Diamars atardi a drenta noticia cu parlamentario di AVP, Mike de Meza a yega na un acuerdo cu Ministerio Publico (OM) tocante su caso cu a strob’e di bira minister den gobierno di AVP-FUTURO.
Segun e reportahenan inicial, OM a dicidi pa descarta e caso cu condicion cu De Meza lo mester paga un suma di 2.500 florin, pero no mester admiti culpabilidad pa no cumpli cu su debernan fiscal, cual tabata e tema rondonando e caso controversial aki. Ademas a reporta den otro medio cu awor e parlamentario lo por tuma un cartera den gobierno, ya cu OM lo dun’e su verklaring omtrent zijn gedrag (VOG).
Riba pagina di Facebook di fraccion AVP a confirma cu awor de Meza ta ministeriabel. E fraccion tambe a felicita e parlamentario y su ekipo durante e proceso, bisando cu “Mike a sigui para firme, cu serenidad, perseverancia y confianza.”
E investigacion contra parlamentario Mike de Meza ta bin despues di un periodo prolonga di controversia relaciona cu su situacion fiscal y cu e proceso di screening cu tabata necesario pa nombr’e como minister den Gabinete AVP-Futuro.
Na comienso di 2025, De Meza tabata e candidato di AVP pa asumi e cartera di Infrastructura, Energia y Medio Ambiente. Sinembargo, e proceso di screening no a keda completa despues cu Departamento di Impuesto a emiti un evaluacion desfaborabel tocante su comportamento fiscal, loke a impedi cu e nombramento sigui manera inicialmente tabata plania.
Noticia tocante e rumbo nobo cu e caso a tuma ta den proceso.
