Expansion di Secrets Baby Beach Aruba un biaha mas ta poniendo un di e desaroyonan mas controversial di turismo na Aruba den centro di debate publico, mientras construccion ta avansa den e di dos fase cu ta bay agrega aproximadamente 300 camber extra na e resort cerca di Baby Beach.

Grupo Martinón a anuncia e di dos fase anteriormente e aña aki, y siman aki, ciudadanonan a nota e avance di e construccion. E expansion ta spera di agrega 300 camber como tambe facilidadnan nobo, incluyendo un sala di convencion grandi. E edificionan existente di Secrets Baby Beach Aruba, cu tabatin su apertura oficial na juni 2025, actualmente ta opera 304 suite.

Pa Aruba, sinembargo, otro 300 camber di hotel na Baby Beach ta representa considerablemente mas cu expansion di un resort existente. E proyecto ta toca riba un debate cu a sigui Secrets casi desde su inicio: con hopi desaroyo di turismo mester tin na Sero Colorado y San Nicolas, ki beneficio economico e desaroyonan aki ta trece realmente pa e comunidad local, y con hopi di e caracter di Baby Beach nos ta dispuesto pa sacrifica den e proceso.

E escala di desaroyo no ta algo nobo.

Bon Dia Aruba a reporta for di 2019 caba cu plan pa e proyecto tabata inclui desaroyo den diferente fase. Na 2021, informacion atribui na desaroyador Three Rivers tabata indica plan involucrando centenares di camber den diferente fase. E tempo aya, sostenedornan politico a presenta e proyecto como comienso di un era economico nobo pa San Nicolas, mientras oponentenan a cuestiona si desaroyo di e magnitud aki tabata apropia pa e area.

E desacuerdonan aki eventualmente a yega corte.

Residentenan di Sero Colorado ripitidamente a reta decisionnan tocante permiso di construccion di e proyecto. Entre nan preocupacion tabatin e tamaño y ubicacion di e edificionan, nan efecto riba e ambiente residencial y panorama di e area, preocupacion ambiental, y si e plan tabata cumpli cu rekisitonan aplicable di planificacion teritorial. Na diferente etapa, permiso di construccion of porcionnan di e proyecto a bira tema di proceduranan legal y restriccion temporal.

Na september 2024, Bon Dia Aruba a reporta cu corte a determina cu construccion por a continua. E residentenan a insisti cu e hotel ta demasiado grandi pa su ubicacion y lo tin impacto negativo riba e caracter di e area rond di dje.

E controversia nunca tabata exclusivamente legal.

For di comienso, sostenedornan a caracterisa Secerts como un catalisador economico capaz di haci algo cu gobiernonan a lucha pa logra pa decadas: trece inversion priva significante y empleo den hotel pa San Nicolas.

Na 2023, prome minister e tempo ey, Evely Wever-Croes a bisa cu gobierno tabata kere cu e proyecto por trece beneficio substancial pa Aruba y particularmente San Nicolas, incluyendo empleo mas cerca di cas pa residentenan cu de lo contrario tabata transporta tur dia pa area di hotel den west.

San Nicolas Business Association tambe a bira un sostenedor, na dado momento organisando un campaña di firma “Say Yes to Secrets.” Sostenedornan a argumenta cu huesped di hotel, empleado y negoshinan asocia por inyecta actividad economico nobo den un districto cu pa añas tabata neglisha despues di caida di economia di refineria.

Ora Secrets a habri su oficina di empleo na San Nicolas na 2024, representantenan un biaha mas a enfatisa empleo, crecemento economico y mehoracion den calidad di bida como beneficionan central di e proyecto.

Awo cu e hotel ta operando y su expansion ta na caminda, ta midi e promesanan aki cu loke residentenan ta mira den nan alrededor.

Un usuario riba rednan social, respondiendo na activista di San Nicolas, Hilario Doncker, a cuestiona con e hotel a mehora calidad di bida na San Nicolas, argumentando cu residentenan ainda tin dificultad cu costo halto di bida mientras Main Steet ta keto.

Otro usuario a lamenta loke a describi como e perdida di Baby Beach y Rodgers Beach como lugarnan unda antes residentenan por a disfruta di trankilidad relativo, concluyendo cu Aruba a bira demasiado congestiona y tin demasiado hotel.

E comentarionan ta refleha un pregunta mas amplio rond di e desaroyo: crecemento economico pa ken?

Doncker mes recientemente a ofrece un perspectiva diferente despues di bishita Baby Beach.

El a argumenta cu no por atribui e cantidad grandi di bishitante na e beach solamente na Secrets. Hasta prome cu apertura di e resort, el a bisa, hende buscando sombra bao pal’i druif of palapa hopi biaha mester a yega entre 6 pa 7or di mainta pasobra Baby Beach ya tabata altamente bishita pa turista kedando na otro partinan di e isla.

