Dos operacion di polis relaciona cu droga den tiki mas cu un siman un biaha mas a pone atencion riba e problema di narcotivo na Aruba. Pero mira banda di otro casonan reporta na 2026, e incidentenan ta punta riba un situacion mas amplio: e mercado di droga na Aruba.

E casonan registra e aña aki ta varia di droga intercepta na lama y plantacion di marihuana descubri riba tera, te benta di droga den bario, arma di candela, cantidad grandi di placa cash y diferente tipo di narcotico.

E siman aki, otro elemento preocupante a aparece: menornan di edad.

Den un di e casonan mas recien, Cuerpo Policial di Aruba (KPA) a aresta cinco homber despues di un persecucion na Oranjestad. Di e cinco, tres tabata menor di edad.

E incidente a cuminsa diaranson pa aproximadamente 6:19pm, ora central di polis a ricibi informacion tocante un vehiculo cerca di un negoshi na Caya Frère Bernardinus. Segun e informacion, un di e ocupantenan tabatin un arma di candela.

A desplega agentenan di polis na e area, unda nan a haya e vehiculo y a duna ordo pa e chauffeur stop. E chauffeur presuntamente a ignora e ordo, loke a resulta den un persecucion.

Eventualmente, polis a logra stop e vehiculo cerca di veld di River Plate. Den e auto tabatin cinco homber – tres menor y dos adulto. A listra e vehiculo y a haya droga, segun polis. A aresta tur cinco persona y a transporta nan na warda di polis pa presenta dilanti fiscal assistent.

Polis a confisca tanto e droga como e vehiculo, y subsecuentemente a busca e arma di candela cu presuntamente a tira for di e vehiculo cerca di e veld di River Plate. E caso a keda transferi na departamento di Recherche pa mas investigacion.

E arestonan aki a yega apenas algun dia despues di otro investigacion significante tocante narcotico.

Dia 5 di augustus, Unit Narcotica trahando cu Unidad di Crimen Organisa (UGC), Wardacosta, Team di Aresto y Unidad K-9 a intercepta loke polis a describi como un cantidad grandi di marihuana y cocaina riba lama.

Despues e mesun anochi, autoridadnan a aresta un homber naci na Colombia identifica como E.R.G. y a haci un entrada hudicial na un propiedad na Sero Blanco. Tres indocumentado haya durante e operacion tambe a keda deteni y entrega na wardacosta.
E investigacion a continua.

Dia 13 di augustus, Team di Aresto a detene otro homber, identifica como R.R.A.M. naci na Aruba, na un propiedad na Johan de Wittstraat. Eynan, Unit Narcotica a reporta otro descubrimento significante: un gran candidad di placa cash.

Polis no a descarta mas aresto.

Mira individualmente, e dos caso ta notable. Mira hunto cu otro operacionnan den e prome ocho luna di 2026, sinembargo, nan ta duna un bista di e variedad di actividad relaciona cu droga cu autoridadnan ta confrontando na Aruba.

Un aña di diferente operacion di droga

Na januari, polis a haci un inval na propiedadnan na Boliviastraat y Caya Frère Henricus como parti di un investigacion cu a resulta den dos aresto y confiscamento di droga, arma di candela y municion.

Despues e mesun luna, autoridadnan a atende otro banda di e problema di droga: traficacion maritimo.

A aresta 7 homber Venezolano despues cu a intercepta un boto sospechoso di ta transporta droga pa Aruba. A confisca droga riba lama, mientras cu tambe a descubri pakinan adicional na costa nort oriental di Aruba.

Na februari, otro investigacion despues di intercepcion di droga riba boto a resulta den tres aresto y confiscamento di aproximadamente cuatro kilogram di hashish. Subsecuentemente a haci inval na Bubali y Sero Patrishi.

E mesun luna, polis a tene inval na un sitio na Kamay sospecha di bende droga. A aresta un persona, mientras polis a reporta di a confisca cantidad substancial di droga y placa.

E operacionnan a continua na maart y april.

Na maart, Unit Narcotica a haci un buskeda hudicial na Bernhardstraat en conexion cu sospecho di benta di droga. A aresta un homber di 66 aña naci na Aruba.

