(AFP)—Prome minister di Canada, Mark Carney, a bisa diamars cu e ta evaluando “tur opcion” despues cu presidente Mericano Donald Trump a anuncia plan pa impone tarifa nobo di 50% riba hopi producto Candes dentro di 30 dia.
Carney tambe a bisa cu e y Trump a bay di acuerdo pa “intensifica discusionnan” den e proximo simannan tocante un posible acuerdo, pero e no a indica cu lo biaha pa Washington pa cualkier combersacion.
“Nos lo evalua tur opcion tocante con nos lo reacciona si e tarifanan ey drenta na vigor,” Carney a bisa reporteronan despues di papia cu Trump.
E tarifanan nobo lo afecta tur cos, for di biña Canades te palo di hockey y cement, pero e no lo aplica riba energia, potash y productonan cu ya ta cay bou tarifanan specifico pa sector.
Sin embargo, e tarifanan lo afecta productonan cu ta cay bou di e Acuerdo di Comercio Liber entre Merca, Mexico y Canada (USMCA), cu tambe lo ta tema di negociacion despues cu Washington a anuncia dia 1 di juli cu e no lo prolonga e acuerdo den su forma actual.
“E prome obhetivo ta pa logra un acuerdo integral,” Carney a bisa.
Desde cu Trump a bolbe na e presidencia aña pasa, el a impone tarifanan riba socionan comercial di Merca. Sin embargo, hopi di e medidanan tabata exclui productonan cu ta drenta Merca bou di USMCA.
Oposicion conservador di Canada a critica gobierno di Carney pa su maneho di e negociacionnan comercial y, en bes di esey, a pidi pa e pais sigui cu e plan pa “desblokea” su recursonan natural pa enfrenta e medidanan comercial di Trump.