Durante su observacion reciente, Doncker a bisa cu el a mira cantidad di vehiculo di huur den area di parkeo, cual e ta considera evidencia cu hopi bishitante ta keda bin di hotel y acomodacion den otro partinan di e isla. Como cu Secrets ta cerca di Baby Beach, el a bisa, su huespednan generalmente lo tin tiki motibo pa bay cu auto eynan.

Turista cu kende el a papia a cita e awa superficial y relativamente keto di Baby Beach como un di e motibonan principal cu nan a bay mas leu a pesar di tin beach manera Eagle Beach, Palm Beach y Arashi mas cerca di nan acomodacion.

Doncker tambe a bisa cu el a tuma contacto cu un miembro di management di Secrets despues di mira comentarionan cu e hotel tabata efectivamente cera pa local. Segun e informacion cu el a ricibi, residentenan por pidi un tour gratis di e hotel, tin weekend stay disponible pa local, y ta ofrece day pass pa $350.

Pregunta tocante acceso publico na Baby Beach a bin dilanti den pasado caba.

Na juni 2025, tiki despues di apertura di Secrets, Bon Dia Aruba a investiga keho di lectornan cu tabata kere cu bandera di e hotel riba Baby Beach tabata indica cu e parti ey di e beach tabata reserva pa huesped di Secrets. Empleadonan di e hotel a bisa Bon Dia Aruba e tempo aya cu esaki no tabata e caso y e beach ta keda publico. Nan a splica cu e bandera tabata sirbi como punto di encuentro unda huespednan por a obtene stoel y parasol prome cu hiba nan na beach.

Ambientalista Greg Peterson, sinembargo, a rechasa e argumento cu no hopi a cambia cu e hotel.

“E Baby Beach cu nos a lanta cune a bay perdi,” Peterson a skirbi contestando Doncker. Su argumento no ta cu Secrets riba su mes diripiente a transforma e beach. Sino e ta describi un proceso gradual den cual turismo cada bes mas ta ocupa espacio y a cambia e experiencia di un area tradicionalmente importante pa residentenan local.

“E saturacion di baby Beach cu turista no a pasa den un anochi. El a yega poco poco,” Peterson a skirbi.

Cu centenares di camber adicional di hotel planea, y Aruba ricibiendo cantidad grandi di bishitante, Peterson ta kere cu e proceso aki ta bay acelera. E tambe a cuestiona cu ta asumi cu mas desaroyo na San Nicolas automaticamente ta traduci den prosperidad pa esnan cu ta biba den e area. Peterson a bisa cu el a adverti mas cu un decada atras tocante e consecuencianan di busca desaroyo den parti oriental di e isla, principalmente door di bende of desaroya tereno cu ta cada bes mas valioso.

“Cinco aña, tal bes dies aña for di awo,” el a skirbi, Aruba lo mester puntra con hopi hende di San Nicolas realmente a bira rico como resultado di loke a desaroya eynan.

Activista Milton Ponson a lanta preocupacion mas serio ainda, criticando e procesonan legal y ambiental rond di e proyecto. Ponson a bisa cu documentonan usa durante proceduranan den corte tabata falsifica, a cuestiona con adecuado e evaluacion ambiental di e desaroyo tabata, y a expresa preocupacion geologico involucrando sinkhole bao di parti di e desaroyo, cu no a atende debidamente.

E acusacionnan aki mester ta distingui di hallazgonan estableci den corte. Sinembargo, preocupacion ambiental tocante e desaroyo ta existi pa añas. Bon Dia Aruba a reporta na 2019 tocante controversia rond di informacion ambiental emiti en conexion cu e proyecto y tocante pregunta riba un rapport di impacto ambiental pa desaroyo den area di Sero Colorado.

E di dos fase di construccion, pa e motibab aki, ta yega cargando añas di tension no resolvi.

Sin duda, Secrets a trece inversion mayor di hotel na un parti di Aruba historicamente exclui for di e industria principal di turismo na Aruba. A crea empleo, a trece un marca internacional di luho na San Nicolas, y a aumenta actividad turistico.

Pero su expansion tambe ta forsa Aruba confronta un pregunta mas dificil.

No por midi desaroyo solamente pa e cantidad di camber construi, turista acomoda, of dollar inverti. E argumento original pa Secrets tabata cu desaroyo turistico na Baby Beach lo mehora San Nicolas. Agregando otro 300 camber awo, residentenan tin tur motibo pa cuestiona si e promesa aki ta birando visible den nan bida diario.

Na mes momento, Baby Beach ta presenta otro sorto di balor cu no or expresa den ocupacion di hotel of cifra di inversion. Pa generacionnan di Arubiano, e tabata un espacio recreativo publico, un panorama asocia cu famia, memoria y e caracter distintivo di p’ariba.

Ta p’esey e debate rond di Secrets a dura for di groundbreaking te apertura y awo den expansion.

E pregunta no ta si mester a construi un hotel na Baby Beach, e hotel t’ey. E pregunta awo ta con Baby Beach y San Nicolas ta bay mustra ora e desaroyo ta completo – y si e comunidad cu a ricibi asina hopi promesa lo por reconoce loke ta resta.