Un grupo di 114 studiante Arubano cu a sali diaranson for di Aruba a yega bon Hulanda, unda nan lo sigui nan estudio na diferente hogeschool y universidad den e pais.
E studiantenan a sali for di Aruba cu un vuelo di KLM, cuminsando asina un etapa nobo den nan trayectoria academico. Nan a yega na aeropuerto Schiphol na Amsterdam, unda tabatin diferente persona presente pa ricibi y asisti nan cu e siguiente parti di nan biahe.
Na Schiphol, Minister Plenipotenciario di Aruba, Mildred Schwengle, a ricibi e studiantenan. Personal di Gabinete di Aruba na Hulanda, mentornan di estudio y miembronan di Plaatselijke Opvangcommissie (POC) tambe tabata presente na aeropuerto pa asisti y percura pa e proceso di yegada cana bon.
Despues di colecta nan maletanan y sali den e area di yegada, e studiantenan a saca potret, a papia cu representantenan di prensa y despues a prepara pa sigui cu bus pa nan respectivo ciudad di estudio den diferente parti di Hulanda.
Pa hopi di e hobennan, e biahe aki ta marca e comienso di varios aña di estudio leu for di Aruba. Ademas di cuminsa nan estudio, nan lo mester custumbra cu un ambiente nobo, un otro sistema di enseñansa y bida independiente na Hulanda.
Bon Dia Aruba ta desea nan tur clase di exito.
