(Curacaochronicle) – Banco Central di Corsou y Sint Maarten (CBCS) a publica su Rapport Anual 2025, reflexionando riba un aña historico marca pa un ganashi record di aproximadamente Cg 66.9 miyon y e introduccion historico di Florin Caribense na Corsou y Sint Maarten riba 31 di maart.
E ganashi di 2025 a aumenta cu Cg 20.3 miyon compara cu 2024. E aumento ta, na gran parti, resultado di e strategia activo di maneho di inversion di Banco. E entrada mas halto for di inversionnan a compensa ampliamente e baha den entrada neto di interes.
Entrada neto di interes a baha debi na gastonan di interes mas halto relaciona cu aumento den e promedio di Certificates of Deposit pendiente y interes mas halto paga riba cuenta coriente. E ganashi mas halto a ser apoya tambe pa gastonan mas abao, debi na liberacion di un provision pa cuentanan dudoso despues di pagonan ricibi riba debenan pendiente.
Ademas di e ganashi record aki, introduccion exitoso di Florin Caribense tabata sin duda e logro mas importante di e aña. Introduccion di Florin Caribense riba 31 di maart 2025 a representa finalisacion exitoso di un di e proyectonan mas grandi den historia di CBCS. Despues di añanan di preparacion cuidadoso, e transicion a ser completa suavemente door di cooperacion estrecho entre CBCS, banconan comercial, gobiernonan, comerciante y otro stakeholdernan. Sistemanan di pago a keda completamente operacional durante henter e cambio, permitiendo cu e moneda nobo bira parti di bida economico diario den un periodo cortico.
E banco tambe a logra progreso significativo den politica monetario, supervision financiero, modernisacion di sistema di pago, stabilidad financiero y desaroyo organisacional.
Durante henter 2025, politica monetario a keda enfoca riba preserva stabilidad di di tasa di cambio, mientras ta mantene reservanan internacional adecua. CBCS a fortalece mas su marco di supervision via supervision AML/CFT/CFP mehora y basa riba riesgo, continuacion di alineacion cu standardnan regulatorio internacional y expansion di su toolkit macroprudencial pa identifica y mitiga riesgonan sistematico miho.
E Sistema di Garantia di Deposito a drenta na vigor na Corsou, mientras preparacionnan a continua pa su implementacion na Sint Maarten. Ademas, pasonan adicional a ser tuma pa modernisa e sistema di pago via migracion pa standardnan ISO 20022 y desaroyo continuo di caso di uso pa pago instantaneo.
Aña pasa a marca tambe finalisacion exitoso di e Plan Strategico CBCS 2022–2025. CBCS a lansa dashboardnan interactivo nobo, completa un revision strategico di sector financiero, desaroya un roadmap nobo di IT y participa den un IMF Central Bank Transparency Code Review. E logro nan aki a pone e base pa e Plan Strategico nobo 2026–2028, construi rond di e vision “Impulsa pa innovacion, enfoca riba confiansa.” E strategia 2026–2028 lo guia esfuersonan di CBCS pa bira un banco central completamente digital y basa riba dato.