Despues a bin un serie di caso involucrando cultivo local di marihuana. Comienso di april, polis a desmantela un plantacion di marihuana na Savaneta, arestando dos persona y confiscando 62 mata.

Dia 10 di april, Unit Narcotica a haci inval coordina na varios sitio, incluyendo Sero Blanco, Bernadetastraat, Korvetstraat y Edison straat. A aresta cuatro persona. Polis a confisca 354 mata di marihuana, marihuana procesa y ekipo asocia cu cultivo.

Hunto cu e caso di Savaneta, e dos operacion ey so a resulta den al menos 416 mata di marihuana confisca den un periodo di tempo relativamente cortico.

Fin di april, otro operacion na Sero Biento a demostra otro dimension di e mercado. A aresta tres persona y autoridadnan a reporta di a haya marihuana, cocaina, XTC y tusi hunto cu un arma di candela y cantidad di cash.

E imagen emergiendo for di e casonan aki pues no ta limita na un droga, un metodo di distribucion of un tipo di sospechoso.

Loke estadistica oficial ta bisa

Tambe mester mira e casonan den marco di estadistica di Ministerio Publico (OM).

Segun e rapport anual mas recien di OM, a aresta 227 en conexion cu delito di droga aña pasa. Di nan 113 a ser hiba den custodia di polis, incluyendo 47 persona sospecha specificamente di bende narcotico.

E cantidadnan confisca a keda substancial. Durante 2025, Unit Narcotica a reporta di a confisca y destrui mas di 74 kilogram di cocaina y aproximadamente 541 kilogram di marihuana. Autoridadnan tambe a confisca mas di 10 kilogram di hashish, 534 mata di marihuana, 1.151 simia di marihuana, 31 vape di marihuana, 88 sigaria di marihuana, mas di 452 gram di MDMA y 1.035 pildo di XTC. E unidad ademas a confisca siete arma di candela y 98 ronda di municion. Cash confisca a alcansa Afl. 71.557,90, US$34.481 y €930.

E cifranan aki ta duna contexto importante pa loke ta sucediendo na 2026. Pero estadistica completo pa 2026 ainda no ta disponible, y e cantidad di aresto of droga confisca no ta coresponde necesariamente cu e prevalencia di uso of traficacion di droga. Un cargamento grandi, por ehempel, por aumenta dramaticamente e cifranan sin demostra cu e cantidad di crimen relaciona cu droga a aumenta.

Loke e casonan si ta mustra ta e diversidad di e problema cu autoridadnan ta enfrenta.

Importacion, cultivo y benta local

Posicion geografico di Aruba ta haci traficacion maritimo di droga un problema duradero. E intercepcion na januari y confiscamento maritimo grandi dia 5 di augustus ta mustra cu e ruta aki ta keda relevante.

Pero e casonan riba tera ta conta otro storia.

Descubrimento di centenares di mata di marihuana ta indica cultivo local. Operacionnan den areanan incluyendo Kamay y San Nicolas tabata enfoca riba sospecho di actividad local di benta di droga. Otro investigacion a resulta den combinacion di droga, arma y cash.

E operacion na Sero Biento tambe a demostra e diversidad di substancia potencialmente circulando localmente, cu polis reportando marihuana, cocaina, XTC y tusi den un solo investigacion.

Anteriormente, OM a enfatisa cu su politica di droga no ta dirigi exclusivamente riba traficacion internacional. Droga drentando Aruba por drenta mercado domestico, unda benta y casnan di droga ta crea molester y ta afecta calidad di bida den barionan.

Ta importante pa nota cu Aruba no ta djis un punto door di cual droga por pasa, tambe tin un mercado local cu polis y fiscal ta purbando di atende.

Y e aresto e siman aki, di tres menor di edad, ta lanta otro pregunta: con jong ta e hendenan birando involucra den e ambiente aki?

E comunicado di polis no ta establece ki rol e tres menor tabatin, ni si e droga descubri den e vehiculo tabata pertenece na un di e ocupantenan particular. E preguntanan aki ta keda parti di e investigacion. Pero e presencia di menor di edad merece atencion. Ora ta consider’e banda di otro casonan reporta e aña aki,e ta agrega otro dimension na un problema di droga cu ya ta inclui transporte internacional, cultivo domestico, benta riba caya, arma y fluho significante di cash.