E siman aki a surgi un video riba red social den cual artista conoci F. Jacobs a conta tocante un experencia cual el a bisa a lag’e “traumatisa.” Aki tabata trata di un redada di SWAT team na un compleho di apartamento na Tanki Leendert durante cual agentenan a lanta y saca personanan for di nan cas anochi laat den busca di un sospechoso supuestamente bibando ey.

Manera Jacobs ta conta, e incidente a tuma luga rond 11or di anochi, ora e tabata relahando riba cama cu headphones bisti ta wak pelicula. Diripiente el a tende un zonido duro y a mira agentenan di SWAT team drenta su camber exigiendo pa e “para keto”. Jacobs a conta cu e no a anticipa ningun hende y pues no tabatin paña bisti. Agentenan a ofrec’e un jockey pa e bisti prome cu a sac’e for di su cas.

Na momento cu el a sali, el a mira algun di su bisiñanan tambe saca pafo, cu algun riba suelo y otronan wanta pa autoridadnan. Segun e ta conta, e tabata e unico cu tabatin apenas un jockey bisti, cual el a insinua tabata un experencia humiliante. Tabata e ora ey cu el a compronde cu autoridadnan tabata buscando pa un persona sospechoso di actividadnan ilicito cu supuestamente tabata biba na e mesun compleho. El a sigui conta cu ora fiscal a yega na e sitio, el a apela pa busca den su cas y camber si mester, pero pa no lag’e wanta pafo den e estado cu e tabata aden. Acompaña cu su relato, e artista a mustra con agentenan a kibra su porta pa por drenta, cual lo tabata e zonido duro cu el a tende prome.

Pa e musico y presentador, e incidente aki tabata algo cu e nunca a yega di experencia, y claramente a laga un efecto grandi riba dje. Den su video, el a reconoce cu polis tin su trabao pa haci pero a conta cu e tabata traumatisante p’e, hasta lagando e sin por drumi. “Mi a paga pa otro hendenan cu ta haciendo malo.”

Den comentarionan, siguidornan di e artista a duna palabranan di consuelo p’e y ta enfatisa e efectonan psicologico cu un suceso asina por tin pa un ciudadano inocente:

“Jammer jammer jammer……pa nan a haci loke nan a haci ta pasobra nan a haña ordo pa hacie. Pero e humiyacion ta sin palabra.”

“Esaki ta experiencianan traumatico cu ta bai laga cicatriz nan grandi den bo bida. E ta un trauma psychologico. Bo a perde algo hopi importante pa bo. Den caso di perdida semper ta sigi cu un periodo di rauw. Un periodo cu por bai cu dianan di yoramento, depresividad, rabia y puntrando bo mes pakiko esaki a pasa cu bo, culpando otro etc.”

Otronan a condena e maneho di autoridadnan y a urgi pa e artista busca compensacion di gobierno:

“Mi ta kere a jega e momento pa demanda un Daño y Perhuicio!!! Pasobra hasi inbraak y destrui propiedad, kende ta bai paga esaki??? NA PROME LUGA; E POLIS/NAN MESTER TIN UN BEVEL DI JUEZ PA NAN DRENTA BO CAS OF PROPIEDAD!”

“Si nan sa ken nan ta buscando, pero no den cual app e persona ta biba, no por a bay na e doño prome y laga e mustra kende ta biba den cua app? Pa asina nan haci na trabou dirigi? Envez di actua a la gestapo?”

Un yamado na parlamento

Un otro figura conoci den comunidad—Sr. Jayburtt Dijkhof—tambe a duna un reaccion tocante e incidente.

Den su video publica riba red social, el a duna mas contexto di e anochi aki. Segun e ta conta, banda di Jacobs, tabatin shete otro habitante bibando na e compleho na Tanki Leendert cu tambe a ser saca for di nan cas—algun despues di ser lanta abruptamente pa SWAT team.

Manera Dijkhof ta subraya den su video, proteccion pa hende inocente den operacion di autoridadnan policial den e caso aki a laga hopi di desea. E ta splica cu articulo 1.17 di constitucion di Aruba ta garantisa privacidad di ciudadanonan den nan cas y ta stipula cu autoridadnan no por drenta cas di un persona sin apoderado di hues. Segun Dijkhof, si haci esaki, mester percura cu e operacion ta lo menos invasivo posibel pa e ciudadano. Ta cla for di experencia di Jacobs (y otronan) cu esaki no tabata e caso; autoridadnan no a cumpli cu e articulo cu procedura penal, Dijkhof ta enfatisa.

Tambe a clarifica cu un fiscal Hulandes a yega na e sitio y a bisa tur hende despues cu a saca nan, kico e intencion tabata. Segun e fiscal a splica e ciudadanonan, autoridadnan mester a saca tur hende pasobra nan no tabatin e number di cas di e sospechoso. Sinembargo—manera Dijkhof ta conta—fiscal no a menciona intencion pa duna copia di apoderado di hues. Tampoco a haci mencion cu lo tin un rapport disponibel pa personanan aki busca nan derecho.

Y e falta di consideracion aki ta lanta pregunta tocante con ciudadanonan inocente por haya proteccion den un situacion similar, of si nan lo haya proteccion mes. Te cu nos sa, e personanan aki no a haya sosten psicologico of al menos di Slachtofferhulp. Pa loke ta busca husticia pa invasion di privacidad, Dijkhof ta cuestiona con e victimanan por entrega keho pa e maneho di Recherche Samenwerkingsteam (RST). Segun e experto di ley ta splica, RST no ta cay bao Bureau Interne Zaken en Onderzoeken (BIZO), sino bao procurador general di Aruba, cu ken no ta facil pa tene un audiencia. Locual ta probabel di pasa ta cu procurador general lo manda e keho pa Landsrecherche, unda ta conoci cu tin escasez na Aruba. Tanten cu OM no haya chance pa procesa e keho, no por acerca ombudsman tampoco. Pues Dijkhof ta puntra, si tur caminda ta blokia, unda e victimanan por bay? E dokter den ley ta haciendo un yamado na parlamento pa un reaccion riba con ta bay sigui atende casonan asina.

Manera e ta subraya, no por descarta e aspecto humano den tipo di operacionnan asina, y sigur no por laga ciudadanonan inocente un banda den buskeda pa husticia. Pa usuarionan den comentario, e situacion ta uno alarmante y ta renoba frustracion atrobe tocante comportamento iresponsabel y abuso di poder na man di agentenan policial.

Bon Dia Aruba a tuma contacto cu Korps Politie Aruba (KPA) pa un reaccion riba e incidente, pero te ciere di e edicion aki no a logra haya contesta.

Potret saca for di video publica pa Francis Jacobs riba Facebook.