Gobierno di Aruba a drenta den un acuerdo financiero cu Sociale Verzekeringsbank (SVb) pa un suma maximo di Afl. 50 miyon, pa un periodo di tres aña y cu un interes di 3% pa aña. E transaccion ta forma parti di e necesidad di Gobierno pa refinancia debe cu ta vence durante 2026.

E acuerdo ta aparece den e Landsbesluit Financieringsbehoefte 2026-II, AB 2026 No. 21, fecha 21 di juli 2026. E Landsbesluit ta autorisa Minister di Finanzas pa cera un acuerdo di “termijndeposito” cu SVb pa un suma di te cu Afl. 50 miyon.

Conforme e condicionnan publica, e acuerdo ta cubri e periodo di 1 di augustus 2026 te cu 31 di juli 2029. Gobierno lo paga SVb 3% di interes pa aña, cu pago cada tres luna. Na final di e periodo, gobierno mester paga back e suma principal completo na SVb.

Aunke e termino oficial uza ta “termijndeposito-overeenkomst” y no “prestamo”, den practica e construccion tin caracteristicanan similar na un prestamo: SVb ta pone fondo na disposicion di gobierno durante un periodo determina, gobierno ta paga interes y despues mester paga back e capital.

Esaki ta importante pa distingui e transaccion di un transferencia permanente di surplus. A base di e construccion publica, SVb ta mantene un derecho financiero contra gobierno pa e suma deposita, ademas di e interes cu gobierno mester paga.

Na prome bista por parce contradictorio cu gobierno tin un surplus presupuestario y, na mesun momento, ta busca financiamento nobo. Pero un surplus no necesariamente ta nifica cu gobierno tin suficiente placa disponible pa paga tur su debe cu ta vence den e mesun aña.

Un surplus ta indica cu, durante un periodo determina, entrada di gobierno ta supera su gastonan. Pero gobierno tin tambe debe adkiri den añanan anterior cu ta yega na nan fecha di vencemento. Na 2026, Aruba tin alrededor di Afl. 648 miyon na prestamo cu mester ser paga. Parti por ser paga cu recurso propio, pero pa e resto gobierno por refinancia: fia placa nobo pa paga prestamo existente cu ta vence.

Pues, gobierno por tin un surplus y ainda tin un necesidad di financiamento. E surplus ta reduci cuanto gobierno mester fia, pero no necesariamente ta elimina e necesidad completamente.

Den practica, refinanciamento di debe ta algo comun pa gobierno. En bes di paga full un prestamo cu ta vence directamente for di entrada coriente, gobierno por reemplasa e debe existente cu financiamento nobo, dependiendo di su posicion di likides, condicionnan di mercado y costo di financiamento.

Pa 2026, Aruba tambe a busca financiamento riba mercado internacional y local. E acuerdo di Afl. 50 miyon cu SVb mester ser mira den e contexto mas amplio aki: e informacion publico ta indica cu e financiamento ta destina principalmente pa atende obligacionnan existente cu ta vence, no pa crea un programa nobo di gasto di Afl. 50 miyon.

Segun un splicacion cu director di SVb, Edwin Jacobs, a duna anteriormente na un medio local, inversion di fondo disponible no ta un actividad nobo pa SVb. Como institucion cu ta administra diferente fondo social, SVb por tin placa cu no mester ser uza inmediatamente pa paga obligacionnan. Historicamente, segun Jacobs, fondo disponible a ser inverti, entre otro, den deposito bancario y bono di Gobierno, pa asina genera un rindimento mientras e placa no ta necesario.

Jacobs a indica cu despues di pandemia y recuperacion economico, situacion financiero di diferente fondo administra pa SVb a mehora y a crea surplus. Gobierno a habri un proceso pa un termijndeposito, SVb a participa y e institucion a haya e colocacion di Afl. 50 miyon pa tres aña.

Na un interes nominal di 3% pa aña riba Afl. 50 miyon, esaki ta representa aproximadamente Afl. 1.5 miyon di interes pa aña si e suma completo ta ser deposita durante henter e periodo, of alrededor di Afl. 4.5 miyon durante tres aña, sin tene cuenta cu detayenan tecnico di calculacion.

Pa pensionadonan cu ta ricibi AOV via SVb, e pregunta principal ta si e colocacion di Afl. 50 miyon por afecta capacidad di SVb pa sigui paga pensioen.

