(AFP) – E compania di inteligencia artificial Mericano Anthropic a anuncia cu e lo agrega un watermark digital invisible na texto produci pa su chatbot Claude, como parti di su esfuerso pa cumpli cu e regulacionnan nobo di Union Europeo.
Pero e compania a aclara cu e marca ta indica solamente cu e texto a ser procesa pa Claude, y no ta confirma cu e chatbot mes a genera e texto.
E funcionalidad nobo, presenta dialuna na San Francisco, no lo ta visible pa hende y lo keda den e texto hasta despues cu e texto ser corta y pega.
Pero e herment tin limitacionnan, segun Anthropic.
E deteccion di un marca di Claude ta indica cu e texto posiblemente a ser procesa pa Claude, pero e no ta confirma di unda e contenido originalmente a bin, e compania a bisa den un comunicado.
Por ehempel, Anthropic a splica cu Claude no necesariamente ta e autor original. Hendenan hopi biaha ta usa Claude pa coregi texto, traduci, haci resumen of converti archivo. Den e casonan ey, e resultado por tin e marca di Claude, aunke e ideanan, texto of datonan original a bin di un otro fuente.
Di otro banda, un texto cu ta hopi cortico of cu a ser edita hopi, por no carga un marca di awa digital.
Ora Claude genera un tipo di archivo cu ta sosteni, manera .jpg, e lo agrega metadata firma di procedencia. E metadata ta keda un standard habri cu ta ser usa pa registra informacion tocante e origen y historia di un contenido digital.
Anthropic a bisa cu solamente modelonan di Claude lansa desde 2 di augustus lo tin e sistema nobo di watermark. Modelonan anterior tambe lo ser actualisa pa inclui e funcionalidad.
E cambionan ta forma parti di e medidanan pa cumpli cu regulacionnan nobo di Union Europeo tocante inteligencia artificial. E regulacionnan ta stipula cu contenido genera pa AI mester tin marca cu por ta visible automaticamente pa sistemanan di computer.
Companianan cu viola e regulacionnan por enfrenta multanan significativo.
Anthropic a confirma cu e lo usa watermark riba tur su servicio rond mundo, y no solamente den Europa.
Anthropic ta un di aproximadamente 190 organisacion cu a firma un codigo boluntario di bon practica di EU fin di luna pasa. Entre e otro companianan tin Google, Meta, Microsoft, Mistral y OpenAI.
Google ya a desaroya SynthID, un tecnologia avansa y no publico pa pone y detecta watermark digital. E compania ta impulsando companianan grandi di tecnologia, entre nan Apple, Nvidia y OpenAI, pa adopta e standard.
Sinembargo, Anthropic ainda no a lansa su mesun herment pa detecta watermark, algo cu e codigo Europeo di bon practica ta pidi.
