“E ta manera un buraco pa hala rosea di un bayena.” Asina Bill Armstrong ta cataloga e area den awanan teritorial di Aruba unda e ta convenci cu ta rico na hidrocarbono. No solamente gas pero tambe petroleo.
Armstrong a bisa esaki durante un entrevista cu Hart Energy, media specialisa den industria di energia y petroleo basa na Houston. Bill Armstrong, propietario di Armstrong Oil and Gas/ Armstrong International a duna e entrevista den preparacion pa su presentacion como orado principal na e Hart Energy Super Dug Conference na Houston, September proximo.
Armstrong Oil and Gas ta un compania independiente di exploracion y produccion. Bill Armstrong mes ta un geologo di profesion y a lanta den e ambiente di exploracion y explotacion di petroleo. Despues di mas di cuater decada desde cu a funda Armstrong Oil and Gas, Armstrong a haya e reputacion di ta un di e exploradornan mas exitoso, unda el a traha un carera dor di explora unda otronan a laga un banda. Amstrong, a bisa cu e dos areanan cu e ta trahando riba dje ta e asina yama North Slope di Alaska y Aruba.
Ta for di 2024 cu Armstrong a firma un acuerdo cu Compania Arubano di Petroleo, CAP. E acuerdo di concesion a bin despues cu segun Armstrong, el a logra detecta presencia di un rikesa di hidrocarbono den e mesun area cu Repsol a explora anteriormente.
Manera ta conoci, Repsol a pasa tempo ta pone e area panort di Aruba riba mapa y a haci cuater boramento, pero sin exito. E data acumula sinembargo, a bira propiedad di CAP, cu a hinca esakinan den un pakete cu a ofrece na otro interesadonan. Varios a cumpra e pakete cu tabata entre 150 pa 200 mil dollar, un suma considera insignificante den e mundo di petroleo. “ E arte di haya hidrocarbono ta basa riba interpretacion di data, cu ta crea un imagen di e mundo submarino. E data ta duna un bista riba e perspectiva si por tin fuentenan di petroleo y gas. Repsol berdad a bora pero no ta tur e luganan cu e mapa ta indica cu por tin posibilidad,” ta locual a informa Bon Dia Aruba. “E uso di Inteligencia Artificial, AI, sinembargo cu a bira mas detaya den ultimo añanan a permiti un interpretacion mas detaya kico por tin bou superficie, esta kico tin, unda tin y den cua cantidad,” Bill Armstrong tabata entre e diferente partidonan cu a cumpra e pakete y el a keda convenci cu por explora petroleo. E ta confia den e interpretacion nobo.”
Consecuentemente Armstrong Oil and Gas, cu na Aruba ta opera bou e nomber Andicuri Oil and Gas Exploration VBA, na 2024 a cera e contrato cu CAP pa un concesion di tres miyon y mey di hectaria. E trabounan cu a sigui despues tabata pa investigacionnan geofisico y geologico.
Den su entrevista cu Hart Energy, Bill Armstrong a enfatisa cu e ta considera e concesion aki na Aruba como e miho prospecto, e anomalidad mas grandi, miho y masivo cu el a mira den su carera. E ta keda den un anticlinal, un formacion di baranca, di 200 mil hectaria cu ta brota gas termogenico for di buraconan. “E ta increibel,” Armstrong a bisa. El a bisa cu el a busca analisis SEEP y por literalmente mira un buraco riba locual e ta describi como un bayena. “E ta mustra di ta uno no-biogenico, sino mas bien un capa di gas riba un mina di petroleo.” Y ta esey Armstrong kier explora. E ta trahando cu un ekipo cu el a conoce durante su exploracion na Alaska, cu antes tabata traha cu e compania nacional Italiano Eni. Armstrong a bisa cu a analisa tur e potencialnan den region for di Mexico te cu Argentina y pa añanan tabata busca y “mi tabata bisa ‘no’ na Panama, Jamaica, Republica Dominicana, Venezuela, Argentina y Brazil.” E team tabata puntr’e ki ora e lo sa y su contesta tabata “ora mi mir’e.” Segun Armstrong, el a haci otro investigacionnan rond Sur America y basa riba e resultadonan, Aruba ta duna e e compania e miho indicacion pa haya gas y posiblemente petroleo. Segun Armstrong, “Aruba ta manera un kerstboom.”
Punto ta si cu cada intento pa bora tin un costo halto. E no ta baha bou 50 miyon dollar. Y ta unicamente cu boramento por realmente determina si tin petroleo y gas. Companianan normalmente ta busca asociadonan, partners pa comparti e riesgo, cu ta grandi. Exploradornan manera Amstrong normalmente ta busca petroleo y despues ta bende e derechonan cu companianan cu ta refina hidrocarbono.
Sinembargo, ainda e exploracion mes no a cuminsa. Segun informacion cu Bon Dia Aruba a ricibi, Bill Amstrong mes kier hinca placa di su compania pa haci e trabou, pero ta su team ainda ta spera di por haya companianan di refinamento pa participa den e boramento mes. “Armstrong mes ta hopi entusiasma, pero su hendenan ta mas cauteloso y kier busca mas partners. Pero en principio, e ta dispuesto pa haci e exploracion su so, ya cu e ta sigur cu el a mira algo bon.
Riba e pregunta ki impacto e boramento y despues eventual exploracion lo nifica pa e biba marino, a sigura Bon Dia Aruba cu ta sigui e protocol estableci pa Repsol, ESHIA cu ta uno elabora y ta keda aplicabel pa tur cu kier explora. Ta un protocol hopi stricto unda ta tene cuenta cu e siguridad y salud di e bida marino, a bisa Bon Dia Aruba. Lo sigui amplia riba e storia aki, particularmente riba e impacto ecologico cu e por tin.
