Un video publica recientemente pa un ciudadano preocupa a bolbe pone e tema di e-steps den centro di atencion na Aruba. Den e grabacion, por mira un adulto coriendo un e-step riba caminda y cargando un stoel di baby cu un baby aden. E imagen a provoca reaccion fuerte den comunidad, principalmente pa motibo di e riesgo cu un situacion asina por representa tanto pa e menor como pa otro usuarionan di caminda.
E reaccionnan riba social media tabata inmediato. Hopi persona a califica e comportamento como iresponsabel y a cuestiona unda control di autoridadnan a keda. Otro reaccionnan a pidi intervencion di polis y sancion contra personanan cu ta pone muchanan chikito den situacionnan di riesgo. Tambe tin ciudadanonan cu ta indica cu esaki no ta un caso isola, pero algo cu nan ta mira cu frecuencia den area hotelero.
Mas cu indignacion pa un solo video, e caso ta bolbe habri un discusion cu pa hopi tempo caba ta presente den comunidad. Preocupacion tocante uzo di step electrico, como tambe scooter y bicicleta electrico, no a cuminsa cu e video reciente. Durante ultimo añanan, y particularmente cu crecemento di nan uzo den area hotelero, ciudadanonan a expresa inkietud tocante manera cu algun usuario ta move den trafico. E preocupacionnan ta varia di maneho entre autonan, uzo riba acera, parkeer e vehiculonan den espacio publico y mas cu un persona riba un solo e-step, te na transportacion di mucha.
E punto central den mayoria di e reaccionnan ta seguridad. Un e-step ta laga su usuario exponi den caso di un caida of impacto. Ora un mucha chikito of un baby ta involucra, e preocupacion ta aumenta mas ainda, pasobra un car seat ta diseña pa proteha un mucha ora e ta instala y uza corectamente den un vehiculo apropia. Su uzo riba un e-step no ta elimina e vulnerabilidad cu e forma di transporte aki ta presenta.
E discusion publico ta desaroya paralelamente cu un proceso legal y administrativo cu Gobierno di Aruba a inicia e aña aki.
Dia 21 di april 2026, Minister di Husticia Arthur Dowers a anuncia cu uzo di step, scooter y bicicleta electrico riba caminda publico lo no ser tolera, sosteniendo entre otro cu e tipo di vehiculonan aki no ta cumpli cu exigencianan necesario y cu nan ta representa un preocupacion pa seguridad den trafico. Dia 29 di april a sigui un ultimo aviso publica via social media, y dia 30 di april autoridadnan a cuminsa cu retiro di e tipo di vehiculonan aki.
Gobierno a basa su posicion entre otro riba Landsverordening wegverkeer. Segun informacion oficial, vehiculonan cu funciona manera vehiculo motorisa mester cumpli cu exigencianan tecnico, registracion y seguro pa por participa den trafico riba caminda publico. Gobierno tambe a haci referencia na articulonan 15 y 23 di Algemene Politieverordening relaciona cu uzo di espacio publico y obstruccion di trafico.
Sinembargo, e accion di Gobierno a termina dilanti Corte despues cu Evikes Corporation VBA y Friendly Green Bike Company Aruba VBA, dos compania cu ta huur e vehiculonan aki, a inicia un procedemento contra Pais Aruba. E caso a toca no solamente legalidad di e situacion, pero principalmente e manera cu gobierno a procede cu e retiro di e vehiculonan.
Den un sentencia di 22 di mei 2026, Corte di Prome Instancia a determina cu gobierno no por simplemente confisca of retira step, scooter of bicicleta electrico sin sigui e procedemento legal corespondiente. Corte a constata cu no tabatin un decision administrativo formal y cu e companianan no a ricibi notificacion por escrito necesario indicando e supuesto violacion, consecuencia y oportunidad pa actua.
E sentencia no a establece cu e tipo di vehiculonan aki automaticamente ta permiti sin condicion riba caminda publico. E punto importante tabata cu gobierno, mescos cu cualkier otro instancia, mester sigui e procedemento determina pa ley prome cu aplica cierto medida. Despues di e sentencia, gobierno a mantene su posicion cu autoridad tin facultad pa actua, pero cu esaki mester sucede via e trayectoria administrativo corecto.
