte publico, combustible ta hopi caro y rednan di electricidad no ta confiable. Pues un innovacion hopi interesante manera Stella Juva por yuda nos enfrenta e gran retonan aki den prestacion di cuido medico,” el a bisa.
Hopi miembro di e grupo a pone nan estudio temporalmente na un banda pa traha riba e proyecto, cu a tuma un aña pa completa.
Na e parti dilanti di e vehiculo tin un panel cu ta mustra e velocidad actual y nivel di bateria, mientras cu e ekiponan medico ta warda den e parti patras.
Ora AFP a bishita e presentacion oficial, e paseo den e vehiculo tabata suave riba e camindanan di beton den e centro di prueba na Barneveld, den centro di Hulanda.
Pero Van Gerven y su grupo ta consciente cu e condicionnan den areanan isola di Kenia lo ta hopi diferente.
“Tin un nivel di resistencia cu nos mester tene na cuenta cune si nos kier maneha pafo di caminda… unda tin un necesidad grandi di cuido medico,” el a bisa na AFP, mustrando tairanan di reemplaso y shovel pa si acaso e ambulance keda pega.
Stella Juva ta un prototipo y Van Gerven a bisa cu ta necesario pa amplia e proyecto pa logra un impacto real.
“Nos ta 23 studiante y nos a traha esaki den apenas un aña. E industria tecnologico mester por haci esaki hopi mihor y hopi mas lihe,” el a bisa.
“Pues nos ta invita cualkier compania tecnologico y socio industrial: bin papia cu nos. Nos kier amplia e proyecto hunto cu boso.”
Segun Maurits di Amref, un di e bentahanan principal di un vehiculo cu ta funciona riba energia solar pa brinda cuido medico na un pais manera Kenia ta su adaptabilidad.
“E ta diseña pa cubri distancianan hopi grandi. E ta funciona cu energia di solo, pues ora e yega na un destino, e no mester bolbe na un punto central,” el a bisa.
“E por sigui bay.”
Isabella Wanningen, un studiante di informatica di 22 aña cu a traha riba e sistemanan di energia di e vehiculo, a bisa cu e nomber di e ambulance ta refleha loke e grupo ta spera di logra.
“Stella ta nos nomber di famia. Nos prome auto tabata yama Stella y nos a conserva e nomber ey pa tur auto cu nos a traha,” el a declara na AFP.
“Y naturalmente, nos kier haci un impacto den sociedad. ‘Juva’ na Latin ta nifica ‘yuda’. Pues nos kier expresa esey den e nomber tambe.”
