(AFP)—Punch, e baby macaco Hapones cu a bira un sensacion mundial riba internet mientras e tabata tene un peluche di orangutan pa haya consuelo, lo celebra su prome cumpleaño diadomingo, mientras su zoologico ta ricibi miles di carchi di felicitacion for di tur parti di mundo.
Despues cu su mama a bandon’e y algun otro macaco no a acepa’e, e macaco hoben a bira famoso despues cu hende a mir’e ta tene un peluche di orangutan di IKEA pa haya consuelo na Zoologico Municipal di Ichikawa, pafo di Tokyo.
Na februari, e zoologico a cuminsa publica videonan riba rednan social di e esfuersonan di Punch pa uni cu su grupo, loke a crea un grupo di fanaticonan devoto bou di e hashtag #HangInTherePunch.
E ta creciendo bon, ta den bon salud y awor ta hungando cu e otro macaconan, un oficial di e zoologico, Takashi Yasunaga, a bisa AFP diabierna.
“Poco poco e ta lagando e peluche di orangutan atras. E ta comunica cu e otro animalnan y ta hunga cu e baby macaco,” el a bisa.
“E ta construyendo su posicion como miembro di e grupo.”
E zoologico, cu anteriormente tabata ricibi como maximo par centenares di bishitante pa dia, a bira un atraccion pa miles di fanaticonan local y internacional.
E facilidad tambe a ser inunda cu yamada y emailnan. Algun ta elogia e esfuerso di e zoologico, pero hopi otro ta critica e manera cu Punch ta ser cuida.
Prome cu e cumpleaño diadomingo, a pone aproximadamente 2.500 carchi di felicitacion for di tur parti di mundo na exhibicion. “Punch tabata tur caminda riba TikTok. Videonan tabata keda surgi. E ta simplemente hopi tutu. Y mi pareha stim’e. Mi tambe stim’e,” turista Mericano Sarren Eilers a bisa diabierna.
“Mi a mir’e den videonan y mi a pensa cu mi mester bin mir’e personalmente.”
Na algun momento, fama di Punch tambe a hala atencion negativo. Na mei, algun YouTubernan Mericano a drenta ilegalmente den e area di e macaconan, y luna pasa un persona cu no a ser identifica a apunta un laser riba e animalnan.
Entretanto, e zoologico a usa fama di Punch pa pidi donacionnan y te mitar di juli a recauda 58 miyon yen (350.000 dollar), placa cu a paga pa un sistema nobo di airco.
“Danki na popularidad di Punch, henter e grupo di macaconan y henter e zoologico a beneficia di condicionnan mehora,” Yasunaga a bisa.
Awor Punch ta pasa gran parti di su dia descansando bou di sombra y ta bira mas activo den oranan fresco di atardi.
Fanatico local Junko Hara, di 38 aña, a bisa cu Punch ta “hopi fuerte y resistente.”
“E nunca ta desanima. Mi ta admira e perseverancia ey y mir’e ta anima mi tambe,” Hara a bisa AFP.
Otro fanatico, Yukie Mibayashi, di 66 aña, a bisa: “Hende di tur parti di mundo ta apoyando Punch, pues mi kier bis’e: ‘Tur hende ta wak bo. Sigui asina!’”