Como siguiente paso gobierno a publica un aviso oficial den Landscourant dia 29 di mei 2026. Compania, doño y otro personanan cu ta ofrece servicio di huur step, scooter of bicicleta electrico pa uzo den espacio publico sin e permiso legal necesario a haya un periodo di 14 dia pa para actividadnan cu no ta cumpli cu ley of pa regularisa nan situacion. Gobierno a indica cu durante e periodo ey autoridadnan lo sigui intensifica control y coordinacion.
Na juli, gobierno a bolbe defende su posicion, indicando cu e decision relaciona cu e-steps ta basa riba un rapport di Comision Seguridad den Trafico. Ministerio di Husticia a señala cu preocupacion ta inclui riesgo serio pa seguridad y dificultad pa controla uzo di e vehiculonan. Gobierno a pone e situacion di Aruba tambe den contexto internacional, unda diferente pais y ciudad a opta pa prohibicion of regulacion mas estricto di e-steps.
Mientras e proceso legal y administrativo ta sigui su curso, e realidad riba caminda ta keda e aspecto cu mas ta preocupa comunidad.
E video di Palm Beach ta ilustra precisamente e diferencia entre un debate huridico tocante permiso, procedemento y autoridad di gobierno, y e pregunta practico di con e tipo di vehiculonan aki ta ser uza diariamente. Pa un gran parti di comunidad, no ta suficiente pa determina solamente si un compania por of no por ofrece un e-step. Nan preocupacion ta tambe ken por uza un e-step, cuanto persona por subi riba dje, unda nan por core, ki proteccion ta necesario y ki consecuencia tin ora un usuario pone su mes of un menor na riesgo.
Den e reaccionnan riba e video, diferente ciudadano a menciona cu nan ta mira adulto core cu baby of mucha riba e-step mas biaha. Otro ta reclama cu nan a presencia situacionnan similar hasta den cercania di Polis sin cu aparentemente tin intervencion. E comentarionan aki ta mustra claramente e percepcion cu tin den comunidad: control riba caminda no ta suficiente.
Ciudadanonan ta haci un yamado tambe pa establece regla mas cla, incluyendo un limite di un solo persona pa e-step. Otronan ta considera cu, independientemente di e discusion tocante legalidad general di e vehiculo, autoridadnan mester por actua contra uzo cu claramente ta crea peliger. E reaccionnan ta refleha frustracion cu no ta nobo y cu a crece mientras e-steps a bira un imagen comun den Palm Beach y otro parti di area hotelero.
Na mesun momento durante e caso den Corte, e companianan a argumenta cu nan servicio ta ofrece un opcion di transporte pa bishitantenan y cu nan actividad economico ta sostene empleonan. E companianan tambe a cuestiona e proporcionalidad di e manera inicial cu gobierno a interveni.
Pero pa hopi, un beneficio economico of un forma alternativo di transporte pa turista no ta elimina e riesgo di seguridad. Na momento cu diferente tipo di vehiculo ta comparti caminda, acera y espacio publico, tin necesidad di regla cla, supervision consistente y responsabilidad di usuario.
E video reciente ta pone mas enfasis riba importancia di proteccion di muchanan chikito, cu no ta den posicion pa evalua e riesgonan den trafico. E responsabilidad ta keda primeramente na e adulto pa no expone nan na peliger innecesario, mientras un sistema cla di regla y control mester contribui na preveni situacionnan insigur.
E indignacion cu e video a provoca, no ta limita na un solo incidente. E ta forma parti di un preocupacion cu comunidad ta expresa pa hopi tempo caba tocante seguridad den trafico y uzo di e tipo di vehiculonan electrico aki. E proceso entre gobierno y e companianan den Corte a aclaria parti di e aspecto huridico, pero e discusion social ta leu di ta cla.
Gobierno y autoridadnan competente tin e reto pa fortalece control, aplica reglanan consistentemente y interveni contra uzo peligroso, specialmente ora mucha of baby ta envolvi. Un maneho cla y presencia activo riba caminda por yuda preveni accidente y garantisa cu seguridad di tur usuario di trafico ta keda prioridad.
