Un temblor na Colombia a causa momentonan di angustia y incertidumbre entre varios Arubiano cu actualmente ta na e pais, incluyendo pashent y acompañantenan cu ta na Colombia pa tratamento medico. Residentenan Arubiano a conta nan experiencia di evacuacion, edificionan moviendo y personanan den panico tratando di busca un lugar sigur.

Tanto Gobierno di Aruba como AZV ta pendiente di e situacion y di e Arubianonan cu actualmente ta na Colombia. Mientras autoridadnan ta tratando di establece cuanto Arubiano ta den e pais y unda nan ta, AZV ta enfoca particularmente riba su aseguradonan cu ta Colombia pa tratamento medico.

Ex politico Ricardo Croes, cu ta na Colombia hunto cu su famia, a conta Bon Dia Aruba su experiencia durante e momento di susto. El a splica cu nan tabata na piso 12 di La Cardio Infantil ora e temblor a cuminsa. Segun Croes, e movemento di e edificio a haci evacuacion dificil y a causa hopi panico entre e personanan presente.

“Danki Dios nos ta bon pero e susto tabata hopi mes. Nos tabata na piso 12 di La Cardio Infantil ora cu el a cuminsa. Tabata hopi dificil pa cana y baha trapi mientras cu e edificio tabata move duro di un banda pa otro. Tanto na banda como patras y dilanti. Hopi hende gritando y yorando. Hopi hende no tabata ni full bisti cu paña y mester a evacua asina mas lihe posibel,” el a conta.

Croes a describi e experiencia manera algo completamente nobo y emocional. Durante e evacuacion, segun su relato, escombro tabata cay mientras cu nan tabata baha trapi. E incertidumbre tocante si e edificio lo por a resisti e movemento a haci e momento ainda mas intenso.

“E la sinti manera algo di otro mundo manera algo cu ta otro hende so ta pasa aden. Tabata manera un cos cu na ki momento cu ta e edificio ta bay derumba. Ya mi a pasa man pa mi casa y duna Dios danki pa tur cos y prepara pa bisa ayo hunto man teni. Hopi duro y emocional,” el a expresa.

Hasta despues cu e temblor a stop, e emocionnan tabata halto. Croes a indica cu ainda despues cu a stop di tembla e tabata sinti e emocion di loke a sucede. Alabes, el a expresa gradicimento cu e personanan na La Cardio tabata bon. “Ainda aworaki mes skirbiendo mi ta sinti e emocion di tristesa. Nos ta masha gradici cu aki nan na La Cardio tur hende ta bon,” el a bisa.

Segun Croes, despues di mira videonan di otro lugarnan, nan a compronde cu e impacto tabata mas severo den otro parti di Colombia. El a menciona Pereira y Cali den su relato y a compara e situacion cu un pelicula.

“E desordo cu e temblor ta causa ta duro. Turestempo cu nos ta baha trapi tin escombro ta cay. Mescos cu den pelicula. Algo increibel y completamente nobo pa mi. Nunca nos a pasa den algo asina,” el a subraya.

Otro dos residente Arubiano na Colombia tambe a comparti nan experiencia. E prome residente a conta cu tabata su prome biaha pasando door di un situacion asina. “Tabata hopi espantoso tabata mi prome biaha. Mi nunca no a pasa den un cos asina. Mi a wanta na un palo di luz. Mi no sa pakico mi a hacie, pero mi tabata asina spanta cu mi a hasta yora asina hopi y mi no tabata sa kico tabata pasando den e momento ey. Pero danki Dios unda nos ta kedando nada no a pasa. Na otro lugarnan si, lastimamente tin edificionan a cay y cu morto tambe,” el a conta.

E otro residente a conta cu nan a lanta normal bay come y alarmanan den cercania a cuminsa zona. Ora el a realisa cu tabata trata di un temblor, e personanan rond di dje a cuminsa core sali pafo.

“Nos a bay desayuna, nos ta canando y diripiente tur e alarmanan a cuminsa zona aki banda. Mi a realisa ta un temblor y tur hende a cuminsa core sali pafo. Tabata hopi eng pasobra e no kier a caba, el a dura basta seconde prome cu el a pasa. Nos a tene na un palo di luz segun cu tabata tembla, pero tabata hopi eng pasobra e no kier a caba, el a sinti hopi largo,” el a conta.

AZV, cu tin un cantidad considerabel di asegurado actualmente na Colombia, tambe a reacciona riba e situacion. Mediante un comunicado di prensa e institucion a informa cu alrededor di 238 pashent y acompañante relaciona cu AZV ta actualmente den e pais. E organisacion a busca contacto cu su partnernan local pa haya informacion tocante nan situacion despues di e temblor.

Como medida preventivo, diferente persona a mester sali for di edificionan inmediatamente despues di e temblor. Segun informacion cu AZV a haya for di Colombia, despues cu a considera e situacion suficientemente sigur a permiti personanan drenta back den e edificionan concerni.

AZV ta keda pendiente di su aseguradonan y di cualkier necesidad cu por presenta den e proximo oranan. Pashent y acompañantenan cu tin mester algun forma di asistencia durante nan estadia por acerca e International Office di e hospital caminda nan ta, pa nan situacion por ser evalua y pa haya e guia necesario.

Di parti di Gobierno di Aruba tambe tin accion pa establece e situacion di Arubianonan cu ta den diferente parti di Colombia. Durante un conferencia di prensa extraordinario, Prome Minister Mike Eman a splica cu Centro di Maneho di Crisis (CMO) y otro instancia concerni ta reuni informacion pa determina ken ta actualmente den e pais.

E trabao ta inclui identifica Arubianonan cu a biaha pa diferente motibo. No tur persona ta na Colombia pa tratamento medico; tin tambe esnan cu ta studia den e pais, ta bishitando famia of ta pasa vakantie. E informacion mester duna autoridadnan un mihor bista di e cantidad di ciudadano cu eventualmente por tin mester di asistencia.

Gobierno a haci un yamado na ciudadanonan di nacionalidad Hulandes cu ta na Colombia pa registra nan estadia na Colombia cerca representacion consular. E registro por yuda autoridadnan localisa y contacta ciudadanonan mas facilmente si e situacion cambia of si tin necesidad pa brinda asistencia. Esnan cu aworaki tin mester di asistencia consular por acerca Embahada di Reino Hulandes na Bogotá, mientras cu personanan den region di Cali por asisti na e Consul Honorario di Reino Hulandes na Cali.

Prome minister Eman a indica cu gobierno lo keda pendiente di informacion nobo cu ta sali for di Colombia y cu lo mantene coordinacion cu e instancianan relevante. Dependiendo di con e situacion desaroya, autoridadnan Arubiano ta prepara pa brinda asistencia na ciudadanonan cu lo tin mester esaki.

Mientras tanto, e experiencia di e Arubianonan cu a sinti e temblor di cerca ta duna un bista di e panico cu a reina durante e momentonan di mas incertidumbre. Esnan cu a papia cu Bon Dia Aruba a relata un experiencia cu pa varios di nan tabata completamente nobo. Afortunadamente nan ta bon despues di e susto, mientras nan ta keda pendiente di e desaroyonan na Colombia.