A base di e documentacion publico menciona den e Landsbesluit, no tin indicacion cu e transaccion ta cambia e derecho of e monto di AOV di pensionadonan. Tampoco e construccion ta indica cu Afl. 50 miyon ta ser entrega permanentemente na gobierno. SVb ta obtene un acreencia contra pais Aruba, gobierno mester paga interes durante tres aña y mester paga back e capital riba e fecha di vencemento.

Pero tin un limitacion importante den informacion publico: e Landsbesluit no ta specifica di cual fondo administra pa SVb e Afl. 50 miyon ta sali. SVb ta administra diferente fondo social, cu cada uno tin su propio obligacionnan y rekisito di reserva.

Tampoco e Landsbesluit ta publica un analisis detaya di efecto di e colocacion riba likides y reserva di e fondo concerni. Consecuentemente, a base di e documento solamente, no por determina cuanto margen financiero lo keda disponible despues di e inversion.

Pa pensionadonan, pues, no tin un efecto directo anuncia riba nan pensioen como resultado di e acuerdo. E punto cu merece claridad ta si, despues di despotia e Afl. 50 miyon, SVb ta mantene suficiente likides y reserva pa cumpli cu tur su obligacionnan. Si e fondo tin efectivamente surplus cu no ta necesario durante e periodo di tres aña y reserva legal ta keda intacto, e inversion por genera entrada adicional pa SVb via interes.

E riesgo financiero principal ta cu SVb ta presta — of, den termino formal, deposita— fondo cerca un solo parti cu tin obligacion di paga e placa back: pais Aruba. Manera cu cualkier inversion, esaki ta implica cu e placa no ta inmediatamente disponible durante e periodo acorda y cu devolucion ta depende di gobierno cumpli cu su obligacion. E informacion publico disponible, sinembargo, no ta mustra cu pago di AOV na pensionadonan ta den peliger como consecuencia di e transaccion.

Aunke e transaccion por genera interes pa SVb, gobierno ainda mester splica claramente pakico ta necesario pa busca Afl. 50 miyon cerca un institucion cu ta administra fondo social, specialmente mientras Gobierno ta reporta surplus. Tambe mester ta cla cuanto debe ta ser paga cu recurso propio y cuanto ta ser refinancia.

Ademas, tin pregunta tocante transparencia. Publico, specialmente pensionadonan y aseguradonan, tin interes pa sa di cual fondo e Afl. 50 miyon ta sali y cuanto reserva ta keda despues.

E transaccion ta relevante tambe pa motibo cu surplus di SVb y AZV ya tabata topico di discusion entre Gobierno di Aruba y College Aruba financieel toezicht (CAft).

Den su conseho tocante presupuesto di 2026, CAft a indica cu e surplus presupuestario di sector colectivo mester ser uza pa reduccion di debe publico. CAft a recomenda gobierno pa formalisa acuerdo cu AZV y SVb tocante uzo di nan surplus, teniendo cuenta explicitamente cu e reservanan cu fondo social mester mantene conforme ley.

Esaki ta mustra tambe e diferencia entre uza un surplus directamente pa baha debe y inverti fondo disponible den un instrumento financiero.

Den e acuerdo actual, segun e Landsbesluit, SVb no ta simplemente entrega Afl. 50 miyon na gobierno sin obligacion di paga back. E institucion ta mantene un acreencia di te cu Afl. 50 miyon contra pais Aruba y ta ricibi 3% di interes durante e periodo acorda.

Aunke condicionnan principal di e transaccion ta publica, cierto pregunta importante ainda no ta contesta den e Landsbesluit.

Entre nan ta di cual fondo specifico administra pa SVb e Afl. 50 miyon ta sali, cuanto likides y reserva e fondo lo mantene despues di e colocacion, y con SVb a evalua cu un rindimento di 3% pa tres aña ta adecuado compara cu otro opcionnan di inversion.

E preguntanan aki ta specialmente relevante pa determina e efecto real di e transaccion riba posicion financiero di SVb y, indirectamente, e grado di proteccion di fondo destina pa obligacionnan social.

Loke ta confirma oficialmente ta cu SVb tin un deposito di te cu Afl. 50 miyon cerca pais Aruba, cu gobierno ta paga 3% di interes anual durante tres aña y cu, conforme e acuerdo, e suma principal mester ser devolvi completamente na SVb na juli 2029. E transaccion, pues, no ta simplemente gobierno “tumando surplus” di SVb. Ta un forma di financiamento di gobierno y, na mesun momento, un inversion di fondo disponible di SVb.