Banco Central di Aruba (CBA) a cera aña 2025 cu un fortalecemento significativo di su posicion financiero. E estadonan financiero condensa publica recientemente ta mustra cu e total di activonan di e institucion a crece for di Afl. 3.49 biyon na fin di 2024 pa Afl. 4.11 biyon un aña despues. Na mesun momento, CBA a registra un ganashi netto di Afl. 110.9 miyon, surpasando e resultado di Afl. 70.4 miyon registra e aña anterior. E crecemento aki ta resultado principalmente di un aumento den e balor di e reserva di oro, miho resultado di inversion den exterior y un fortalecemento di e reservanan monetario cu CBA ta administra.
CBA ta responsabel pa mantene stabilidad monetario, emiti e florin Arubiano, administra e reservanan oficial di e pais y supervisa diferente institucion financiero. E estadonan financiero no solamente ta mustra e situacion economico di e institucion mes, sino tambe ta ofrece un bista riba e manera cu e reservanan internacional di Aruba a evoluciona durante 2025.
Un di e cambionan mas importante den e balans ta e aumento fuerte den e balor di e reserva di oro. E cantidad fisico di oro cu CBA ta posee a keda igual, pero e prijs internacional di oro a subi considerablemente durante 2025. Como consecuencia, e balor di e reserva a aumenta for di Afl. 520.1 miyon pa Afl. 858.2 miyon, un aumento di mas cu Afl. 338 miyon. E rapport ta indica cu, entrante 2025, CBA a cuminsa reevalua su oro mensualmente en bes di cada tres luna, permitiendo cu e balans refleha e movemento di mercado mas lihe.
Tambe e reservanan den moneda di exterior a crece. E total di activonan den divisa di exterior a aumenta for di Afl. 2.94 biyon pa Afl. 3.21 biyon. E categoria aki ta inclui cuentanan bancario, inversionnan den titulo financiero y otro activonan manteni principalmente den dollar Mericano.
Un di e aumentonan mas notable tabata den e saldo cu CBA tin na diferente banco y institucion financiero internacional. E saldo aki a casi duplica, yegando Afl. 265.2 miyon. Segun e rapport, e crecemento tabata principalmente consecuencia di e entrada di fondo relaciona cu un prestamo den exterior adkiri pa Gobierno di Aruba, cu despues a ser deposita temporalmente na e cuenta di Banco Central na Federal Reserve Bank of New York. Na mesun momento, un deposito na Colombia a vence, compensando parcialmente e aumento.
CBA tambe a sigui inverti gran parti di su reservanan den titulo financiero internacional. E balor di e inversionnan den papelnan gubernamental y otro instrumento financiero a subi for di Afl. 2.78 biyon pa Afl. 2.92 biyon. E rapport ta atribui e crecemento ey na interes ricibi durante e aña, un aumento den e balor di mercado di portofolio y un resultado positivo di e inversionnan. CBA ta sigui un strategia conservativo, inverti principalmente den titulo emiti pa gobierno di Merca y otro institucion cu tin un calificacion crediticio halto.
Durante 2025 tambe a crea un portofolio nobo di inversion pa termino mediano cu un balor inicial di USD 150 miyon. Segun e documento, e inversion aki a contribui na un aumento den interes acumula riba e reservanan den exterior y ta forma parti di e strategia pa optimisa e rindimento di e activonan financiero.
Banda di infrastructura, CBA a sigui inverti den su facilidadnan. E balor di proyectonan ainda den construccion a aumenta di Afl. 3.4 miyon pa Afl. 6.3 miyon. Algun inversion existente, manera edificio, sistema di computer y ekipo di seguridad, a sigui ser modernisa durante e aña.
Otro desaroyo importante ta e aumento den biljet den circulacion. Na fin di 2025 tabatin Afl. 426.4 miyon den biljet circulando den economia Arubiano, compara cu Afl. 356.2 miyon un aña prome. E biljet di Afl. 100 a keda e denominacion cu mas ta circula. E rapport tambe ta indica cu mas cu 96% di tur biljet actualmente den circulacion ta pertenece na e serie introduci na 2019.
E resultado general ta indica cu CBA a fortalece considerablemente su posicion financiero durante 2025. E crecemento di e reservanan internacional, e apreciacion di oro y e resultado positivo di e inversionnan a contribui na un balans mas fuerte.
