(AFP)—Curpa di un mucha muher jong cu a ser haya den bahul di auto di cantante Mericano D4vd tabata den descomposicion te na e punto cu tabata “imposibel pa reconoce”, un detective di polis a testifica diamars den un corte na Los Angeles.
D4vd, di 21 aña, kende su nomber berdadero ta David Anthony Burke, ta enfrenta varios cargo, incluyendo asesinato, den e caso di morto di Celeste Rivas Hernandez.
A haya su curpa den Tesla di Burke september pasa, apenas algun dia prome cu loke lo tabata su di 15 cumpleaños.
Detective Joshua Byers di Departamento di Polis di Los Angeles a testifica durante e prome dia di e audiencia preliminar. El a bisa cu ora autoridadnan a habri e bahul di Burke su auto den un deposito di vehiculonan cu autoridadnan a touw, el a reconoce e “holor caracteristico” di un curpa.
Durante e audiencia, a mustra potretnan di evidencia di e estado di e curpa di e mucha muher. Segun Byers, un saco grandi preto tabata contene su cabes y torso.
Ora nan a puntr’e si e por a reconoce algun rasgo di su cara, Byers a contesta: “No. Estado di descomposicion tabata hopi leu, te na e punto cu e cuero a cuminsa garna, haciendo e imposibel pa reconoce e victima.”
A haya su brasa y pianan den un otro saco. Byers a bisa corte cu “tabatin actividad di insecto. Tabatin larvanan y diferente etapa di musca.”
Burke, cu a asisti e audiencia bistiendo un uniforme oraño di prison, no a mustra reaccion ora a presenta e potretnan.
Fiscalnan a bisa cu e cantante a conoce e mucha muher ora e tabatin apenas 11 aña y cu nan a cuminsa un relacion sexual ora e tabatin 13 aña.
Grabacion di camara corporal mustra durante e audiencia diamars a mustra Burke bisando diputadonan di sheriff: “El a bisa mi cu e tabatin 18 aña. Tur hende ta bisa cu e tabatin 13.”
Mama di e victima a reporta su desaparicion na 2024 ora e tabatin apenas 13 aña.
Den e documentonan di acusacion, fiscalia ta alega cu Burke a mat’e despues cu Hernandez a menasa di haci nan relacion sexual publico, poniendo su carera musical den peligro.
Fiscalia tambe a yama Benjamin Greger, ex-gerente financiero di Burke, pa testifica tocante e posibel motibo financiero pa proteha su carera musical.
Greger a declara cu su ex-empleador a genera entre 10 miyon y 11 miyon dollar di entrada bruto for di su musica entre 2023 y 2025.
Burke a nenga e cargo di asesinato, abuso sexual continuo di un mucha bou di 14 aña y mutilacion ilegal di curpa humano. Si corte declar’e culpabel, e por enfrenta cadena perpetua of castigo di morto.
Fiscal di condado Los Angeles, Nathan Hochman, a bisa cu e audiencia preliminar, den cual un hues lo determina si e caso lo sigui pa huicio, lo dura “tres te cinco dia.”
“Nos ta kere cu nos lo presenta mas cu suficiente evidencia pa establece causa probabel pa David tuma responsabilidad pa e tres cargo criminal serio aki,” Hochman a bisa prensa.
