“Yabi den bo Man”: FCCA ta lansa campaña di 20 cas cu tereno eigendom y hipoteca facilitando acceso na cas propio

Den un momento unda e costo di cumpra un cas ta sigui subi y hopi famia ta enfrenta dificultad pa drenta den mercado di vivienda, Fundacion Cas pa Comunidad Arubano (FCCA) a presenta un iniciativa nobo cu kier simplifica e proceso pa bira doño di un cas y tereno.

Cu e campaña “Yabi den bo Man”, e fundacion kier ofrece un trayecto completo unda e cliente solamente mester concentra riba e proceso di solicita un hipoteca, mientras cu FCCA ta encarga cu e otro aspecto relaciona cu construccion y entrega di e vivienda.

E iniciativa ta bin den un momento cu e tema di vivienda ta ocupa un lugar cada biaha mas importante den e debate publico na Aruba.

Durante e ultimo añanan, e combinacion di prijsnan di cas cu a subi rapidamente, aumento den costo di construccion, escasez di tereno disponibel y tasa di interes cu durante un periodo tabata relativamente halto, a haci cu bira doño di un hogar ta un reto pa hopi famia, specialmente pa hoben y personanan cu ta cumpra nan prome cas.

Segun FCCA, e campaña ta busca elimina gran parti di e preocupacionnan cu normalmente ta acompaña un proyecto di construccion. Na lugar di e cliente mester pasa pa diferente etapa cu arkitecto, contratista, permiso y coordinacion di trabaonan, e fundacion ta asumi e responsabilidad pa regla e proceso completo.

Esaki ta nifica cu e cumprado no solamente ta haya un hipoteca, sino tambe un cas completamente cla, cu por ser ocupa mesora despues di entrega. Ora e proyecto ta cla, FCCA ta entrega literalmente e yabi di e cas na e propietario nobo.

Pa e campaña aki tin un total di 20 cas disponibel. Di nan, 17 ta situa na Rooi Bosal y tres ta localisa na Shaba. E casnan no ta tur igual. Tin opcionnan cu dos of tres camber, un of dos baño, mientras cu tamaño di e terenonan tambe ta varia.

Na Rooi Bosal, e casnan ta construi den estilo di “rijtjeswoning”, un modelo cu ta comparti muraya lateral y cu ta permiti uza e tereno di forma mas eficiente. E tamaño di e terenonan na e proyecto aki ta varia entre 83 y 283 meter cuadra. Na Shaba, e casnan ta “alleenstaande”, un cas so riba un tereno y ta construi riba terenonan mas grandi.

Den tur caso, e tereno ta eigendom di e cumprado, un aspecto cu FCCA considera importante pa crea un inversion duradero pa e famianan.

E prijsnan di e casnan na Rooi Bosal ta entre AWG. 307,895 y AWG. 366,800 y na Shaba e prijsnan ta entre AWG. 311,745 y AWG. 324,717.

E fundacion a splica cu registracion pa e campaña aki ta exclusivamente online. E periodo di inscripcion lo habri oficialmente dialuna 17 di augustus pa 9:00 di mainta y lo cera dialuna 31 di augustus. E peticionnan lo ser procesa den e mesun orden cu nan drenta, cu e meta di garantisa un procedemento cu FCCA ta considera transparente y husto.

Pa por completa e solicitud, e personanan mester carga diferente documento, incluyendo un prueba valido di identidad y documentacion cu ta demostra entrada. Dependiendo di con e solicitante ta cobra su salario, e cantidad di payslip cu mester presenta ta varia. Personanan cu ta ricibi entrada adicional manera comision, tips of otro remuneracion variable, tambe mester presenta evidencia di e entradanan ey.

FCCA a recorda cu pa por solicita un hipoteca, e interesado mester ta residente di Aruba. Ademas, aprobacion semper lo depende di un evaluacion financiero completo y un screening positivo.

E fundacion a indica cu den caso cu un solicitante no logra reuni tur e rekisitonan pa un di e casnan, lo analisa tambe otro posibilidadnan pa mira si tin un forma di yuda e cliente logra su meta di bira propietario.

E fundacion a informa cu e prome casnan na Rooi Bosal por ta cla pa entrega aproximadamente seis luna despues di e proceso di compra. Den e caso di Shaba, despues cu e acto di traspaso tuma lugar, e periodo calcula pa entrega ta entre seis y siete luna desde e fecha di e traspaso.

Segun FCCA, e campaña “Yabi den bo Man” ta representa solamente e comienso di un concepto cu por sigui crece. E fundacion a indica cu si e acogida di e mercado ta positivo, tin mas proyecto den preparacion cu por sigui e mesun modelo.

Un di e elementonan principal cu FCCA kier desaroya ta construccion di mas rijtjeswoning. Segun e fundacion, e tipo di vivienda aki ta permiti construi mas unidad riba un area relativamente limita. Como resultado, e tereno pa vivienda lo ta mas chikito loke ta contribui pa mantene e prijs final mas accesibel pa e cumprado.

E posibilidad di construi mas vivienda riba menos tereno ta bira cada biaha mas relevante pa Aruba. Como un isla cu tin un superficie limita, disponibilidad di tereno ta keda un factor importante den desaroyo di vivienda. Na mesun momento, e demanda pa cas ta sigui aumenta.

Durante e ultimo decada, Aruba a experimenta un aumento constante den prijs di vivienda.

E crecemento economico, aumento di costo di material di construccion, escasez di man di obra den sector di construccion y demanda sosteni pa propiedad a contribui pa haci e mercado cada biaha mas dificil pa personanan cu ta busca nan prome cas.

Pa hopi pareha hoben, e paso di cumpra un cas a bira un proceso cu ta tuma hopi mas tempo cu anteriormente. Den hopi caso, famianan mester keda biba cu mayor of otro familiar pa varios aña prome cu logra reuni e entrada necesario pa un hipoteca. Otro grupo ta bira dependiente di huur, mientras cu e prijs di huur tambe a subi considerablemente den e ultimo añanan.

Expertonan di sector financiero a señala regularmente cu un di e obstaculonan mas grandi pa cumprado di prome cas ta e combinacion di costo di construccion y disponibilidad limita di vivienda cu ta realmente pagabel. E resultado ta cu, aunke tin demanda, e oferta di cas cu por ser paga pa famianan cu entrada promedio no semper ta suficiente.

Den e contexto ey, iniciativanan manera “Yabi den bo Man” por representa un paso importante pa amplia e oferta di vivienda cu ta orienta specificamente riba e segmento di famianan cu kier bira propietario.

Si e campaña logra e resultado cu FCCA ta spera, e por representa un modelo cu por sigui expande den diferente bario di Aruba. Specialmente den un periodo unda e necesidad di vivienda accesibel ta sigui aumenta, e posibilidad di desaroya mas proyecto riba tereno propio di FCCA por crea un fluho continuo di casnan nobo pa mercado local.

Aunke 20 cas no lo por resolve e reto di vivienda cu Aruba ta enfrenta, e iniciativa ta agrega un opcion adicional den un mercado cu hopi biaha ta caracteriza pa oferta limita y prijs relativamente halto.

Pa famianan cu logra reuni e rekisitonan financiero, e campaña por representa un oportunidad pa evita e incertidumbre cu normalmente ta compaña construccion di un cas y drenta directamente den un hogar completamente cla.