E fortalecemento di e balans general di CBA tambe a refleha den su resultado operativo. Durante 2025, CBA a registra un ganashi netto di Afl. 110.9 miyon, compara cu Afl. 70.4 miyon den 2024. Segun e estadonan financiero, e resultado mas fuerte ta principalmente consecuencia di un aumento den entradanan proveniente di e reserva y inversionnan den exterior, mientras cu e gastonan operacional a crece na un ritmo mas limita.
E entrada total diCBA a yega Afl. 148.6 miyon durante 2025. Di esaki, Afl. 125.8 miyon a bin di entrada netto di interes, un aumento considerable compara cu e aña anterior. E rapport ta indica cu e mehoracion aki ta relaciona cu e rindimento di e portofolio di inversion, e interes ricibi riba diferente activo financiero y maneho di reservanan internacional. Ademas, CBA a registra Afl. 22.8 miyon den otro tipo di entrada, incluyendo operacionnan di cambio di divisa, ingreso relaciona cu moneda, compensacion pa margen di cambio y diferente ingreso administrativo.
Pa loke ta gastonan, CBA a registra un total di Afl. 37.8 miyon. Gastonan di personal a subi pa Afl. 23.7 miyon, mientras cu gastonan operacional a alcansa Afl. 10.6 miyon. E aumento tabata principalmente consecuencia di inversion den tecnologia, servicio di consultoria, capacitacion di personal y mantenemento di facilidadnan. Na fin di 2025, CBA tabatin 123 empleado full-time, 11 mas compara cu e aña anterior.
E rapport ta mustra tambe cu e cantidad di fondo cu ta ser manteni na Banco Central a cambia durante 2025. E deposito di residente a aumenta for di Afl. 2.38 biyon pa Afl. 2.57 biyon. Specialmente notable ta e crecemento den e deposito di Gobierno di Aruba, cu a subi for di Afl. 116 miyon pa casi Afl. 296 miyon. Na mesun momento, e deposito di banconan comercial a keda relativamente stabiel, aunke e composicion di e fondo a cambia un poco.
Durante e aña, CBA tambe a adapta algun di su instrumentonan di politica monetario. E porcentahe di reserva obligatorio cu banconan comercial mester mantene deposita na CBA a baha di 15.5% pa 12.5%. Ademas, durante november y december 2025, banco central a reduci gradualmente e interes paga riba depositonan na plaso. E medidanan aki ta forma parti di e maneho monetario cu CBA ta usa pa regula e nivel di likides den e sistema bancario.
Otro desaroyo importante tabata e crecemento di e cuenta di reevaluacion. E cuenta aki a aumenta di Afl. 391.2 miyon pa Afl. 772 miyon. Segun e rapport, e aumento ta casi completamente resultado di e fuerte apreciacion den e balor di oro y di e mehoracion den e balor di e port-folio di inversion. Conforme e ley, cambionan den e balor di oro, divisa y cierto activonan financiero no ta forma parti directo di e ganashi anual, sino ta ser registra den e cuenta di reevaluacion.
Capital y reservanan propio di CBA tambe a bira mas fuerte. E reserva general a aumenta pa Afl. 106.7 miyon, mientras cu un parti di e ganashi reteni a keda disponible pa fortalece e base financiero di e institucion. Durante 2025, Gobierno di Aruba tambe a ricibi un pago di Afl. 20 miyon, corespondiente na distribucion di un parti di e ganashi di añanan anterior despues di aprobacion di minister di Finanzas.
Na mesun momento, banco central a sigui inverti den su infrastructura. E rapport ta menciona compromiso financiero pa construccion di un edificio nobo, instalacion di sistema di airco y trabounan electrico. Ademas, Ernst & Young, e auditor externo di CBA, a confirma cu e estadonan financiero condensa ta consistente cu e cuenta anual audita y cu no tabatin evento importante despues di 31 di december 2025 cu por a cambia significativamente e situacion financiero di e institucion.
E resultado di 2025 ta confirma cu Banco Central di Aruba tabatin un aña financiero particularmente fuerte. Apreciacion di oro, un miho rendimento di inversion, entrada di interes mas halto y un crecemento den e reservanan oficial a contribui pa fortalece e balans di e institucion. Aunke parti di e resultado positivo ta relaciona cu movemento den mercadonan financiero internacional, e rapport ta mustra cu CBA a sigui aplica un maneho prudente di su activonan y a mantene un posicion financiero solido, cu ta importante pa sostene stabilidad monetario y confiansa den e sistema financiero di Aruba.
