(AFP) – Un corte estatal na Merca a duna ordo na Meta pa paga $567 miyon y limita algun funcion pa muchanan riba su plataformanan Facebook y Instagram, bisando cu e gigante di rednan social a crea un “molestia publico” cu a pone usuarionan hoben na peliger.
E sentencia na New Mexico riba diahuebs ta bin ariba un multa anterior di $375 miyon den e mesun caso na maart, ora un hurado a haya e gigante di rednan social responsabel pa haci hobennan vulnerabel pa depredadornan riba su plataformanan.
Mientras Meta a bisa cu e lo apela, e decision ta establece un precedente na un momento cu decenas di otro estado Mericano ta sigui demandanan cu ta alega daño na muchanan y nan salud mental, incluyendo un caso grandi contra Meta cu ta programa pa cuminsa na California otro siman.
Rond di tres kwart di e pago di $567 miyon cu a duna ordo riba diahuebs lo ser reserva pa un fondo di tratamento di salud mental, cu mester paga durante cinco aña.
E resto lo ser asigna na programanan pa “conscientisacion y prevencion” di peligernan potencial pa hobennan y pa sigura cu Meta implementa e cambionan ordena.
Limitenan riba conteo di ‘like’
Hues Bryan Biedscheid a bisa den su sentencia cu adolescentenan ta particularmente susceptible na funcionnan diseña pa captura y aumenta loke ta yama engagement, manera autoplay, scrolling infinito, conteo di like, push notification y recomendacionnan algoritmico.
El a duna ordo na Meta pa limita push notification y uso na 90 ora pa luna pa usuarionan bao di 18 aña, of rond di tres ora diario den promedio, y tambe pa blokia cierto notificacionnan completamente durante oranan di scol.
Meta mester sconde tambe conteonan di “like” y sigui esfuersonan pa sigura cu muchanan na New Mexico cu tin menos cu 13 aña no por drenta Facebook of Instagram.
Meta lo mester entrega tambe actualisacion na corte dos biaha pa aña tocante su esfuersonan pa cumpli.
“Nos no ta di acuerdo cu e sentencia y lo apela,” Meta a bisa na AFP den un comunicado. E compania a bisa cu e ta keda “confia den nos historia di proteccion di adolescentenan online y lo sigui defende nos mes contra afirmacionnan cu ta representa e hechonan di forma fout.”
